English | عربی | Kurdî دواهەواڵ
ڕاستەوخۆ  
 
ساسان عەونی: بە بڕیاری سەرۆكی حكوومەت ساڵانە بڕی 900 ملیۆن دینار بۆ شوێنەوار تەرخان دەكرێت
2021-11-29 [02:58 AM]


لە هەولێر كۆنفرانسی زانستیی پاراستن و پەرەپێدانی شوێنەوار و كەلەپوور بەڕێوە چوو، وەزیری شارەوانیش ئاماژەی بەوەدا کە سەرەڕای قەیرانی دارایی بە بڕیاری سەرۆكی حكوومەت ساڵانە بڕی 900 ملیۆن دینار بۆ شوێنەوار تەرخان دەكرێت.

وەزارەتی شارەوانی لە راگەیاندراوێکدا لە هەژماری فەرمی خۆی لە تۆری کۆمەڵایەتیی (فەیسبووک) بڵاویکردووەتەوە: "ئەمڕۆ دووشەممە 29/11/2021، لە شاری هەولێر بە سەرپەرشتیی ساسان عەونی، وەزیری شارەوانی و گەشتوگوزار دووەمین كۆنفرانسی زانستیی شوێنەوار و كەلەپوور لەژێر ناوی "پاراستن و پەرەپێدانی شوێنەوار و كەلەپوور لە هەرێمی كوردستان" بەڕێوە چوو، كە لە كۆنفرانسەكەدا ئومێد خۆشناو، پارێزگاری هەولێر و ڕاوێژكاری جێگری سەرۆكی حكوومەت و بریكاری وەزارەتی ئەوقاف و سەرۆكی لیژنەی شارەوانی و ژمارەیەك لە پەرلەمانتاران و سەرۆكی دەستەی گەشتوگوزار و نوێنەرانی هەردوو بەڕێوەبەرایەتییەكانی فڕۆكەخانە و هاتوچۆی هەولێر و بەڕێوەبەری گشتیی پرۆگرام و پەروەردە و ڕاوێژكار و ژمارەیەك لە بەڕێوەبەرانی گشتیی وەزارەتی شارەوانی و گەشتوگوزار و بەڕێوەبەرایەتییەكانی شوێنەوار لە سەرجەم پارێزگە و ئیدارە سەربەخۆكان و شوێنەوارناسانی كوردستان بەشداربوون".

ئەوەش خراوەتە روو: "ساسان عەونی لەمیانەی كۆنفرانسەكەدا وتارێكی پێشكەشكرد و لە بەشێكی قسەكانیدا جەختی كردەوە شوێنەوار و كەلەپوور لە ئەجێندای حكوومەتی هەرێمی كوردستاندا پێگەیەكی تایبەتی هەیە، كە وەك شوناس و ناسنامەی نیشتمانی و وەك مێژوو و ڕابردوومان بە قووڵایی هەزاران ساڵ ڕەگوڕیشەی لەسەر خاكەكەی خۆیدا هەیە. هەروەها ئاماژەی بەوەش كرد كە هەر لەم ڕوانگەیەوە حكوومەتی هەرێم و سەرۆكی حكوومەت بە گرنگییەوە لەو ڕۆڵ و ئەركە دەڕوانن كە شوێنەوار هەیەتی، بۆیە سەرەڕای قەیرانی دارایی بە بڕیاری جەنابی سەرۆكی حكوومەت ساڵانە بڕی 900 ملیۆن دینار بۆ ئەو سێكتەرە تەرخان دەكرێت و كۆنفرانسی داهاتی وەزارەتی شارەوانی و گەشتوگوزاریش بڕیاری دا كە ڕێژەی 1%ی داهاتی شارەوانییەكان بۆ شوێنەوار و كەلەپوور خەرج بكرێت".

