English | عربی | Kurdî دواهەواڵ
ڕاستەوخۆ  
 
کورد و سیاسیێن سەیر ...!
2020-04-03 [11:33 AM]

نڤیسینا : غیاس خالد زێباری


مەرەم ژ رێکخستن و سازیێن سیاسی ، ڕێکخستنا جڤاکی و دابینکرن و پاراستنا بەرژەوەندێن وەڵاتی و وەڵاتیانە ، چ ماف و بەرژەوەندێن جڤاکی بن یان یێن نەتەوی و نشتیمانی ، لدیف سیاسەت و بەرنامێ رێکخستنا خوو . ل وەڵاتێن دیموکراسێ پارت و سازی و رێکخستنێن هەلگرێن بیر و بۆچوونێن جودا هەنە ، لێ ئارمانجا وان هەمیا پاراستن و دابینکرنا ماف و بەرژەوەندێن گشتی نە . لەوما تشتەکێ نۆرمالە هەڤڕکی ژی هەبن . لێ هەڤڕکی چەند دژوار بن و ناکۆکی سەرهەلبدەن ، دەمێ گەهشتە ئاستێ مەترسیێ لسەر جڤاکی و دەسهەڵاتێ ، پارت و کەسێن دەسهەڵاتدا و ئۆپۆزسیون ل خالا پاراستنا مافێن نەتەوی و نشتیمانی و نەهێلانا مەترسیێن لسەر وەڵاتی و وەڵاتیان دگەهنە ئێک و پێکڤەر بەهنگاریا مەترسیا دین ، چ مەترسیێن سیاسی و لەشکری بن ، یان یێن جڤاکی . هەڤڕکی و بیر و بۆوونێن سیاسی بۆ دەمێن کۆنجایی و نۆرمال هەلدگرن . هەر وەکی لدەمێ هەوڵا کۆدەتایا ۱٥ ێ تەموزا ساڵا ۲۰۱٦ ل وەڵاتێ تورکیا ، دەمێ مەترسی لسەر وەڵاتێ وان و سیستەمێ سیاسی دروست کری ، ئێکسەر بێ کۆمبوون و لێکتێگەهشتن ، پارتیێن ئۆپۆزیون کۆ هەڤڕکیێن دژوان لگەل پارتیا دەسهەڵاتدار هەبوون ، چوونە بەرەیێ پارتیا دەسهەڵاتدار و پێکڤە بەرهنگاریا وێ مەترسیێ بوون . ئەڤ چەندە ژی بووی ئەگەرێ هەڵوەشاندنا پیلانا وێ کۆدەتایێ و وەڵات ل مەترسیەکا دژوار دەرباز کر . پشتی ڕەوش نوورمال بوویە بڕەنگەکێ ساخلەم و زێدەتر ل جاران ، هەڤڕکیا دەسهەڵاتێ کرەڤە و وەکی ئۆپۆزسیون دەست ب کار و بەرنامێن خۆ کرەڤە . نهۆ ژی ڤایرۆسا کۆرۆنایێ کۆ بوویە پەتایەکا سەرتاسەری ل سەرانسەرێ جیهانێ ، پارت و رێکخستنێن ئۆپۆزسیون و دەسهەڵاتدار پێکڤە د ئێک سەنگەر دانە بۆ پاراستنا ساخلەمیا جڤاک و وەڵاتێ خۆ ، ئەڤەیە هەست کرن ب بەرپرسیاریێ و براستی ژی پێتڤی یە سیاسەتمەدار و سازی و رێکخستنێن سیاسی بڤی ئاوایی بن ، کۆ بەرژەوەندێن گشتی لسەرڤەی هەمی بەرژەوەندێن دیتر بن ، ئەڤ نمۆنە لزۆر وەڵاتان هەبوونە . پشتی گەهشتنا پەتایا ڤایرۆسا کۆرۆنایێ بۆ هەرێما کوردستانێ ، خۆشبەختانە حکومەتا هەرێمێ درێکا سازیێن ساخلەمیێ و ئێمناهیێ را زوو هەست ب بەرپرسیاریا جڤاکی کر و ڕێکارێن تۆند و ئەرێنی کرتنە بەر و بەرژەوەند و ساخلەمیا جڤاکی لسەر هەمی بەرژەوەندێن دی فەرتر دیت . ئەڤ ڕێکار و بریار و ڕێنمایی یە بوونە فاکتەرێن پاراستنا ژیانا خەلکێ کوردستانێ و سڤک کرنا کارگەریا ڤێ پەتایێ و کوردستان ل پڕانیا وەڵاتێن مەزن و خودان شیانێن ماددی و سیستەمێن ساخلەمی باشترە ، کۆ جیهان و رێکخراوا ساخلەمیا جیهانی ڤێ دیدەڤانیێ بۆ کوردستانێ ددەن . ئەڤەژی بۆ مە وەکی کورد جهێ شانازیێ یە کۆ خودان حکومەت و دەسهەڵاتەکا بڤی ڕەنگی نە ، هەروەسا جهێ شانازیێ یە پڕانیا خەلکێ کوردستانێ لدیف بانگەوازیا حکومەتا خۆ هاتن و ب ڕێژەیەکا بەرچاڤ بریار