English | عربی | Kurdî دواهەواڵ
ڕاستەوخۆ  
 
هەواڵگری ئیسرائیل: بەهیچ شێوەیەك ڕێگەنادەین ئێران دەستی بەچەكی ئەتۆمی بگات
2021-05-01 [11:09 AM]

ZNA – هەولێر


لەگەڵ دەستپێکردنەوەی گفتوگۆكانی ئێران و وڵاتانی 4+1 لە ڤییەننای پایتەختی  نەمسا، بەرپرسە ئیسرائیلییەکان گفتوگۆکانیان لەگەڵ هاوتا ئەمریکییەکان چڕتر کردووەتەوە و هەموو هەوڵێكی تەلئەبیب ئەوەیە گۆڕانکارییەک لەو رێککەوتنەدا بکرێت لە بەرژەوەندیی ئیسرائیلدا بێت.

نیگەرانی ئیسرائیلییەکان لە گەشتە بەردەوامەکانی شاندەکانیان لە دەزگای هەواڵگری و ئەنجوومەنی ئاسایشی نیشتمانیی ئەو وڵاتە بۆ واشنتن و کۆبوونەوەیان لەگەڵ بەرپرسانی ئیدارەی بایدن روون دەبێتەوە کە دوایینیان کۆبوونەوەی رۆژی پێنجشەممەی رابردوو بوو لەنێوان ئەنتۆنی بلینکن، وەزیری دەرەوەی ئەمریکا لەگەڵ یووسی کۆهین، سەرۆکی دەزگای هەواڵگریی گشتی ئیسرائیل

کۆبوونەوەکە دوو كاتژمێری خایاند و نێد پرایس، گوتەبێژی وەزارەتی دەرەوەی ئەمریکا باسی لە وردەکاریی کۆبوونەوەکە نەکرد، بەڵام ئاماژەی بەوەدا کە ئیدارەی بایدن لە چوارچێوەی دیپلۆماسییەتی تایبەت بە پڕۆگرامی ئەتۆمیی ئێران، پابەندە بە هاوئاهەنگیکردن و گرتنەبەری پرەنسیپی شەفافییەت لەگەڵ ئیسرائیل.

پرایس گوتیشی، "ئێمە دوای هەموو خولێكی دانیشتن لە ڤییەننا، زانیاریی پێویستمان داوەتە هاوتا ئیسرائیلییەکانمان، ئەوە سەرباری گفتوگۆ و راوێژی بەردەواممان لەگەڵ ئیسرائیل لەکاتی بەڕێوەچوونی کۆبوونەوەکان" و دەشڵێت "لەنێوان ئەمریکا و ئیسرائیلدا بەرژەوەندیی هاوبەش هەیە کە بریتییە لەوەی رێگە نەدرێت ئێران ببێتە خاوەنی چەکی ئەتۆمی".

لەو چوارچێوەیەدا، ئیسرائیل هەوڵیداوە واشنتن بەو ئەنجامە بگەیێنێت کە تەنیا ئەوە بەلایانەوە گرنگ نەبێت بگەڕێتەوە نێو رێککەوتنی ساڵی 2015، بەڵکو گۆڕانکاری لە رێککەوتنەکەدا بکرێت.

هاوکات وەزیری هەواڵگریی ئیسرائیل گوتی : "ئیسرائیل هەرگیز رێگە نادات ئێران دەستی بە چەکی ئەتۆمی بگات و ئاسایشی ئێران لە هیچ شوێنێكدا پارێزراو نییە" و گوتیشی: "فڕۆکە جەنگییەکانمان توانایان هەیە بگەنە هەر شوێنێکی رۆژهەڵاتی نێوەڕاست، لەوانەش ئێران".

 





ئەم هەواڵە 82جار خوێندراوەتەوە
 
 
ڤیدیۆ گەلەری
لە شەقامێکی قەرەباڵغ منداڵێک لە سندوقی ئۆتۆمبێل دەکەوێتە خوارەوە
لێدانی سەدە ، تا ئێستا لێدانی وانەبووە
شه‌قامێك رۆده‌چێت و دوو ژن ده‌خوات
بەھرەیەکی سەرنج راکێشە
باران بارین و لافاوی شاری دوبەی
 
 

پێناسە | گەلەری | ئەرشیف | پەیوەندی

پێبژاردنی پۆلیسی هاتووچۆ هەولێر | دهۆک | سلێمانی

هەموو مافەکان پارێزراون بۆ ئاژانسی هەواڵی زاگرۆس

Developed By: Omed Sherzad