English | عربی | Kurdî دواهەواڵ
ڕاستەوخۆ  
 
دەست بەدابەشکردنی مووچە دەکرێت 
2020-06-24 [02:45 AM]

ZNA- ھەولێر



پارێزگاری سلێمانی راگەیێندراوێکی بڵاوکردەوە و رایگەیاند لە سبەینێ پێنجشەممەوە ھاتووچۆی ئۆتۆمبێل قەدەخەیە تاوەکو ١ی تەممووزی مانگی داھاتوو.

 
لە راگەیێندراوەکەدا ھەڤاڵ ئەبوبەکر، پارێزگاری سلێمانی ئاماژەی بەوە داوە، ھاتووچۆی ھاونیشتمانییان بە پیادە بۆ ناو بازاڕ ئاساییە، بەڵام بە مەرجی پەیڕەوکردنی رێنماییەکانی خۆپارێزی.

 

بڕیارەکان بە راوێژ لەگەڵ رێبەر ئەحمەد، وەزیری ناوخۆی حکومەتی ھەرێمی کوردستاندا دراون؛ پارێزگاری سلێمانی سەبارەت بە دابەشکردنی مووچە ئاشکرای کرد، لە رۆژانی ئایندەدا دابەشکردنی مووچە دەستپێدەکات و لەکاتی پێویستدا فەرمانگە، خەزێنە و بانکەکانی سەر بە وەزارەتی دارایی بەپێی رێکار و رێنماییەکانی وەزارەتی تەندروستی دەوامی خۆیان دەکەن.
 
دەقی راگەیێندراوەکە:
 
بۆ/ ھەموو یەکە کارگێڕیی و فەرمانگە پەیوەندیدارەکانی سنوری پارێزگای سلێمانی
 
بابەت/ گشتاندن 
 
ئەمڕۆ (٢٤/ ٦/ ٢٠٢٠)، لیژنەی باڵای ئۆپراسیۆنەکانی پارێزگای سلێمانی بۆ بەرەنگاربوونەوەی کۆرۆنا دوای ڕاوێژو ڕاگۆڕینەوە لەگەڵ بەڕێز وەزیری ناوخۆی حکومەتی ھەرێمی کوردستاندا تایبەت بە ڕێکارەکانی بەرەنگاربوونەوەی کۆرۆنا، بڕیاریدا بە:
 
١-جەختکردنەوە لەسەر جێبەجێکردن و بەدواداچوونی تەواوی ئەو بڕیارانەی لە کۆبوونەوەی ڕۆژی (٢٠/ ٦/ ٢٠٢٠)ی لیژنەی باڵای ئۆپراسیۆنەکانی پارێزگای سلێمانی بۆ بەرەنگاربوونەوەی کۆرۆنادا دراون و بە نووسراوی ژمارە (١٢٥) لە (٢٠/ ٦/ ٢٠٢٠)ی پارێزگای سلێمانی/ نووسینگەی تایبەتدا، گشتاندنیان بۆ ھەموو یەکە کارگێڕیی و فەرمانگا پەیوەندیدارەکان پێ کراوە.
 
٢-لە ڕۆژی (٢٥/ ٦/ ٢٠٢٠)وە، ھاتووچۆی ئۆتۆمبێل لە سەنتەری (ناوبازاڕی) شاری سلێمانیدا ڕادەگیرێت و ھاووڵاتیان بەپێی ڕێنماییە خۆپارێزیی و تەندروستییەکان تەنھا بە پێ دەتوانن ھاتووچۆو بازاڕ بکەن.
 
٣-دابەشکردنی موچە لە ڕۆژانی ئایندەدا دەستپێدەکات و لەکاتی پێویستدا فەرمانگاو خەزێنەو بانکەکانی سەر بە وەزارەتی دارایی دەوامی خۆیان دەکەن بەپێی ڕێکارو ڕێنماییە تەندروستییەکان و، فەرمانگەکان بەپێی لیستی موچە بەھەمان ڕێکارو ڕێنمایی تەندروستیی لەو ڕۆژانەی بۆیان دیاریدەکرێت موچە دابەش دەکەن.
 
٤-پێویستە ھەموو یەکە کارگێڕییەکانی سنوری پارێزگای سلێمانی ھەمان ئەو بڕیارو ڕێکارو ڕێنماییانە جێبەجێ بکەن، کە لەم نوسراوەو نوسراوی ژمارە (١٢٥)ی ڕۆژی (٢٠/ ٦/ ٢٠٢٠)ی پارێزگای سلێمانیدا دیاریکراون و بەپێی تایبەتمەندیی سنورە کارگێڕییەکانیشیان دەسەڵاتی تەواویان ھەیە ڕێکاری تر بۆ باشتر بەرەنگاربوونەوەی کۆرۆنا بگرنەبەر.
 
د. ھەڤاڵ ئەبوبەکر
پارێزگاری سلێمانی
سەرۆکی لیژنەی باڵای ئۆپراسیۆنەکانی پارێزگای سلێمانی بۆ بەرەنگاربوونەوەی کۆرۆنا
٢٤/ ٦/ ٢٠٢٠





ئەم هەواڵە 7216جار خوێندراوەتەوە
 
 
ڤیدیۆ گەلەری
بەھرەیەکی سەرنج راکێشە
باران بارین و لافاوی شاری دوبەی
شێرەکانیش یاری تۆپی پێ دەکەن
رووداوێكی سەیر پڵنگێك راوی سەگێك لەبەردەم دەرگای ماڵێك دەكات
ئاسكێك ده‌چێته‌ ناو سه‌رتاشخانه‌یه‌ك، ترس دروست ده‌كات
 
 

پێناسە | گەلەری | ئەرشیف | پەیوەندی

پێبژاردنی پۆلیسی هاتووچۆ هەولێر | دهۆک | سلێمانی

هەموو مافەکان پارێزراون بۆ ئاژانسی هەواڵی زاگرۆس

Developed By: Omed Sherzad