English | عربی | Kurdî دواهەواڵ
ڕاستەوخۆ  
 
وەزارەتى خوێندنى باڵا: چالاکى توێژینەوەى زانستى لە زانکۆکان ٨٠٠% زیادى کردوە
2020-02-04 [11:07 AM]

ZNA - هه‌ولێر


 

له‌ راگه‌یه‌نراوێكی وه‌زاره‌تی خوێندنی باڵا كه‌ وێنه‌یه‌كی بۆ ئاژانسی هه‌واڵی زاگرۆس نێردراوه‌، تێیدا ئاشكرای كرد، ئەمڕۆ سێشەممە کۆنفرانسی نێودەوڵەتی (گۆڕانکاری کۆمەڵایەتی و گەشەی هەرێمایەتی) لە سەنتەرى ڕۆشنبیرى زانکۆى پۆلیتەکنیکى هەولێر دەستى بەکارەکانى کرد.

ئارام محمد قادر وەزیرى خوێندنى باڵا و توێژینەوەى زانستى له‌ وتارێكدا کە لەلایەن ئامانج عەبدوڵا سەعید نوێنەرى وەزیرى خوێندنى باڵا و توێژینەوەى زانستى خوێندرایەوە، وتی: جێگەی شانازییە ئەمرۆ جگە لە توێژەرانی زانکۆکانی کوردستان و عیراق، ژمارەیەکی بەرچاو لە توێژەرانی وڵاتانی جیهان بە بەرهەمی توێژینەوەکانیان لەم کۆنفرانسەدا بەشدارن، لەو چوارچێوەیەشدا، وتیشی، زانکۆی پۆلیتەکنیکی هەولێر هەمیشە دەستپێشخەری کاری زانستی و ئەکادیمی ناوازە بون، هەوڵی تەواویان داوە کە ئاست و کواڵیتی پرۆسەی خوێندن بەرز ڕابگرن و بەرهەمی توێژینەوە زانستییەکانیشیان بگەیەننە گۆڤارە زانستییە ئاستبەرزەکانی دونیا و گرنگی بە ئەپلاید ریسێرچ بدەن.

هەر لە وتەکەیدا د.ئامانج عەبدوڵا سەعید وتیشى: ئێمە وەک وەزارەت باوەڕی تەواومان هەیە کە توێژینەوەی زانستی و ئەکادیمیى دەبێت ڕۆڵی گەورە ببینن لە داڕشتنی سیاسەتی گشتی خوێندن و گەشەکردنی ئابوری و کۆمەڵایەتی، دەبێت پرسی توێژینەوە زانستییەکانمان باشتر ببەستینەوە بە چارەسەرکردنی گرفتەکانی کۆمەڵگا، بێگومان ئەمە تێڕوانینی کابینەی نۆیەمی حکومەتی هەرێمی کوردستانیشە، باسی له‌وه‌ش كرد، ئەگەر سەیری داتاکانی ڕیزبەندی نیشتیمانی بکەین دەبینین بەراورد لە نێوان ساڵانی ٢٠١٥ و ٢٠١٩ بەرهەمی توێژینەوەی زانستی لە گۆڤارە زانستییە ئاستبەرزەکان بە ڕێژەی (٨٠٠%) زیادی کردوە، ئەمەش مانای وایە گروپێک لە توێژەرانی بەتوانا لە زانکۆکانمان پێگەیشتون و توانای بەشداری کارایان هەیە لە بەرهەمهێنانی مەعریفە بە رەچاوکردنی هەمو پێوەر و ستانداردە نێودەوڵەتییەکان.

لەلایەن خۆشیەوە د.کاوە شێروانى سەرۆکى زانکۆى پۆلیتەکنیکى هەولێر پوختەى کار و هەوڵەکان و ئامانجى بەستنى کۆنفرانسەکەى بۆ ئامادەبوان ڕونکردەوە و لەو چوارچێوەیەشدا وتى: زانکۆکەمان بە بایەخەوە دەڕوانێتە بەستنى ئەو جۆرە کۆنفرانسانە لە ئاستى نێودەوڵەتى بۆ ئەوەى توێژەران و توێژینەوەکانمان سەرنج و پێشنیار و شارەزاییەکان لەگەڵ توێژەرانى وڵاتانى دونیا لە ڕوى زانستییەوە ئاڵوگۆڕ بکەن.

کۆنفرانسی نێودەوڵەتی (گۆڕانکاری کۆمەڵایەتی و گەشەی هەرێمایەتی) بۆ ماوەى دوو ڕۆژ بەردەوام دەبێت کە تیایدا ژمارەیەک توێژینەوە بە زمانەکانى کوردى و عەرەبى و ئینگلیزى لەلایەن چەندین توێژەرى ناوخۆ و توێژەرانى وڵاتانى جیهان پێشکەش دەکرێن.

 

 





ئەم هەواڵە 3175جار خوێندراوەتەوە
 
 
ڤیدیۆ گەلەری
لێدانی سەدە ، تا ئێستا لێدانی وانەبووە
شه‌قامێك رۆده‌چێت و دوو ژن ده‌خوات
بەھرەیەکی سەرنج راکێشە
باران بارین و لافاوی شاری دوبەی
شێرەکانیش یاری تۆپی پێ دەکەن
 
 

پێناسە | گەلەری | ئەرشیف | پەیوەندی

پێبژاردنی پۆلیسی هاتووچۆ هەولێر | دهۆک | سلێمانی

هەموو مافەکان پارێزراون بۆ ئاژانسی هەواڵی زاگرۆس

Developed By: Omed Sherzad