English | عربی | Kurdî دواهەواڵ
ڕاستەوخۆ  
 
به‌یاننامه‌ی لیژنه‌ی داكۆكیكردن له ‌مافی ئافره‌ت به‌بۆنه‌ی ٨ی مارس ڕۆژی جیهانیی ئافره‌تان
2020-03-08 [06:29 AM]

ZNA_ هەولێر


به‌بۆنه‌ی ٨ی مارس ڕۆژی جیهانیی ئافره‌تان، لیژنه‌ی داكۆكیكردن له‌ مافى ئافره‌ت له‌ په‌رله‌مانى كوردستان به‌یاننامه‌یه‌كی بڵاوكرده‌وه‌و تیایدا رۆژی 8ى مارس به‌ڕۆژی خه‌بات و قوربانیدانی ئافره‌تان بۆ ده‌سته‌به‌ركردنی یه‌كسانی و دادپه‌روه‌ری له‌نێوان پیاو و ئافره‌ت له‌ جیهان داده‌نێت و به‌رگریكردن له ‌مافه‌ڕه‌واكانی ئافره‌تان و یه‌كسانیی جێنده‌ری و چه‌سپاندنیان له‌نێو یاساو بڕیاره‌كانی هه‌رێمی كوردستان به‌ ئه‌ركی سه‌ره‌كیى خۆى ده‌زانێت، ئه‌مه‌ش ده‌قى به‌یاننامه‌كه‌یه‌:

