English | عربی | Kurdî دواهەواڵ
ڕاستەوخۆ  
 
سەرۆکی فەرەنسا بۆ یه‌كه‌م جار دێته‌ بەغدا
2020-08-31 [12:26 PM]

ZNA - هه‌ولێر


 

ئاژانسی فرانس پرێس رایگه‌یاند، ئیمانوێل ماکرۆن، سەرۆکی فەرەنسا رۆژی چوارشەممە بۆ یەکەمجار سەردانی بەغدا دەکات، وتیشی، ئه‌و سەردانە رۆژییەی ماکرۆن بۆ بەغدا بۆ ئەوەیە پاڵپشتیی وڵاتەکەی بۆ عێراق دووپاتبکاتەوە.

بەپێی سەرچاوەکانی ئاژانسی فرانس پرێس، ماکرۆن لە بەغدا لەگەڵ سەرۆک وەزیران، سەرۆک کۆمار و ژمارەیەکی زۆری بەرپرسانی سیاسیی عێراق کۆدەبێتەوە.

هەرچەندە دوو بەرپرسی دیکەی عێراق سەردانەکەیان پشتڕاست کردووەتەوە، بەڵام هێشتا کۆشکی سەرۆکایەتیی فەرەنسا (ئێلیزێ)، هیچی لەمبارەیەوە بڵاونەکردووەتەوە.

ئامانجی سەردانەکەی ئیمانوێل ماکرۆن بەپێی سەرچاوە عێراقییەکان "فۆکەس خستنەسەر بابەتی سەروەریی عێراقە"، بۆ ئەوەی بەغدا رێڕەوێکی سەربەخۆ بۆخۆی دیاری بکات، دوور لە واشنتن و تاران، کە هەردووکیان "دووژمنی یەکتر" و گەورە هاوپەیمانی عێراقن.

پەیامی ماکرۆن، هەمان پەیامی گەورە دیپلۆماتکاری فەرەنسی جان ئیڤ لودریان، وەزیری دەرەوەی فەرەنسا دەبێت، کاتێک مانگی تەمموز لە سەردانێکدا لە بەغدا گوتی "دەبێت بەغدا خۆی لەئاڵۆزییە هەرێمییەکان بەدوور بگرێت".

ژمارەیەکی زۆر قەیران ئەمساڵ رەوشی عێراقیان شڵەژاندووە، یەکەمیشیان لە سەرەتای ئەمساڵ 3-1-2020 بوو، کاتێک فڕۆکەیەکی بێفڕۆکەوانی ئەمەریکی قاسم سولەیمانی، فەرماندەی فەیلەقی قودسی سوپای پاسداران و ئەبو مەهدی موهەندیس، فەرماندەی حەشدی شەعبی لە بەغدا کردە ئامانج.

هەروەها بەردەوام ئەو بنکانەی هێزەکانی هاوپەیمانان و بەتایبەتی ئەوانەی هێزەکانی ئەمەریکایان لێیە لە عێراق، مووشەکیان ئاراستە دەکرێت و گرووپە چەکدارە شیعەکانی سەر بە ئێران، بە ئەنجامدانی ئەو هێرشانە تۆمەتبار دەکرێن.

جگە لەوانە، دابەزینی نرخی نەوت خراپترین کاریگەریی لەسەر عێراقی دووەم بەرهەمهێنەری نەوتی ئۆپێک هەبووە. ڤایرۆسی کۆرۆنا و رێکارەکانی بەرەنگاربوونەوەی ئەو پەتا جیهانییەش، گورزێکی دیکەیان لە ئابوورییە ناسەقامگیرەکەی عێراق داوە.

 





ئەم هەواڵە 3220جار خوێندراوەتەوە
 
 
ڤیدیۆ گەلەری
شه‌قامێك رۆده‌چێت و دوو ژن ده‌خوات
بەھرەیەکی سەرنج راکێشە
باران بارین و لافاوی شاری دوبەی
شێرەکانیش یاری تۆپی پێ دەکەن
رووداوێكی سەیر پڵنگێك راوی سەگێك لەبەردەم دەرگای ماڵێك دەكات
 
 

پێناسە | گەلەری | ئەرشیف | پەیوەندی

پێبژاردنی پۆلیسی هاتووچۆ هەولێر | دهۆک | سلێمانی

هەموو مافەکان پارێزراون بۆ ئاژانسی هەواڵی زاگرۆس

Developed By: Omed Sherzad