روونیشکراوەتەوە کە لەبارەی هەنگاو و كارەكانی وەزارەتی شارەوانی و گەشتوگوزاریش بۆ پەرەپێدانی ئەو سێكتەرە، ساسان عەونی وەزیری شارەوانی و گەشتوگوزار ئاماژەی بەوە كرد كە ئێستا لە سەرتاسەری هەرێمی كوردستاندا بەڕێوەبەرایەتییەكانی شوێنەوار بە هاوكاریی تیمی زانكۆ ناوخۆیی و جیهانییەكان و شوێنەوارناسانی كوردستان، كاری كنە و پشكنین لە دەیان پێگەی شوێنەواریدا دەكەن كە چەند ڕۆژێك پێش ئێستا تەنیا لە سنووری پارێزگەی هەولێر بە هاوكاریی زانكۆی هارڤاردی ئەمەریكی زیاتر لە 750 شوێنی شوێنەواری تۆمار كراون. لەبارەی گرنگیی شوێنەواریش، وەزیری شارەوانی و گەشتوگوزار دووپاتی كردەوە كە شوێنەوار بوارێكی فراوانە بۆ دروستكردنی پردی دۆستایەتی و هاوكاری و هەماهەنگی لەگەڵ زانكۆ ناوخۆیی و جیهانییەكان، دەیان شوێنی گرنگی شوێنەواری دۆزرانەوە و كاری هەڵكۆڵینیان تێدا ئەنجام دەدرێت كە لە داهاتوودا دەتواندرێت ئەم شوێنانە ببنە ڕووگەی سەردانیكەران لە هەموو سووچێكی دونیاوە.

هەروەها ئاماژە بەوەش دراوە لەبارەی ئامانجی كۆنفرانسەكە وەزیری شارەوانی رایگەیاند: "ئامانجمانە لەم كۆنفرانسەدا تەوەر و بابەتە گرنگە زانستی و یاساییەكانی ئەجێندای كۆنفرانسەكە هەموویان بەیەكەوە ڕۆڵیان لە پاراستن و پەرەپێدان و پێشخستنی شوێنەوار و كەلەپووردا هەبێت. بۆیە جەخت دەكەینەوە كە ناساندنی شارستانییەت و مێژووی دێرینی كوردستان لە ڕێگەی شوێنەوار و كەلەپووردا ئەركێكی لەپێشینەیە، لەبارەی كەلەپووریشەوە ئاماژەی بە گرنگییەكەی كرد وەك تەواوكەری شوێنەوار لە كوردستان كەلەپوورێكی دێرین و دەوڵەمەندمان هەیە و وەك سەرمایەیەكی نەتەوەیی و هانی كەرتی تایبەت و هەوڵە كەسییەكان و دامەزراوە حكوومەتییەكان دەدەین كە بایەخێكی زۆرتر بە مۆزەخانە و پارچە و خانووە كەلەپوورییەكان بدەن، لەلایەكی ترەوە هەوڵ دەدەین كەرتی شوێنەوار لەگەڵ گەشتوگوزار بكەینە سەرچاوەیەكی دیاری ناساندنی كولتوور و بەدیارخستنی ناسنامەمان".

جەختیشکراوەتەوە کە وەزیری شارەوانی و گەشتوگوزار لە كۆنگرەیەكی ڕۆژنامەوانیدا ناوەڕۆك و ئامانجی كۆنفرانسەكەی بۆ دەزگەكانی ڕاگەیاندن خستە ڕوو و جەختی لە گرنگیی پەرەپێدانی شوێنەوار و كەلەپوور لە هەرێمی كوردستان كردەوە.





ئەم هەواڵە 544جار خوێندراوەتەوە
 
 
ڤیدیۆ گەلەری
لە شەقامێکی قەرەباڵغ منداڵێک لە سندوقی ئۆتۆمبێل دەکەوێتە خوارەوە
لێدانی سەدە ، تا ئێستا لێدانی وانەبووە
شه‌قامێك رۆده‌چێت و دوو ژن ده‌خوات
بەھرەیەکی سەرنج راکێشە
باران بارین و لافاوی شاری دوبەی
 
 

پێناسە | گەلەری | ئەرشیف | پەیوەندی

پێبژاردنی پۆلیسی هاتووچۆ هەولێر | دهۆک | سلێمانی

هەموو مافەکان پارێزراون بۆ ئاژانسی هەواڵی زاگرۆس

Developed By: Omed Sherzad