به‌یاننامه‌ی لیژنه‌ی داكۆكیكردن له‌ مافی ئافره‌ت له ‌په‌رله‌مانی كوردستان به‌بۆنه‌ی ٨ی مارس ڕۆژی جیهانیی ئافره‌تان
٨ی مارس ڕۆژی خه‌بات و قوربانیدانی ئافره‌تانه‌ بۆ ده‌سته‌به‌ركردنی یه‌كسانی و دادپه‌روه‌ری له‌نێوان پیاو و ئافره‌ت له ‌جیهاندا، له‌م ڕۆژه‌دا دووپاتی ده‌كه‌ینه‌وه‌ كه‌ به‌رگریكردن له‌ مافه‌ ڕه‌واكانی ئافره‌تان و یه‌كسانیی جێنده‌ری و چه‌سپاندنیان له‌نێو یاساو بڕیاره‌كانی هه‌رێمی كوردستان ئه‌ركی سه‌ره‌كیمانه‌.
ئێمه‌ له‌ په‌رله‌مانی كوردستان هه‌ڵگری په‌یامی مرۆڤ سالارین له‌پێناوی به‌ره‌نگاربوونه‌وه‌ی هه‌موو پێشێلكاری و توندوتیژییه‌ك به‌رامبه‌ر به‌ئافره‌تان و به‌هێزكردنی پێگه‌و گه‌شه‌پێدانی زیاتری ڕۆلیان له‌ به‌شداریی هه‌موو ده‌سه‌ڵاته‌كانی هه‌رێمی كوردستان و كه‌رتی تایبه‌ت و كاری ڕێكخراوه‌یی له‌ هه‌موو ئاسته‌كاندا به‌تایبه‌تی له ‌ناوه‌نده‌كانی‌ بڕیاری سیاسی و دادوه‌ری و به‌ڕێوه‌بردن و ئابووری و كۆمه‌ڵایه‌تی و وه‌به‌رهێنان تێده‌كۆشین.
جێگه‌ی باس و ئاماژه‌پێكردنه‌ كه‌ ئه‌و یاساو بڕیارانه‌ی ده‌رچووێندراون یان هه‌مواركراون له ‌خوله‌كانی په‌رله‌مانی كوردستان و كابینه‌كانی حكومه‌تی هه‌رێمی كوردستان، هه‌مووی له‌پێناو به‌رژه‌وه‌ندیی ئافره‌تان و خێزاندا بوون‌،‌ به‌هۆیانه‌وه‌ پرسی ئافره‌ت پێشكه‌وتنی باش و به‌رچاوی به‌خۆیه‌وه‌ دیوه‌و وایكردووه‌ كه‌ ئافره‌ت له ‌كوردستان ڕۆڵی باش و به‌رچاوی هه‌بێ و جیاوازو پێشه‌نگتربێ به‌ به‌راورد به‌زۆربه‌ی وڵاتانی ناوچه‌كه‌، له‌گه‌ڵ ئه‌وه‌شدا ئامانجی ئێمه‌ كاركردنی به‌رده‌وامه‌ بۆ پێشكه‌وتنی زیاتر له‌پێناو به‌دیهێنانی دادپه‌روه‌ری له ‌به‌شداری و یه‌كسانی له‌ماف و ئه‌ركه‌كان‌ له‌نێوان ژن و پیاو له ‌هه‌رێمی كوردستان، به‌پشت به‌ستن و په‌یڕه‌وكردنی پره‌نسیپه‌كانی مافی مرۆڤ و دیموكراسی كه‌ له ‌بڕیارو په‌یماننامه‌ نێوده‌وڵه‌تییه‌كاندا هاتوون.
به‌داخه‌وه‌ له‌م قۆناغه‌ ڤایرۆسی كۆرۆنا یه‌خه‌ی جیهانی گرتووه‌ به‌هه‌رێمی كوردستانیشه‌وه،‌ بۆیه‌ پێوسته‌ ده‌ست له‌ناو ده‌ست بین بۆ پاڵپشتی له‌سه‌رخستنی پلان و به‌رنامه‌ی حكومه‌تی هه‌رێمی كوردستان ده‌رباره‌ی هه‌ڵمه‌ته‌كانی به‌ره‌نگاربوونه‌وه‌ی ئه‌م ڤایرۆسه‌ له‌پێناو‌ پاراستنی هاووڵاتییان و سه‌لامه‌تیی ڕۆڵه‌كانمان، هیواده‌خوازین هه‌موو هاووڵاتییانی كوردستان و جیهان ئه‌م دۆخه‌ سه‌خته‌ به‌سه‌لامه‌تی تێپه‌ڕێنن‌. له‌هه‌مان كات هاووڵاتییان دڵنیاده‌كه‌ینه‌وه‌ له‌سه‌رخستن و جێبه‌جێكردنی پلانی درێژخایه‌نی لیژنه‌كه‌مان سه‌باره‌ت به‌داڕشتنی یاساو بڕیاری نوێ و له‌ به‌رده‌وامیمان بۆ پێداچوونه‌وه‌ به‌ یاسابه‌ركاره‌كان و چاودێریمان له‌ جێبه‌جێكردنیان.
لیژنه‌كه‌مان له‌پێناو زه‌مینه‌خۆشكردن بۆ به‌دیهێنانی ئامانجه‌كانی، كار ده‌كه‌ین له‌سه‌ر ئه‌م خاڵانه‌ی خواره‌وه‌ به‌ئه‌نجامدانی كۆبوونه‌وهو وۆرك شۆپی فراوان:
1 - كاركردن له‌پێناو یه‌كهه‌ڵوێستی و كاری هاوبه‌ش له‌گه‌ڵ داموده‌زگا په‌یوه‌ندیداره‌كان له ‌حكومه‌تی هه‌رێمی كوردستان به‌تایبه‌ت ئه‌نجوومه‌نی باڵای خانمان و هه‌ماهه‌نگیمان له‌گه‌ڵ ڕێكخراوه‌كانی ئافره‌تان و ژنان هه‌روه‌ها ڕێكخراوه‌كانی كۆمه‌ڵگه‌ی مه‌ده‌نی له ‌بواری ئافره‌تان و لایه‌نه‌ نێوده‌و‌ڵه‌تییه‌ په‌یوه‌ندیداره‌كان له‌ ناوه‌وه‌و ده‌ره‌وه‌ی هه‌رێمی كوردستان.
