قەیس خەزئەلی
	2022-06-12 [07:27 AM]

قەیس خەزعەلی، ئەمینداری گشتی عەسائیب ئەهلی حەق، لە گوتارێکیدا بەبۆنەی شەشەمین کۆنگرەی ساڵانەی بزووتنەوەکە، کە لە پارێزگای نەجەف بەڕێوەدەچێت، گوتی، دوای پەتای کۆرونا و دەستلەکارکێشانەوەی حکومەتەکەی عادل عەبدولمەهدی، پێکهێنانی حکومەتێکی کودەتاچی بەسەر ئیرادەی خەڵکەوە، دواتریش هەڵبژاردنێکی ساختەکاری، بووەتە هۆکاری داخرانی سیاسیی.

هەروەها رایگەیاند، ئەم دۆخە سیاسیەی ئێستای عێراق ئاماژەیە بۆ کۆتایی قۆناغێک و دەستپێکی قۆناغێکی دیکەی نوێ، کە هێزی گەنجانی سیاسی تێیدا سەرکەوتوو دەبن، بزووتنەوەی عەسائیب ئەهلی حەقیش یەکێکە لەو هێزانەی سەرەڕای هەموو ئەو زریانە سیاسیانەی بەمدوایە عێراقی پێیدا تێپەڕیوە، رەگ و ریشەی بەهێزی لە زەوی داکوتیوە، بۆیە پێویستە بە هەموو شێواز و ئاراستەکانی بەڕووی خەڵکی عێراق دانەخرێت.