English | عربی | Kurdî دواهەواڵ
ڕاستەوخۆ  
 
سه‌رۆكى هه‌رێمى كوردستان له‌گه‌ڵ باڵيۆزى ڤاتيكان كۆبووه‌وه‌
2021-04-28 [12:09 PM]

ZNA- ھەولێر


به‌يانيى ئه‌مڕۆ چوارشه‌ممه‌ 2021/4/28 به‌ڕێز نێچيرڤان بارزانى، سه‌رۆكى هه‌رێمى كوردستان پێشوازى له‌ به‌ڕێز ميتيا لێسكۆڤار باڵيۆزى ڤاتيكان له‌ عێراق كرد كه‌ دواى ده‌ستبه‌كاربوونى، جارى يه‌كه‌مه‌ به‌ فه‌رمى سه‌ردانى هه‌رێمى كوردستان ده‌كات.


سه‌رۆك نێچيرڤان بارزانى وێڕاى به‌خێرهێنان و پيرۆزباييى ده‌ستبه‌كاربوونى، هيواى سه‌ركه‌وتنى بۆ خواست و دووپاتى كرده‌وه‌ كه‌ هه‌رێمى كوردستان به‌ بايه‌خه‌وه‌ له‌ په‌يوه‌ندييه‌كانى له‌گه‌ڵ ڤاتيكان ده‌ڕوانێت، هه‌روه‌ها سه‌ردانى قه‌داسه‌تى پاپاى بۆ عێراق و هه‌رێمى كوردستان به‌ ڕووداوێكى مێژوويى له‌ قه‌ڵه‌م دا و هيواى خواست ببێته‌ هانده‌رى گه‌ڕانه‌وه‌ى مه‌سيحييه‌كان بۆ وڵاته‌كه‌يان كه‌ به‌هۆى شه‌ڕ و توندوتيژييه‌كانى ساڵانى ڕابردووه‌وه‌، ژماره‌يه‌كى زۆريان عێراقيان جێهێشتووه‌.


سه‌رۆك نێچيرڤان بارزانى كردنه‌وه‌ى زانكۆى كاتۆليكى له‌ عه‌نكاوه‌ به‌ هه‌نگاوێكى گرنگ و ئه‌رێنى له‌ قه‌ڵه‌م دا و جه‌ختى كرده‌وه‌ كه‌ په‌روه‌رده‌ بناغه‌ى سه‌ره‌كيى كۆمه‌ڵگه‌يه‌كى باش و پێشكه‌وتووه‌، بۆيه‌ ده‌بێ ئه‌وپه‌ڕى گرنگى به‌ كواليتيى خوێندن و كولتوورى پێكه‌وه‌ژ‌يان و لێبورده‌يى بدرێت و زانكۆكان تۆڕى فراوانى په‌يوه‌ندى له‌گه‌ڵ زانكۆكانى جيهان دروست بكه‌ن بۆ ئه‌وى زۆرترين سوود له‌ ئه‌زموونه‌ سه‌ركه‌وتووه‌كان ببينن و ببنه‌ پردى په‌يوه‌ندى و پته‌وكردنى پێكه‌وه‌ژيان و لێبورده‌يى و يه‌كترقبووڵكردن.


به‌ڕێز باڵۆزى ڤاتيكان له‌ عێراق سوپاس و پێزانينى ڤاتيكانى بۆ هه‌رێمى كوردستان دووپات كرده‌وه‌ كه‌ له‌گه‌ڵ ئاواره‌كانى ديكه‌ى عێراق ده‌رگاى به‌ڕووى ئاواره‌ مه‌سيحييه‌كاندا كرده‌وه‌ و داڵده‌ى دان، ئاماژه‌ى به‌وه‌ش دا كه‌ له‌ ڤاتيكان به‌ بايه‌خ و ڕێز و ستايشێكى زۆره‌وه‌ له‌م هه‌ڵوێسته‌ و له‌ كولتوورى پێكه‌وه‌ژيان و لێبورده‌يى و يه‌كترقبووڵكردن له‌ هه‌رێمى كوردستان ده‌ڕوانرێت و سوپاس و ده‌ستخۆشى له‌ سه‌رۆك نێچيرڤان بارزانى و به‌رپرسان و گه‌لى كوردستان كرد بۆ ئه‌و پێشوازييه‌ گه‌رمه‌ى له‌ هه‌رێمى كوردستان له‌ قه‌داسه‌تى پاپا كرا.


سه‌رۆك نێچيرڤان بارزانى ئاماژه‌ى به‌ ڕۆڵى گرنگى مه‌سيحييه‌كانى هه‌رێمى كوردستان و عێراقى كرد و ڕوونى كرده‌وه‌ كه‌ مه‌سيحييه‌كان پێكهاته‌يه‌كى ڕه‌سه‌ن و سه‌ره‌كيى هه‌رێمى كوردستانن و ڕۆڵێكى به‌رچاو له‌ خزمه‌تكردن و بنياتنان و به‌روپێشبردنى هه‌رێمى كوردستان و پته‌وكردنى كولتوورى پێكه‌وه‌ژياندا ده‌گێڕن. دووپاتيشى كرده‌وه‌ بۆ زامنكردنى مافى هه‌موو پێكهاته‌كانى كوردستان، له‌ ده‌ستوورى هه‌رێمى كوردستاندا كه‌ خه‌ريكه‌ ئاماده‌ ده‌كرێت هه‌موو مافه‌كانى مه‌سيحييه‌كان و ته‌واوى پێكهاته‌ ئايينى و نه‌ته‌وه‌يييه‌كان ده‌پارێزرێت.


دۆخى ده‌شتى نه‌ينه‌وا، ڕه‌وشى ئاواره‌ و په‌نابه‌ران له‌ هه‌رێمى كوردستان، پێشهاته‌كانى په‌تاى كۆرۆنا و هه‌ڵمه‌تى كوتان، په‌يوه‌ندييه‌كانى هه‌ولێر ـ به‌غدا، هه‌ڵبژاردن و دۆخى عێراق به‌گشتى و ته‌حه‌دييه‌كانى به‌رده‌مى، چه‌ند ته‌وه‌رێكى ديكه‌ى كۆبوونه‌وه‌كه‌ بوون كه‌ شاندێكى كه‌نيسه‌ تيايدا به‌شدار بوون.





ئەم هەواڵە 247جار خوێندراوەتەوە
 
 
ڤیدیۆ گەلەری
لە شەقامێکی قەرەباڵغ منداڵێک لە سندوقی ئۆتۆمبێل دەکەوێتە خوارەوە
لێدانی سەدە ، تا ئێستا لێدانی وانەبووە
شه‌قامێك رۆده‌چێت و دوو ژن ده‌خوات
بەھرەیەکی سەرنج راکێشە
باران بارین و لافاوی شاری دوبەی
 
 

پێناسە | گەلەری | ئەرشیف | پەیوەندی

پێبژاردنی پۆلیسی هاتووچۆ هەولێر | دهۆک | سلێمانی

هەموو مافەکان پارێزراون بۆ ئاژانسی هەواڵی زاگرۆس

Developed By: Omed Sherzad