English | عربی | Kurdî دواهەواڵ
ڕاستەوخۆ  
 
كوردستان ل بەرامبەر گێلەشوکا هەڤدژادا سەرکەڤتیە..
2021-07-26 [03:18 AM]

نڤیسینا : ئحسان ئامێدی


  کوردستان وەلاتێ کوردان و پێکهاتێن دی یێن نشتیمانی،دکەڤندا ڤان پێکهاتان کوردستان ب وەلاتێ خو نیاسیە و لێ ژیاینە، هەروەکو دژمن و نەیار و داگیرکەرا ژی ئەڤ وەلاتە ب وەلاتێ کوردان ناسکری.
  ژ کەڤندا ئەڤ وەلاتە دکەفتە بەر لێمشتێن داگیرکرن و تالانکرنا ڤان نەتەوەیێن دەردور، ژ فرس و ئەرەب و روم و تورک، کو ئەڤ نەتەوە هەڤدژبوون و هەمیشە ب شەر و هەڤچوون بوون، لێ لبەرامبەر سەخوبوونا کوردستانێ د هەڤگرتی بوون.
  ژ بەرکو جهێ جوگرافیێ کوردستانێ دکەفتە د ناڤەراستا ڤان نەتەواندا، لەوان هەمیشە دبو مەیدانا ململانێ و پێکدادان و شەرێن وان، و هە ئێکی دڤیا پترا کوردستانێ داگیرکەت و بکەتە دەڤەرێن بالادەستیا خو و خەلکێ وێ بکەتە هیزەکا شەرکەر و  بو خو بکاربینیت.
  ل سەردەمێ ئیسلامیەتیێ جارەکا دی کوردستان کەفتە بەر پێلێن داگیرکرنێ و تالانکرنێ ل بن ناڤێن ژێکجودا، ژیکڤەبونا ئیسلامێ و سەرهلدانا تیمێن ژێکجودا هەر ل سەر وی شێوازێ ژیکجودا کوردستانا داگیرکری و مللەتێ تەپەسەرکری هاتە دابەشکرن بمانەڤەیا تەپەسەرکرنێ!.
ئەڤان تیمێن هەڤدژ جارەکا دی کوردستانی کرنە کەرستێ شەر و پێکدادانێ و کرنە قوربانی!.
  ل هێرشێن داگیرکەرێن مەگولی و تەتاری جارەکا دی هەمان ستەم و زوری و تالانکرن چەند بارە بو.
  ل دامەزراندن و بەرفرهبوونا هەردوو ئمبراتوریەتێن ئوسمانلی و سەفەوی کوردستانی بساناهی ل سەر وان هەردوو قەواران دابەشبووون و کرنە داردەستێ شەر و پێکدادانێن خو بێی کو دانپێدانێ ب مافەکێ نەتەوەیێ وان بکەن.
  لسەردەمێ سولتانێن ئوسمانلی و شاهێن ئیرانی چەندین میرنشینێن کوردستانی یێن تاگیر بو ئمبراتوریەتان چێبوون، لێ ئەڤ میرنشینە نەشیان هەڤبگرن و قەوارەکێ خومالیێ کوردستانیێ سەربخو چێکەن، بەلکو پتریا جاران خویک و سەرانە بو دەولەتێ دهنارتن و شەر و پێکدادانا ئێکودوو بو وان دکرن.
   پشتی نەمانا میرنشینێن کوردی ل سەدێ نوزدێ ل سەردەستێ ئمبراتوریەتان چ کیانەکێ خومالیێ کوردستانی نەما و کوردستان وەکو دو پارچەیێن داگیرکری و ژێک جودا ما بن دەست!.
   ل ئەنجامێ جەنگی جیهانیێ ئێکێ و شکەستنا ئمبراتوریەتان و چێکرنا دەولەتێن نوی ل روژهەلاتا ناڤین، کوردستانێ خو دیت چار پارچەیێن داگیرکری، و مللەت ژی یێ پەرتوبەلاڤ و بێ هێز و بێ ماف.
  لێ وەکو هەرجار مللەتی بەرخودان کر و یاخیبو و بزاڤ و چالاکیێن سیاسی بشێوازەکێ دیتر ئەنجامدان، رێکخستنێن سیاسی چێکرن و شورەش و سەرهلدانکرن.