2 - به‌دواداچوون و جه‌ختكردن له‌سه‌ر بایه‌خدان به‌یه‌كه‌كانی یه‌كسانیی جێنده‌ری و جێبه‌جیكردنی به‌رنامه‌كانیان له ‌وه‌زاره‌ت و داموده‌زگاكانی حكومه‌تی هه‌رێمی كوردستان به‌تایبه‌تی له ‌وه‌زاره‌ته‌كانی په‌روه‌رده‌و خوێندنی باڵاو گرنگیپێدانی زیاتر به‌م بابه‌ته‌ له‌نێو پڕۆگرامه‌كانی خوێندن و توێژینه‌وه‌ زانستییه‌كاندا.
3 - ڕێزگرتن و پابه‌ندبوون به‌فره‌یی و ڕای جیاوازو رۆحی پێكه‌وه‌یی و یه‌كتر قبوڵكردن، هه‌روه‌ها جیاكردنه‌وه‌ی ڕای تایبه‌تیی هه‌ر مامۆستایه‌كی ئاینی یان هه‌ر چالاكوانێكی ژنان له‌ ڕای فه‌رمیی ئه‌و ڕێكخراو و یه‌كێتییانه‌ی كه‌ ئه‌ندامن تیایدا، بۆ خۆبه‌دوورگرتن‌ له‌ گشتاندنی هه‌ڵه‌ی تاكه‌كه‌س به‌سه‌ر هه‌موواندا.
4 – به ‌دوورگرتنی دۆزی ڕه‌وای ئافره‌تان له‌ ململانێى سیاسی و بیری ته‌سكی حزبایه‌تی و به‌رژه‌وه‌ندیی تاكه‌ كه‌سی.
5 - دووركه‌وتنه‌وه‌ له‌ ده‌سته‌واژه‌ی توندوتیژی و ناوزڕاندن و گوتاری هه‌ره‌شه‌ئامێز، جێگیركردنی چه‌مكه‌كانی ڕێزگرتن و پاراستنی شكۆی ئافره‌ت و سزادانی سه‌رپێچیكاران به‌پێى یاسا.
6 - ڕێكخستنی كۆبوونه‌وه‌ی هاوبه‌ش له‌گه‌ڵ لیژنه‌كانی كاروباری كۆمه‌ڵایه‌تی و مافی مرۆڤ، ئه‌وقاف و كاروباری ئاینی، لایه‌نه‌ په‌یوه‌ندیداره‌كان له ‌حكومه‌تی هه‌رێمی كوردستان و یه‌كێتیی زانایانی ئاینی ئیسلام و گشت ئاینه‌كانی هه‌رێمی كوردستان بۆ خزمه‌تی پرسی ئافره‌ت و خێزان و لێكتێگه‌یشتن له‌باره‌ی كێشه‌و پێشهاته‌كان به‌ لێكنزیكبوونه‌وه‌و كاری هاوبه‌ش بۆ چاره‌سه‌ركردن، به‌ڕێزگرترن له ‌به‌رپه‌سیاریه‌تیی ده‌سه‌ڵاته‌كان به‌پێی یاسا به‌ركاره‌كان له‌ هه‌رێمی كوردستان.
7 - هه‌وڵدان بۆ كاراكردنی ڕۆڵی داواكاری گشتی له‌ ڕوانینى كێشه‌كانی كۆمه‌ڵگاو قسه‌كردن و وه‌رگرتنی بڕیاری یاسایی له‌باره‌یانه‌وه‌.
8 - پابه‌ندبوونی وتاربێژان به‌ڕێنماییه‌كانی وه‌زاره‌تی ئه‌وقاف.
9 - پابه‌ندبوونی چالاكوانانی بواری ئافره‌تان به‌ په‌یڕه‌و و پڕۆگرامی ڕێكخراوه‌كانیان.
10 - جه‌ختكردنه‌وه‌ له‌ هاوكاری و كاری هاوبه‌ش له‌گه‌ڵ وه‌زاره‌تی ڕۆشنبیری له‌ بواری میدیا، به‌هه‌ماهه‌نگیكردن له‌ بۆنه‌ جیهانی و ناوخۆییه‌كانی تایبه‌ت به ‌مافی ئافره‌تان.
11 - ڕه‌چاوكردنی گرنگیی له‌پێشینه‌ی ‌سه‌قامگیریی سیاسی و ئاشتیی كۆمه‌ڵایه‌تی له‌ خستنه‌ڕووی هه‌ر كێشه‌و دۆزێكی ڕه‌وادا، به‌تایبه‌ت په‌یوه‌ند بێت به‌مافی ئافره‌ت.
له‌م یاده‌ پڕ له‌ شكۆیه‌دا ڕێزو پێزانیمان بۆ سه‌رجه‌م ئه‌و ئافره‌ت و ڕێكخراوانه‌ی له‌ كوردستان و جیهان تێكۆشاون له‌پێناو به‌دیهێنانی مافی یه‌كسانی و دادپه‌روه‌ری بۆ ئافره‌تان‌‌، به‌تایبه‌تی ئه‌وانه‌ی له‌ كوردستان كه‌ ڕۆڵی به‌رچاویان له‌ به‌ده‌ستهێنانی‌ ده‌ستكه‌وته‌كاندا هه‌بووه‌‌.
هه‌روه‌ها سوپاس و پێزانینمان بۆ ئه‌و پیاوانه‌ی كه‌ هاوشانی ئافره‌تان به‌ باوه‌ڕه‌وه‌ پاڵپشت بوون و كاریان كردووه‌ بۆ به‌دیهێنانی یه‌كسانیی جێنده‌ری و دادپه‌روه‌ری.
لیژنه‌ی داكۆكیكردن له‌مافی ئافره‌ت له‌ په‌رله‌مانى كوردستان
2020/3/7





ئەم هەواڵە 1354جار خوێندراوەتەوە
 
 
ڤیدیۆ گەلەری
باران بارین و لافاوی شاری دوبەی
شێرەکانیش یاری تۆپی پێ دەکەن
رووداوێكی سەیر پڵنگێك راوی سەگێك لەبەردەم دەرگای ماڵێك دەكات
ئاسكێك ده‌چێته‌ ناو سه‌رتاشخانه‌یه‌ك، ترس دروست ده‌كات
پشیله‌یه‌ك چۆن رێگری له‌ مارێك ده‌كات هه‌ڵبێت
 
 

پێناسە | گەلەری | ئەرشیف | پەیوەندی

پێبژاردنی پۆلیسی هاتووچۆ هەولێر | دهۆک | سلێمانی

هەموو مافەکان پارێزراون بۆ ئاژانسی هەواڵی زاگرۆس

Developed By: Omed Sherzad