English | عربی | Kurdî دواهەواڵ
ڕاستەوخۆ  
 
ڕووقایمی و پەند وەرنەگرتن
2021-09-27 [03:18 AM]

ZNA- ھەولێر 



‎لە سەرەتای بانگەشەی ھەڵبژاردنی ئەنجوومەنی نوێنەرانی عێراق، پارتی دیموکراتی کوردستان بڕیاری دا، ھەڵمەتەکانی لەسەر بنەمای بیرخستنەوە و پیشاندانی دەستکەوتەکانی و بەڵێندان بێت بە دەنگدەران کە ھەرچی لە دەستی بێت دەیکات تا کوردستان بەھێزتر و سەقامگیرتر و ژیانی خەڵکەکەی باشتر بێت، خۆی لە شەڕی ئیعلامی لابەلا و شکاندنی بەرامبەرەکانی دووربگرێت، تا ئەمڕۆش ھەروای کردووە و دەکات. 

‎ئەم بڕیارە بنچینەیی و نەگۆڕەی پارتی، لە متمانە بەخۆکردن و ناسینی جەماوەرەکەی و ڕێزگرتنی ئاست و زەینی خەڵکی کوردستانەوە سەرچاوەی گرتووە. پارتی ھەمیشە پێیوایە، شکاندن و تەخوینکردنی ئەم و ئەو، با ھێندێکیشیان لەباریاندا بێت، ڕێگەیەکی درووست نییە بۆ بەدەستھێنانی دەنگی خەڵکی کوردستان، بگرە ھەڵوێستە نەتەوەیی و نیشتیمانی و دەستکەوتەکانی سەر ئەرزی واقیع و، بەرزکردنەوەی ئاستی ژیانی خەڵک و پاراستنی کەرامەت و سەروماڵیان، کورترین ڕێگەیە بۆ بەدەستھێنانی متمانەی ئەو خەڵکە. جیا لەوەی شەڕەدەمی ئیعلامی و خۆ بەھەمووشتزانین وبەھیچنەزانینی ئەوانی دیکە، نە ڕاستە و نە لەگەڵ مەزاجی گشتیی خەڵکی کوردستاندا دێتەوە. 

‎کەچی بەداخەوە، دیسان وەک پیشەی ھەمیشەییان، لایەنێک، لەم ھێمنی و خۆدوورگرتنەی پارتی لەباسکردنی ئەوان، تێناگات و بگرە دەیقۆزێتەوە بۆ ھێرشی ناڕەوا و بوختانکردن بە پارتی.
‎ئەم دوو ئەلفە، بۆ وەڵامی ھەموو ئەوانە نییە، بەڵکو بۆ دەرخستنی بوختان و نامەسئوولییەتی ئەو کەسانەیە کە لە برێتی ئەوەی خۆیان بە خەڵک بناسێنن تا دەنگیان پێ بدەن، دەیانەوێت لە ڕێی بووختانکردن بە پارتییەوە خەڵک لە خشتەبەرن و، زۆر بە ڕووقایمی باسی نیشتمانپەروەریی و بەتەنگەوەچوونی ژیانی خەڵک و شکاندنی بەرانبەرەکانیان دەکەن. 

‎سەیرە لای ئەو کەسانە، کوردایەتی و نیشتمانپەروەریی؛ خزمەتکردنی ئەجێندای دوژمنان و دڵخۆشکردنیان، ھەوڵدانی بێوچان بۆ لەتکردنی ڕیزی نیشتمانی و تەسلیمکردنەوەی کەرکووک و نیوەی خاکی کوردستانە، کەچی ھەوڵدان بۆ سەربەخۆیی کوردستان لە چوارچێوەی ڕیفراندۆمێکی یاسایی و سەرتاسەریی کوردستاندا بە خیانەت دەزانن!! ئەرێ ئەوە چ ڕووقامییەکە، پاراستنی کەرکووک بە خیانەت و تەسلیمکردنەوەی بە کوردایەتی بزانن؟! مرۆڤ نازانێت چۆن باسی ئەوانە بکات کە خەڵکانێکیان کاندید کردووە (‌ نۆتی شەجاعە)‌ی ئەنفالیان وەرگرتووە کەچی ئێستا بۆ سواڵی دەنگ حەوت حەوت باسی تاوانەکانی ئەنفال دەکەن!! کۆمەڵگەی کوردستانیان بە ئاسۆیی و ستوونی نەک دابەش، بگرە ئەنجنئەنجن کردووە، کەچی ھیچ شەرم ناکەن و خۆ بەخەمخۆری خەڵک و ھاوبەشی ئێشوئازارەکانی دەردەخەن!!

‎سووربوونی ئەو ڕووقایمانە لەسەر دووبارەکرنەوەی تەجرەبەی فاشیلی پەلاماردانی پارتی وەک تاکە ڕێگەیەک بۆ سواڵی دەنگ، دەیسەلمێنێت نەزانیشن. ئاخر ھیچ پەندێکیش لە مێژوو فێرنەبوون و نابن. تا ئەمڕۆ، نازانن کە چییان لە پەلامارەکانی پێشوو دەستکەوتووە، ئەمجارەش لەوە زیاتریان دەست ناکەوێ. بووختان و ھێرشە ئیعلامییەکانیان، چەند پەلاماری ناحەقی پارتییە، ھێندەش سووکسەرنجدانی خەڵکی کوردستانە. خەڵکی کوردستان زۆر لەوە ھۆشیارتر و زەینیان ڕوونترە کە ئەوانە تێیگەیشتوون. 

‎نازانن، دەستکەوتی خەڵک و ھەڵوێستی نیشتیمانیانە، پەیژەی سەرکەوتنن، نەک پەلاماری ئیعلامی و بووختان و تەخوینکردنی خەڵکی دیکە. نازانن، مێژوو و ڕووداوەکانی، تۆمارکراون و تەواو، بە ھەراوزنا نایەنە گۆڕین، باشترە ئەوان خەریکی ماڵی شێواوی خۆیان و کۆکردنەوەێ پارچەکانیان بن نەک پەلاماردان و چەواشەکاری. 

‎جوانیان گوتووە: گەر شەرمت نەکرد، چ دەکەی بیکە.


‎ چاودێرێک
 





ئەم هەواڵە 2941جار خوێندراوەتەوە
 
 
ڤیدیۆ گەلەری
ئه‌سپێك ره‌دووی ئه‌مبولانسێك ده‌كه‌وێت كه‌ برایه‌كه‌ی له‌ناودایه‌
لە شەقامێکی قەرەباڵغ منداڵێک لە سندوقی ئۆتۆمبێل دەکەوێتە خوارەوە
لێدانی سەدە ، تا ئێستا لێدانی وانەبووە
شه‌قامێك رۆده‌چێت و دوو ژن ده‌خوات
بەھرەیەکی سەرنج راکێشە
 
 

پێناسە | گەلەری | ئەرشیف | پەیوەندی

پێبژاردنی پۆلیسی هاتووچۆ هەولێر | دهۆک | سلێمانی

هەموو مافەکان پارێزراون بۆ ئاژانسی هەواڵی زاگرۆس

Developed By: Omed Sherzad