English | عربی | Kurdî دواهەواڵ
ڕاستەوخۆ  
 
ڕاگەیەندراوی وەزارەتی کاروباری شەھیدان و ئەنفالکراوان لە یادی ٤٦ساڵەی بۆردومانکردنی قەلادزێ کەسوکاری سەربەرزی شەھیدان
2020-04-24 [01:28 AM]

ZNA_ هەولێر



خەڵکی خۆڕاگری قەڵادزێ و پشدەر و بتوێن.
٤٦ساڵ لەمه‌وبه‌ر و له‌زنجیره‌ى تاوانه‌كانى رژێمى به‌عسى رووخاو دژ به‌گه‌له‌كه‌مان و به‌هۆى ترسى دوژمن له‌ئاوێته‌بوونى چه‌ك و قه‌ڵه‌مى به‌رگرى و یه‌كڕیزیى پێشمه‌رگه ‌و مامۆستا و قوتابی و خوێندکار و خوێنده‌وارانى كوردستان و كۆبوونه‌وه‌یان له‌یه‌ك سه‌نگه‌رى به‌رگرى و تێكۆشان،
ڕۆژى ٢٤ / ٤ / ۱۹۷٤ شاری قەڵادزێ لەلایەن رژێمی لەناوچووی بەعسەوە بۆردمانکرا و لەئەنجامدا ١٢٣ هاوڵاتی سڤیل و فەرمانبەر و خوێندکار و مامۆستاى زانکۆی سلێمانی کە ئەو کات لە قەڵادزێ بوو، شەھیدبوون و زیاتر لە ٤٠٠ هاوڵاتی دیکەش برینداربوون، 
بەهۆی چڕی بۆردومانەکانەوە بەشێکی زۆری شاری قەلادزێ بەتەواوی وێرانکرا و ژمارەیەک لە دانیشتوانەکەی ئاوارەبوون. 
ئەم کارە دڕندانەیەی ڕژێمی بەعس زامێکی ساڕێژنەکراوی لە دڵی دانیشتوانی ئەو شارە و هەموو کوردستاندا دروستکرد كه‌وه‌ك كاره‌ساتێكى ره‌ش ساڵانه‌ یاد ده‌كرایه‌وه‌.
 ئەوەبوو لە هه‌شته‌مین ساڵیادی ئەو مەرگەساتەدا و رۆژى  ٢٤ / ٤ / ۱۹۸۲ بۆ ڕێزگرتن لە خوێنی شەهیدان و قوربانیانی بۆردومانی قەڵادزێ خەڵکی قارەمانی ئەو شارە خۆپیشاندانێکی جەماوەرییان بۆ شەرمەزارکردنی ڕژێمی بەعس ئەنجامدا کە بەداخەوە لەلایەن دارودەستە و هێزە چەکدارەکانی رژێمەوە بە گوللە وەڵامیان درایەوە و چەندین هاوڵاتی شەهید و بریندارکران و چەندان کەسیشیان زیندانی کران . 
رژێمی لەناوچووی بەعس بەم تاوانانەوە نەوەستا و لە درێژەی زنجیرە پیلانەکانی جینۆسایدکردنی گەلی کوردستاندا هاوشێوەی زۆرینەی ناوچەکانی تری کوردستان ساڵی ١٩٨٩ بۆ جاری سێیەم پەلاماری ئەم شارەی دایەوە و خەڵکەکەی راگواستن بۆ ئۆردوگا زۆرەملێکانی ( خەبات و دارەتوو و کەورگۆسک و بازیان) و ئۆردوگاکانی تر و دوور لە هەموو بەهایەکی مرۆڤایەتی شاری قەڵادزێی وێرانکرد و ھیج ئاسەوارێکی ئاوەدانی و ژیانی تێدا نەھێشت.
به‌ڵام لەپاش ئازادکردنی کوردستان، حکومەتی هەرێمی کوردستان بەردەوام لە خەمی سڕینەوەی کاریگەرییە ئابووری و دەروونی و کۆمەڵایەتی و ژینگەیی و فەرهەنگییەکانی ئەو کارەساتە نەخوازراوانەبووە کە دەیان ساڵ لەسەر دەستی ڕژێمە ستەمکارەکان لە دژی گەلی کوردستان ئەنجامدراون.
هەر زوو قەڵادزێی سەربەرز و نەمر ئاوەدانکرایەوە و خەڵکەکەی گەڕانەوە زێدی خۆیان و لە جێگای زانکۆیەیەکی بریندار دەیان زانکۆی سەردەمیانەى حكومى و ئەهلی لە كورستان بنیادنران.
 هەر لەو سۆنگەیەوە بۆ بەرزڕاگرتنی یادی شەهیدان و قوربانیانی بۆردومانی قەڵادزێ و زانکۆی سلێمانی، ئەنجومەنی وەزیران لەبەرواری ٤ / ۳ / ۲٠۱۳ بە بڕیاری (۲۲٦۲) ڕۆژی ۲٤ / ٤ی وەک ڕۆژی شەهیدی زانکۆ دیاریکرد و داوای لە سەرجەم زانکۆ و پەیمانگاکان کرد ساڵانه‌ له‌و روژه‌دا به‌چالاکی ڕۆشنبیری و زانستی یادی شەهیدان و قوربانیانی زانست و قه‌له‌م به‌رز رابگرن. 

کەسوکاری سەربەرزی شەھیدان لەکاتێکدا یادی شەهیدان و قوربانیانی بۆردومانی قەڵادزێ بەرزڕادەگرین بەداخەوە بۆ ئەمساڵ بەهۆی ڕێکارەکانی خۆپاراستن لە ڤایرۆسی کۆرۆنا نەتوانرا وەک ساڵانی پێشوو ئەم یادە لە شاری قەڵادزێ و زانکۆ و پەیمانگاکان بکرێتەوە.
لەم بۆنەیەدا بەڵێنی وەفاداری و زیاتر خزمەتکردنی کەس وکاری شەھیدان دوپاتدەکەینەوە و بەجینۆساید ناساندنی ئەو تاوانانەی کە دەرحەق بە گەلەکەمان کراوە لە پێشینەی هەوڵەکانماندایە 
تائەوکاتەی کە حکومەتی عێراق لە چوارچێوەی دەستووردا قەرەبووی زیانلێکەوتووانی دەستی ڕژێمی پێشوو دەکاتەوە . 

سڵاو بۆ قارەمانیەتی خەڵکی قەلادزێ و پشدەر و بیتوێن.
 درود بۆ رۆحی شەھیدان.
 سڵاو بۆ کەس و کارە سەربەرزەکانیان.

وەزارەتی کاروباری شەھیدان و ئەنفالکراوان
 ۲٤ / ٤ / ۲٠۲٠





ئەم هەواڵە 2596جار خوێندراوەتەوە
 
 
ڤیدیۆ گەلەری
باران بارین و لافاوی شاری دوبەی
شێرەکانیش یاری تۆپی پێ دەکەن
رووداوێكی سەیر پڵنگێك راوی سەگێك لەبەردەم دەرگای ماڵێك دەكات
ئاسكێك ده‌چێته‌ ناو سه‌رتاشخانه‌یه‌ك، ترس دروست ده‌كات
پشیله‌یه‌ك چۆن رێگری له‌ مارێك ده‌كات هه‌ڵبێت
 
 

پێناسە | گەلەری | ئەرشیف | پەیوەندی

پێبژاردنی پۆلیسی هاتووچۆ هەولێر | دهۆک | سلێمانی

هەموو مافەکان پارێزراون بۆ ئاژانسی هەواڵی زاگرۆس

Developed By: Omed Sherzad