English | عربی | Kurdî دواهەواڵ
ڕاستەوخۆ  
 
گرنگیا پەیوەندیێن هەرێمێ لگەل وەڵاتێن عەرەبی
2020-01-17 [07:42 AM]

نڤیسینا : غیاس خالد زێباری


هەبوونا پەیوەندیا دناڤبەرا مرۆڤ و دەسهەڵاتان دا فاکتەرێن پاراستنا بەرژەوەندێن هەڤپشک و سەقامگیریێ نە ، ب تایبەت لگەل جیران و ئەوێن ئایین و کلتۆرێن هەڤپشک هەین . هەرێما کوردستانێ ژی وەکی قەوارەیەکێ سیاسی و کارگێری پتر ل هەر وەڵاتەکێ خودان سەروەری پێتڤی ب پەیوەندیێن خورت هەیە ل گەل تەڤایا وەڵاتان ، هەرچەندە لڤان ساڵێن دووماهیێ ئاستێ پەیوەندیێن هەرێما کوردستانێ لگەل وەڵاتان نەخاسمە ئەمریکا و هژمارەکا زۆرا وەڵاتێن ڕۆژ ئاڤا گەهشتیە ئاستەکێ باش ، چ لسەردەمێ سەرۆک مەسعود بارزانی وەک سەرۆکی هەرێما کوردستانێ و پاشان نێچیرڤان بارزانی سەرۆکێ هەرێما کوردستانێ لسەر هەمان پرنسیپ بەردەوامی پێ دا و پێشڤەبرن ، هەبوونا ڤان پەیوەندیان ئەگەرێن دابینکرنا پشتەڤانیا سیاسی بوون بۆ هەرێما کوردستانێ ، ژلایێ ئابووری ژی ب هەبوونا پەیوەندیان ، وەڵاتان پشکداری ل ئاڤەدانیا کوردستانێ و وەبەرهێنانێ کر ، ژلایێ ووزە و بازرگانیێ ژی دیسان هەرێما کوردستانێ بوویە سەنتەرەکێ مەزن ل دەڤەرێ وپێگەهەکێ باش لسەر نەخشێ جیهانێ ڤەگرتیە . خۆرتبوونا پەیوەندیێن هەرێمێ لگەل وەڵاتان و تێکەلکرنا بەرژەوەندێن هەڤپشک فاکتەرەکێ سەرەکیێ پشتەڤانیا هەرێما کوردستانێ بوو لدەمێ خیانەتا شازدێ ئکتۆبەرا سالا ۲۰۱۷ و روودان و کارڤەدانێن پشتی وێ ژلایێ حکومەتا عیراقێ کۆ دڤیا ب هێزا لەشکری قەوارێ یاسایی و دەستووریێ هەرێما کوردستانێ ژناڤ ببەت و گەماروویێن ئابووری و سیاسی بسەپینیت . 
ئەڤەژی نیشانێ شارەزایی و لێزانینا سەرکردایەتیا کوردستانێ ژلایێ سیاسی و دبلۆماسی بۆ پاراستن و پێشڤەبرنا هەرێما کوردستانێ و ئەز باوەرم لڤان قۆناغێن داهاتی ژی هەرێما کوردستانێ دێ هەولێن باشتر دەن بۆ خورتترکرنا پەیوەندیان لگەل وەڵاتا چ لسەر ئاستێ سەرۆکێ هەرێما کوردستانێ نچیرڤان بارزانی کۆ ئەزمۆنەکا باش و سەرکەفتی دڤی واریداهەیە چ لسەر ئاستێ سەرۆکێ  حکومەتا هەرێمێ مەسروور بارزانی کۆ ئەوژی کەسەکێ دبلۆماتکارێ شارەزایە و د ئەزمۆنا خۆ یا ئێکێ دا ل سەرۆکایەتیا حکومەتا هەرێمێ دێ گرنگیەکا پاشتر پێ دەت و هەوڵ دەت داهێنانێ تێدا بکەت و پەیوەندیێن هەرێما کوردستانێ لگەل تەڤایا وڵاتان خۆرتر بکەت نەخاسمە دەڤەر بەرەڤ گۆرانکاریێن نەچاڤەرێکری دچیت و بوویەرێن نەشخافلان روو ددەن ، وەکی سەرۆک وەزیرەکێ گەنج ژی ب گۆڕ و تین هاتیە د کۆپیتنا دەسهەڵاتا ڕێڤەبرنێ و بجهــ ئینانێ دا و لدەمەکێ زۆدا گاڤێن ئەرێنی هاڤێتن و پشکەکا خالێن وێ کارناما حکومەتا خۆ پراکتیک کرن وەک رێکخستنا دەواما فەرمانبەرا و بەرنامە و پرۆژێ چاکسازیا و ..... هتد
پێگەهێ هەرێما کوردستانێ یێ سیاسی و ئابووری و جوگرافی یێ گۆنجایی یە بۆ ڕاکێشانا کۆمپانی و سەرمایەدارێن وەلاتان ، لەوما هەرێما کوردستانێ و هەولێرا پایتەخت رۆژانە هەمبێزا بەرپرس و نوونەرێن هژمارەکا زۆرا وەلاتان دکەت کۆ پشکەکا وان خودان بریار و  زلهێزێن ، ئەڤەژی نیشانێ سەرکەفتنا دبلۆماسیەتا هەرێما کوردستانێ یە .
وەڵاتێن عەرەبی ژی پێگەهەکێ گرنگێ سیاسی و ئابووری و جڤاکی ل دەڤەرێ هەیە ، ڕەنگە بۆ مە کوردا پێگەهێ وان گرنگتر بیت ، چونکی هێشتا ئەم د قۆناغا خۆرزگارکرنێ داینە ، ژلایێ جۆگرافی و دیرۆکی و جڤاکی ژی پێکە گرێدانەک دناڤبەرا کوردستانێ و وەڵاتێن عەرەبی هەنە ، ژلایێ  جۆگرافی دگەل هندەکا جیرانن و هندەکێن دیتر ژی نێزیکبوون هەیە ، ژلایێ دیرۆکی و جڤاکی ژی زێدەتر تێکەلی و هەڤپشکی هەنە ، گەهشتیە ئاستێ پێکڤە بەڕەڤانیکرنێ و خوون رێتنێ  ، بۆ نمۆنە هەردوو ئێک ئایین پەیرەو دکەن ، ئەڤێ ژی هەڤپشکی دروست کریە ل هندەک داب و نەرێتان ، ژلایێ زمانی ژی دیسان تێکەلی هەنە ..... 
هەرچەنە ژ ئەنجامێ سەرەدەریا هۆڤانەیا رژێمێن ئێک لدیڤ ئێکێن عیراقێ بەرامبەر گەلێ کورد و بزاڤا رزگاریخوازیا کوردستانی و پشتەڤانیا هژمارەکا وەڵاتێن عەرەبی ، هەتا راددەیەکی کاریگەری لسەر حەزکرنا کوردا بۆ جادا عەرەبی و  دەسهەلاتداریێن وان کرین ، ئەڤەژی تشتەکێ نۆرماڵە ...
لێ پێتڤی یە سەرۆکاتیا هەرێمێ و سەرۆکاتیا حکومەتێ دەوروبەرێن  کەڤاڵی ببینن و بۆ پاراستنا بەرژەون دوو لایەنی زێدەتر خۆ نێزیکی وەڵاتێن عەرەبی بکەت . 
هەرچەندە دەمەکێ درێژە ئەڤ گاڤە هاتینە هاڤێتن ، لێ  رەوشا سیاسی و ئابووری یا کوردستانێ و دەڤەرێ وەسا دخازیت هەرێما کوردستانێ و وەڵاتێن عەره‌بی زێدەتر نێزیکی ئێک بن ، ئەڤەژی زێدەتر د بەرژەوەندا هەرێمێ دایە .
چونکی هێشتا ئەم نەبۆینە خودان سەروەری و جڤاکێ نیڤ دەولەتی وەکی پشکەکا دەولەتا ئیراقێ سەرەدەریێ دگەل مە دکەت . 
