 |
|
|||
ZNA – هەولێر باڵیۆزی ئەمەریکا بەغدای جێهێشت، ئەمەش بەهۆی بەردەوامی هێرشە مووشەکییەکانەوەیە، لەلایەكی ترەوەش گرووپە چەكدارەكانی عێراقیش ھەڕەشە لە ھێزەكانی ئەمەریكا دەكەن. بەهۆی بەردەوامی هێرشە مووشەکییەكانی سەر ناوچەی سەوز، ماتیۆ تولەر باڵیۆزی ئەمەریکا شاری بەغدای جێهێشتووە و ئێستا لە کونسڵخانەی ئەمەریکا لە هەولێرە. لە ئێستادا دەنگۆی داخستنی باڵیۆزخانەکەش هەیە، بەڵام تا ئێستا هیچ لێدوانێکی فەرمی لەوبارەوە نەدراوە، چەند رۆژێك لەمەوبەر وەزیری دەرەوەی ئەمەریكا سەركردە عێراقیەكانی ئاگادار كردەوە لە داخستنی كونسوڵخانەی ئەمەریكا لەعێراق. رۆژنامەی واشنتن پۆست بڵاویکردووەتەوە، بەهۆی زیادبوونی هێرشی سەر هێزەکانی ئەمەریکا، ئەمجارەیان واشنتن هەڕەشەی داخستنی باڵیۆزخانەکەی لە بەغدا دەکات و رەنگە ماوەی داخستنەکەی 90 رۆژ بخایەنێت.
رۆژنامەی واشنتن پۆست لەزاری بەرپرسێکی باڵای نووسینگەی مستەفا کازمی ئاشكرای كردووە، کازمی لەڕێگەی چەند وڵاتێکی ئەوروپییەوە خەریکی لۆبی کردنە بۆ پاشگەزکردنەوەی ئەمەریکا لە بڕیارەکەی، بەڵام سەرەڕای کشانەوەی ئەمەریکا، سێ وڵاتی ئەوروپی بەڵێنی هێشتنەوەی نێردەکانیان لە بەغدا داوە.
ئەمە لەكاتێكدایە چەند گرووپێكی چەكداری لە عێراق ھەڕەشە لە ھێزەكانی ئەمەریكا دەكەن، لە چەند رۆژی رابردوودا ئەبو عەلی عەسکەری، بەرپرسی ئەمنی کەتائیبی حزبوڵڵای عێراق، لە وەڵامی لێدوانێکی مایک پۆمپێیۆ وەزیری دەرەوەی ئەمەریکا، رایگەیاند "لووتی سەربازانی ئەمەریکا، لە خاکی عێراقدا دەچەقێنین". لەلایەكی دیكە ئه‌كره‌م كه‌عبی، سكرتێری گشتیی بزووتنه‌وه‌ی نوجەبا (النجباء)ی سه‌ر به میلیشیاكانی حه‌شدی شه‌عبی رایگه‌یاند "ئێمه هێشتا چاوه‌ڕوانی هه‌ڵوێستی ره‌سمی سه‌رجه‌م هێزه‌كان ده‌كه‌ین، سه‌باره‌ت به بوونی مۆڵگه‌یه‌كی سه‌ربازی پێشێلكاری سه‌روه‌ری عێراق، كه ئه‌مه‌ریكا به ناوی باڵیۆزخانه له به‌غدا دایمه‌زراندووه، بۆ ئه‌وه‌ی وێرانكاری و خراپه‌كاری له عێراق بڵاوبكاته‌وه". هاوکات بەگوێرەی هەواڵی ژمارەیەک دەزگای میدیای عەرەبی، 15 وڵاتی دیکەش، نیازی داخستنی باڵیۆزخانەکانیان لە بەغدا هەیە. ئەم هەواڵە 2119جار خوێندراوەتەوە |
پێناسە | گەلەری | ئەرشیف | پەیوەندی
پێبژاردنی پۆلیسی هاتووچۆ هەولێر | دهۆک | سلێمانی
هەموو مافەکان پارێزراون بۆ ئاژانسی هەواڵی زاگرۆس
Developed By: Omed Sherzad