  ژ رێکەفتنا زەهاو ل سالا ١٦٣٩ بو رێکەفتنا سیڤەر ١٩٢٠ بو پەیمانا لوزان ١٩٢٣ بو رێکەفتنا سعدئاباد ١٩٣٧ بو ریکەفتنا جزائیر ١٩٧٥ زێدەباری دەهان رێکەفتنێن دووقولی و پتر دوی ماوەی هاتن کرن بو سەر ژنوی دانان و پاراستنا سنورێن سێ نەتەوەیێن فرس، تورک، ئەرەب لسەر کیانێ کوردستانێ، و بێ بەهرکرنا کوردستانێ ژماف و بزاڤێن وێ یێن سیاسی. 
  مێژوویا خویناویا ڤان مللەتان ب ملیونان مروڤ قوربانی و ب ترولیونان دولارا زیان و وێرانکرنەکا هەمی لایەنی ب هەمیان کەفتیە لێ هشتا نەبویە پەند و وانە کو ئەڤ مللەتە دەستبەرداری شەر و کوشتن و خوسەپاندنێ بن ئێدی پێکڤە ئیدارا دەڤەرێ بکەن.
  مخابن لڤێ دەڤەرێ کلتورێ شەر و پێکدادانێ و بێ بەهرکرنا ئەوێ دشێنێ هەرێ بەردەوامە زێدەباری دەستدرێژی و مایتێکرنێن جیهانی و هەر لایەکی بو بەرژەندێن خو بێی لبەرچاڤگرتنا هەست و بهایێن ئاینی و مروڤی!.
  سەرەرا ڤێ هەمیێ تاکە رێکەفتن کو کورد لایەنەکێ سەرکی و بهێز بونە تێدا بەرامبەر دەولەتەکا داگیرکەر و ل سەر دانپێدان ب مافێن کوردستانێ هاتیە ئەنجامدان، رێکەفتنا ١١ ی ئادارا سالا ١٩٧٠ بو سەردەمێ شورەشا ئەیلولا نشتیمانی ب سەروکاتیا بارزانیێ نەمر بو کو دگەل حکومەتا ئیراقێ یا وی سەردەمی هاتە مورکرن، ئەو ژی کەفتە بەر پیلانەکا دژمنکارانە یا هەرێمایەتی و هاتە ژناڤبرن.
    ئێکانە بریارا نێڤدەولەتی یا دەلیڤەکا مانەڤە و پاراستنا کوردستانێ دەرکەفتی بریارا جڤاتا تەناهیا نیڤدەولەتی ژمارە ٦٨٨ ل ١٩٩١/٤/٥ بو راوەستاندنا سەرکوتکرنا کوردان بدەستێ رژیما دکتاتوری ل ئیراقێ بو، کو دگەرەوا وێ دا هەرێما کوردستانێ هاتە پێکئینان.
   د مێژوویا مروڤایەتیێ دا چ مللەتان هندی کوردان داگیرکرن و تالانکرن دەردەسەری نەدیتینە، و خەبات و بەرخودان نەکرینە و گوری و قوربانی نەداینە بو مان و بەردەوامیا هەبوونا خو!، و ل ئەنجام مللەتێ کورد و کوردستان هەر ما، لێ تنێ هەرێما کوردستانێ ل پارچەکا باشورێ کوردستانێ بویە قەوارەکێ خومالیێ کوردستانێ یێ دەستوریێ دانپێدای، ئەوژی هەر دکەڤیتە بەر گەڤ و هەرەشە و دەستدرێژیێن داگیرکەر و نوکەرێن وان.
   ل هەرێما کوردستانێ ئیرادەکا کوردستانی یا بهێز و بخو باوەر هەیە کو بەرسینگا هەمی رکەبەری و قەپخازیا دگریت پێناڤی کوردستانەکا سەربخو و گەشەکری، ئەڤ ئیرادە خو د رێبازا پارتی و بارزانی دا ب سەروکاتیا سەروک بارزانی و دامەزراوێن دەستهەلاتا هەرێما کوردستانێ، سەروکاتیا هەرێمێ و سەروکاتیا ئەنجومەنی وەزیراندا دبینیتەڤە.
   داکو هەرێم یا بهێزبیت دڤێت پارتی یا بهێزبیت، چونکی پارتی تاکە رێکخستنا سیاسیا کوردستانیە خو ل دوزا کوردستانێ دکەتە خودان و نوینەراتیا وێ دکەت.
  پارتی بهێزبیت کو بشیت هەمی لایەنێن سیاسی ل ژێر ئالا سەروک بارزانی کومڤەکەت پێناڤی گەهاندنا دوزا کوردستانێ بو کەنارێن ئارام.