جهێ دلخۆشیێ ئەوە ب سیاسەتا حەکیمانەیا هەرێما کوردستانێ هەلویستێ پرانیا وان وەڵاتێن عەرەبی ئەوێن سەردەمێ رژێما سەدامی پشتەڤانیا عیراقێ دکر دژی بزاڤا رزگاریخوازیا کوردی و مافێن ڕەوایێن خەلکێ کوردستانێ ، هاتیە گۆڕین و هژمارەکا وان ئەڤرۆ کونسولی و نوونەرایەتی ل هەرێما کوردستانێ هەنە و بەردەوام و ب فەرمی لسەر ئاستێن بلند بەرپرسێن وان سەرەدانا هەرێما کوردستانێ دکەن . 
ئەڤەژی دانپێدانە ب قەوارێ هەرێما کوردستانێ ، لێ گرنگە حکومەتا هەرێما کوردستانێ هەوڵ بدەت نوونەرایەتیێن ئەکتیڤ و کارا یێن حکومەت هەرێما کوردستانێ ل هەمی وەڵاتێن عەرەبی ڤەکەت ، ژبلی پەیوەندیێن سیاسی و ئابووری ، کار لسەر ئەنجامدانا چالاکیێن کلتۆری و هۆنەری و رەوشەنبیریێن هەڤپشک بکەن و لێکگۆهڕینا شاندێن دوو لایەنی ، ب تایبەت لگەل وەلاتێن خودان پێگەهــ و مەزن یێن عەرەبی وەک سعوودی و مسر و قەتەر و ئیمارات و تونس و مەغرب ..... 
خورتکرنا پەیوەندیێن ڕەوشەنبیری و کلتۆری ، دەرگەهێن مەزنتر بۆ خورتکرنا پەیوەندیێن سیاسی و ئابووری دێ ڤەکەن و دبیت ببنە فاکتەر بۆ باشتر تێگەهشتن و دیتنا وان بۆ مافێن ڕەوا یێن خەلێ کوردستانێ . 
ژلایەکێ دیتر نهۆ هژمارەکا نڤیسکار و  رەوشەنبیر و راگەهاندکارێن عەرەب پشتەڤانیا هەرێما کوردستانێ و داخازیێن گەلێ کورد دکەن ، ئەڤەژی گۆڕانکاریەکا ئەرێنی یە و گرنکە ئەڤ کەسە بهێنە کۆمکرن و رێکخستن و پشتەڤانیکرن ، داکۆ بشێن بەردەوامیێ بدەنێ و کاریگەریێ لسەر خەلکەکێ دیتر ژی بکەت .
چونکی گۆتارا رەوشەنبیری و مەدیایی کاریگەریێ لسەر جاددێ دکەت و جاددە ژی کاریگەریێ لسەر دەسهەڵاتێ دکەت . 
ئەگەر سەر نڤیسکار و رەوشەنبیر و مەدیاکارێن عەرەب هەبن پشتەڤانا مافێن ڕەوا یێن خەلکێ کوردستانێ و حکومەتا هەرێمێ بکەن ، لسەر ئاستێ وەڵاتێن عەرەبی و جیهانێ شۆرەشەکا  ناساندنا گەلێ کورد و پشتەڤانیا مافێن ڕەوا یێن نەتەوا کورد دێ بەرپا بیت ، ئەڤەژی مەزنترین دەسکەفتە بۆ هەرێما کوردستانێ .





ئەم هەواڵە 4027جار خوێندراوەتەوە
 
 
ڤیدیۆ گەلەری
شه‌قامێك رۆده‌چێت و دوو ژن ده‌خوات
بەھرەیەکی سەرنج راکێشە
باران بارین و لافاوی شاری دوبەی
شێرەکانیش یاری تۆپی پێ دەکەن
رووداوێكی سەیر پڵنگێك راوی سەگێك لەبەردەم دەرگای ماڵێك دەكات
 
 

پێناسە | گەلەری | ئەرشیف | پەیوەندی

پێبژاردنی پۆلیسی هاتووچۆ هەولێر | دهۆک | سلێمانی

هەموو مافەکان پارێزراون بۆ ئاژانسی هەواڵی زاگرۆس

Developed By: Omed Sherzad