2022-04-04 [11:54 AM]

‎ وەزارەتی بازرگانیی عێراق و هەرێمی كوردستان باس لەو دوو سەبەتەی خۆراك دەكەن، كە بڕیارە لە مانگی رەمەزان بەسەر هاووڵاتییاندا دابەش بكرێت.

‎محەمەد حەنوون، گوتەبێژی وەزارەتی بازرگانیی عێراق بڵاوی كردووەتەوە، وەزارەتی دارایی عێراق بودجەی پێویستی بۆ دابینكردنی بەشەخۆراك تەرخان كردووە و سەبەتەی سێیەمی خۆراك لە 10 ڕۆژی كۆتایی مانگی ڕەمەزان دابەش دەكرێت.

‎ئاماژەی بەوەش كرد: "وەزارەتی بازرگانی گرێبەستی لەگەڵ كەرتی تایبەت كردووە، بۆ دابینكردنی سەبەتەی سێیەمی خۆراك، كە بتوانرێت لە ماوەی 10 ڕۆژی كۆتایی مانگی ڕەمەزاندا بەسەر هاووڵاتییاندا دابەش بكرێت".

‎لای خۆیەوە، نەوزاد شێخ كامیل، بەڕێوەبەری گشتیی بازرگانی لە وەزارەتی بازرگانی و پیشەسازیی حكوومەتی هەرێمی كوردستان،  ڕایگەیاند: "ئێمە هێشتا سەبەتەی دووەمی خۆراكمان دەست پێ نەكردووە، بەشێكی خۆراكەكە هاتووە، بەڵام چاوەڕوانی دەرچوونی ئەنجامەكانی پشكنین دەكەین و لەنزیكترین كاتدا دەست بە دابەشكردنی دەكرێت".

‎نەوزاد شێخ كامیل، ئاشكرای كرد، چاوەڕوان دەكرێت لەگەڵ سەبەتەی دووەمی خۆراك لە مانی رەمەزاندا، سەبەتەی سێیەمیش دابەش بكرێت، گوتیشی: "چاوەڕوانین پێش تەواوبوونی مانگی رەمەزان، سەبەتەی دووەم و سێیەمی خۆراك بێت و ئێمەش ئامادەین بۆ وەرگرتن و دابەشكردنی بەسەر هاووڵاتییاندا".

‎سەبەتەی خۆراکی هاووڵاتییان بۆ هەر کەسێک پێکهاتووە لە سێ کیلۆگرام برنج و یەک کیلۆگرام شەکر و نیو کیلۆگرام نیسک و نیو کیلۆگرام لەتکەنۆک و یەک لیتر زەیت و 400 گرام دۆشاوی تەماتە.