  نەرمی نواندن و پشکداریپێکرن دوو بنەمایێن گرنگێن رێبازا پارتی و بارزانی نە بو خرڤەکرنا هەمی لایەنا لژێر چادرا سەروک بارزانی، د وی دەمی دا هەر لایەک دێ هەست بهەبون و رولێ خو کەت د پروسا سیاسی و کارگێری و دوزا کوردستانێدا و دێ هێزەکا دیتر دەتە بارودوخێ هەی.
  دەڤەرا روژهەلاتا ناڤین جوگرافیەک مەزنە ب ب سامانێن خویێن سروشتی و مروڤی ڤە، سەروکانیا زاین و گەشەکرنا بیروهزرێن توندرەو و دژایەتیکرنێ یە!، هەر ئەڤ دەڤەرە مەیدانا ململانا زلهێزێن جیهانێ یە، وەکو دهێتە زانین دەڤەرەکا زیندیە ل نیڤا جیهانێ یە، روژهەلات و روژئاڤا و باشور و باکوری پێکڤە گرێدەت، و ژێدەرەکێ سەرەکیێ ووزا جیهانیە، 
  دڤێ رەوشێ دا هەرێما کوردستانێ هەبونەکا خومالیا کوردستانی یە، یا دناڤ ڤێ گێلەشوکا هەڤدژاندا، هەڤدژێن هەرێمایەتی کو خو د سێ نەتەوەیێن مەزن و توخمپەرست و ریکخراوێن وانێن توندرەودا نیشاددەن، و هەڤدژن جەمسەرێن جیهانی، ئەمریکا و هەڤپەیمانێن وێ ژلایەکی، و روسیا و هەڤپەیمانێن وێ ژلایێ دی، و چین و چالاکیێن وێ ژ لایێ دیترڤە کو هەر لایەنەکی دیدوبوچوون و بەرژەوەندێن خو یێن تایبەت هەنە، ئەڤە هەمی ژی د بنگەهێن ستراتیژی و بەرژەوەندێن دومدرێژدا هەڤدژن. 
  بهایێن مروڤی و مافێن مروڤان و مافێن بریارێن چارەنوسی یێن گەلان بەرامبەر بەرژەوەندێن هەمی ڤان لایەنان جێگیرنابن ئەگەر هێزەکا کارا و دەستهەلاتەکا رەوا ل میدانێ خو نەچەقینیت، ژبەر هندێ هەرێم دناڤ ڤێ گێلەشوک و کێشوڤەکێشا هەڤدژا یا خاستیە خو بهێزبێخیت و ئیرادا خو ب سەپینیت، نەمازە فاکتەرێن هێزێ ئەڤرو ل هەرێمێ هەنە تنێ چێکرنا ئیرادا گشتی ب سەروکاتیا سەروک بارزانی پێدڤیە و ئەرکەکێ تەڤایا پارتی و لایەنێن سیاسی و جڤاکیە.
سەروک بارزانی نوینەراتیا دوزا کوردستانێ دکەت، ب خەبات و بەرخودان و رژدیێ و داکوکیکرنێ و بەردەوامیێ، ئەوە یێ شیایی ئاستێ داخازێن نەتەوایەتی ژ ئوتونومی بو ئوتونومیێ راستەقینە بو فیدرالزمێ بو ریفراندوما سەرخوبونا کوردستانێ ببەت و پتریا وان جێگیرکەت و بجهبینیت.
   سەروک ئەو سەرکردێ ب هێز و پاک و خەمخور و دلسوز و وێرەک و لێزان کو باش د سیاسەتا هەرێمایەتی و نێڤدەولەتی دگەهیت و سەرەدەریێ دگەل دکەت پێناڤی بەرژەوەندێن کوردستانێ، هەر د کەساتیا وی دا دهێتە دیتن وێ رایێ و ئیرادا گشتی پێکبینت و سەرکردایەتیا وێ بکەت و وەلاتی ژڤێ گێلەشوکا هەڤدژا رزگاربکەت.
  رێبازا پارتی و بارزانی کوردستانەکا دابری ژ جیهانێ، ب جیهانێ دا ناسین و کرە قەوارەک نەتەوەیی و ژ دوستینیا چیا بەرەف جیهانیبوونێ بر و گەلەک هوکارێن هێزێ دابینکرن، و هەر لوێ دهێتە پێشبینیکرن کوردستانەک سەربەخو بجهبینیت.