و رێکار و ڕێنمایی یێن حکومەتێ و سازیێن ساخلەمی بجهــ ئینان . لێ مخابن هندەک بەرپرس و سیاسیێن بازرگان ل هەرێما کوردستانێ ، کۆ هندەک ژوان بەشەکێ حکومەتێ و دەسهەڵاتێ نە ، ئەڤ ڕەوشا دژوار یا ئابووری و جڤاکی و ساخلەمی ل هەرێما کوردستانێ ب دەلیڤە زانی بۆ بەڵاڤکرنا پڕ و پاکندێن بێ بنەما دژی حکومەتا هەرێما کوردستانێ و هەول ددەن خەلک رێکار و بریارێن حکومەتێ بن پێ بکەن ، ژلایەکێ دیتر بازرگانیێ و قاچاغچیێ ب مرۆڤان دکەن درێکا ئینانا کەسێن کۆمان لێکری ل دەرڤەی وەڵاتی . ئەڤ هەولێن وان ژی ژبۆی بەرژەوەندێن ئابووری و دارایی نە و دبنە ئەگەرێن ژناڤبرنا گیانێ وەڵاتیێن خۆ و بەڵاڤکرنا ڤێ پەتایا دژوار دناڤ جڤاکێ کوردستانێ دا . ژلایەکێ دیتر دەروونێ خەلکێ کوردستانێ زێدەتر ئاڵۆز دکەن ، ب بەڵاڤکرنا پڕوپاکندێن گرانیێ و کێمکرنا مۆچێ فەرمانەران و بڕەنگەکێ دۆر ل ڕەوشتێن نەتەوایەتیێ و مرۆڤایەتیێ لگەل هندەک دەسهەڵاتێن ئیراقێ دووبارە هەول ددەنەڤە بۆ بڕینا بۆدجێ هەرێمێ و مۆچە خۆرێن کوردستانێ . ئەڤە لدەمەکی دایە کۆ ژبەر کاریگەریا ڤایرۆسا کۆرۆنایێ رەوشا ئابووریا جیهانێ کەفتیە دمەترسیێ دا ، ژبلی داکەفتنا بهایێ نەفتێ ، کۆ کارگەریەکا راستەوخۆ لسەر ئابوورێ هەرێما کوردستانێ هەیە . رەفتار و سەرەدەریێن ڤان کەس و لایەنان یێن نەبەرپرسیاری بەرامبەر ڤێ ڕەوشێ و حکومەتا هەرێمێ جهێ مەترسیێ نە و یێن دوژمنکای نە چۆنکێ ئەم دبینین ژبەر ڤێ پەتایێ ژیانا سەدان هزار کەسان ژناڤ چوویە . ژبووی پاراستنا ژیانا خەلکێ کوردستانێ پێتڤی یە هەمی کەس و ئالیێن سیاسی و جڤاکی ، دەست ل هەڤرکیێن نەبەرپرسیای و دوژمنکارانە بەردەن و هەڤکاریا حکومەتا هەرێما کوردستانێ بکەن بۆ سەرکەفتنا گەلێ کوردە بسەر ڤایرۆسا کۆرۆنایێ کۆ مەزنترین دوژمنێ ڤی سەردەمێ مرۆڤایەتیێ یە و پاراستنا ژین و ساخلەمیا خەلکێ کوردستانێ. دبێژینە وان ئەگەر هۆن بەرپرس بن دێ ب ئەرکێ بەرپرسیاریا خۆ یا جڤاکێ ڕابن ، بۆ پاراستنا خەلکێ کوردستانێ ، نەک بەڵاڤکرنا پروپاکندێن بێ بنەما بۆ ترساندنا خەلکی و پەیگیری نەکرنێ ب ڕێنما و رێکارێن حکومەتێ بۆ پاراستنا ژیانا خەلکی و دەربازکرنا ڤێ ڕەوشێ ب کێمترین زیان . ئەڤ گاڤ و رەفتارێن وە چاڤ پێڕانەبوونە بسەرکەفتنێن حکومەتا هەرێما کوردستانێ ب سەرۆکاتیا مەسرۆر بارزانی ، ئەگەر وە ئەڤ دەسهەڵاتە نەڤێت ، بلا وە ساخلەمیا گەل و وەڵاتێ خۆ بڤێت و پەندا ل وەڵاتێن جیهانێ وەر بگرن .





ئەم هەواڵە 1114جار خوێندراوەتەوە
 
 
ڤیدیۆ گەلەری
باران بارین و لافاوی شاری دوبەی
شێرەکانیش یاری تۆپی پێ دەکەن
رووداوێكی سەیر پڵنگێك راوی سەگێك لەبەردەم دەرگای ماڵێك دەكات
ئاسكێك ده‌چێته‌ ناو سه‌رتاشخانه‌یه‌ك، ترس دروست ده‌كات
پشیله‌یه‌ك چۆن رێگری له‌ مارێك ده‌كات هه‌ڵبێت
 
 

پێناسە | گەلەری | ئەرشیف | پەیوەندی

پێبژاردنی پۆلیسی هاتووچۆ هەولێر | دهۆک | سلێمانی

هەموو مافەکان پارێزراون بۆ ئاژانسی هەواڵی زاگرۆس

Developed By: Omed Sherzad