    ناهێتە جاڤەرێکرن ل وەلاتێن هەرێمایەتی حکمرانیەکا دیموکراتی کو دەربرینێ ژ ئیرادا هاولاتیان بکەت سەربکەڤیت، و دانێ بمافێن هەمی پێکهاتێن جڤاکی بدەت و سەقامگیریێ و گەشەیێ بجهبینیت، هەروەکو ناهێتە جاڤەرێکرن جەمسەرەکی جیهانی ژی خو لدوزا کوردستانێ بکەتە خودان و پشتەڤانیا چێکرنا قەوارەکی سەربخو بو بکەت، نەمازە ئەو سیاسەتی لدیف بنەمایێن بەرژەوەندێن خو دکەن و د ئامادەنینن بەرژەوەندێن خو تێکبدەن بخاترا مللەتەکێ هەژار و بێدەستهەلات!.
  خوشبەختانە دناڤ ململانێ و شەرو پێکدادانێن دەڤەرێ، پتریا رژێمێن حکمدار نە لجهێ خوشحالیا جڤاکێ نیڤدەولەتینە و هوکارێن ئارامیێ و سەقامگیریێ نینن، بەروڤاژی هوکارێن تێکدانا ئاسایش و سەقامگیریا دەڤەرێ و جیهانێ نە، وکوردستان پتر ژوان توخمەکێ سەقامگیریێ یە و خو گونجاندیە دگەل سیاسەتا نێڤدەولەتی و هوکارێن هێزێ چێدکەت و بەرەف پێشڤەیە، هەروەکو لدەف داگیرکەران ژی هوکارێن لاوازیێ پەیدادبن و بنگەهێ وانێ دەستهەلاتداریێ و خو سەپاندنێ د هەژیێت، و داکو ئەڤ بهێزبونا خویی بەرامبەر لاوازبەنا دژمنی ببیتە کیانەکێ کوردستانی، کوردستانی دخاستینە هوکارێن هێزێ بهێزتربکەن، ب هەڤگرتنێ و ئیرادا تەڤایی و کومڤەبوون ژێر ئالا سەروک بارزانی.
   د مێژوویێ دا گەلەک جاران ئەم دناڤ ڤێ گێلەشوکا هەڤدژاندا بەرزەبووینە!، لێ باوەرم ڤێ جارێ ئەو ئیرادا بهێز ب سەروکاتیا بارزانی جهەکێ هەرێمایەتی و جیهانی هەیە، کو ڤێ جارێ ئەم باشتر خو ببینین و دەستکەفتیێن مەزنتر بدەستڤە بینین.
  دڤێت کوردستانی بخو بو خو کارەکێ وەسا بکەن بشێن خو بکەنە قەوارەکێ سەربخو، و ئێدی ژوێ گلەیا مێژوویی رزگاربن ئەوا هەمیشە بەرپسیاریێ دئێخنە سەر لایەنێن دی کو نەکرینە دەولەت!.. فارسا بومە چ نەکر!، روما بومە چ نەکر!، ئەرەبا بومە چ نەکر!، ئیسلامێ بومە چ نەکر!، تورکا بومە چ نەکر!، ئنگلیزا بومە چ نەکر!، فەرەنسا بومە چ نەکر!، روسیا بومە چ نەکر!، ئەمریکا بومە چ نەکر!،. ئێ دا ئەم بخو بو خو تشتەکی بکەین.. وەکو وان بو خو کری.
  ئەڤ سەربورا مێژوویی و ئەڤ دەستودارێ مەترسیدار تێرا هندێ هەیە ئەم بخودا بچینەڤە و خاندن و ڤەکولینێن زانستیانە بکەین و لوژیکێ ژیری بکاربینینین بو تێگەهشتنەکا راست و دروست بو دوزا کوردستانێ و یا پێدڤی بکەین بو گەهشتن ب ئارمانجێن دەربر ژ ماف و داخازێن کوردستانێ، و ئیدی هەمی شیان و کار بو پاراستن و گەشەکرن و پێشڤەبرنا هەرێما کوردستانێ.





ئەم هەواڵە 5167جار خوێندراوەتەوە
 
 
ڤیدیۆ گەلەری
ئه‌سپێك ره‌دووی ئه‌مبولانسێك ده‌كه‌وێت كه‌ برایه‌كه‌ی له‌ناودایه‌
لە شەقامێکی قەرەباڵغ منداڵێک لە سندوقی ئۆتۆمبێل دەکەوێتە خوارەوە
لێدانی سەدە ، تا ئێستا لێدانی وانەبووە
شه‌قامێك رۆده‌چێت و دوو ژن ده‌خوات
بەھرەیەکی سەرنج راکێشە
 
 

پێناسە | گەلەری | ئەرشیف | پەیوەندی

پێبژاردنی پۆلیسی هاتووچۆ هەولێر | دهۆک | سلێمانی

هەموو مافەکان پارێزراون بۆ ئاژانسی هەواڵی زاگرۆس

Developed By: Omed Sherzad