English | عربی | Kurdî دواهەواڵ
ڕاستەوخۆ  
 
موقتەدا سەدر: حەشدی شەعبی پاشکۆیەتی و ملکەچی قبووڵ ناکەن
2022-08-04 [06:09 AM]

ZNA- ھەولێر


رێبەری رەوتی سەدر راگەیێندراوێکی لەبارەی حەشدی شەعبییەوە بڵاوکردەوە و جگە لە پەسنکردنی ئەو هێزە و ناوهێنانیان بە موجاهید، دەڵێت، هێزەکانی حەشدی شەعبی لەوانەوە نزیکن و پشتیوانی بۆچوونەکانی ئەو دەکەن؛ هەروەها وەکو ئاماژەیەک بۆ ئەوەی نابێت هێزەکانی حەشدی شەعبی سەر بە لایەن و وڵاتی دیکە بن، دەڵێت: "ئەوان لە عێراقن و بۆ عێراقن و پاشکۆیەتی و ملکەچی قبووڵ ناکەن".

 

رۆژی پێنجشەممە 4ـی ئابی 2022، موقتەدا سەدر، رێبەری رەوتی سەدر راگەیێندراوێکی لەبارەی ناکۆکییەکانی لەگەڵ چوارچێوەی هاوئاهەنگی بڵاوکردەوە و باسی هێزەکانی حەشدی شەعبی لەو نێوەندەدا دەکات و دەڵێت: "هەندێک کەس لەسەر ئاوازی یەکگرتوویی دەخوێنن و داوای لێکنەترازاندنی ریزەکانی شیعە دەکەن. ئەمە بەکردەیی پرسێکی زۆر گرنگە و شاراوە نییە، بەڵام یەکگرتوویی ریزەکان پێویستە بەپێی رێوشوێنە گشتییەکان و هاوتەریب لەگەڵ یاسا ئاسمانی و بڕیارە یاسایی و سیستمە کۆمەڵایەتییە دیارەکان بێت". 

 

رێبەری رەوتی سەدر دەڵێت: "راستە ئێستا یەکڕیزی زۆر گرنگە، بەڵام ئەو یەکڕیزییە دەبێت لەسەر بنچینەی خۆشەویستی نیشتمان و رەتکردنەوەی پاشکۆیەتی بێت؛ هەروەها دەبێت ئەو یەکڕیزییە لەسەر بنچینەی ئەنجامدانی چاکسازیی راستەقینە و رەتکردنەوەی گەندەڵی و گەندەڵکاران و لێپرسینەوە لێیان و خزمەتکردنی هەژاران بێت؛ هەروەها دەبێت لەسەر بنچینەی رەتکردنەوەی تاکڕەوی لە سامان بێت بۆ ئەوانەی دیارن و بەرپرسیارێتییان هەیە. عێراق پایتەختی یەکەمی شیعەیە و ئەمەش بە واتای گەڕانەوەی ئەوانی دیکە بۆ عێراق دێت، نەوەک ئەوەی ئێمە پاشکۆی ئەوان بین."

 

راگەیێندراوەکەی موقتەدا سەدر، دوای رۆژێک لە گوتارە ڤیدیۆییەکەی رۆژی چوارشەممەی دێت کە تێیدا هەموو جۆرە گفتوگۆیەکی لەگەڵ هێزەکانی چوارچێوەی هاوئاهەنگی رەتکردەوە و داوای هەڵوەشاندنەوەی پەرلەمان و هەڵبژاردنی پێشوەختەی کرد.

 

موقتەدا سەدر لە راگەیێندراوەکەیدا کە خۆی بە "موجاهید" ناودەهێنێت و لە گوتارەکەی رۆژی چوارشەممەیدا خۆی بە"نەوەی ئیمامی حوسێن" ناوهێنا، بەڕوونی دیارە دەیەوێت هەستی هێزەکانی حەشدی بۆ لای خۆی رابکێشێت و دەشڵێت: "گرنگە سەرنجەکان بۆ لای ئەو شتانە رابکێشین کە نابێت پشتگوێ بخرێن، ئەگەر گرووپی رەوتی سەدر و گرووپی چوارچێوە بەڕوونی هەبن، ئەوە نابێت بەو واتایە بێت کە دەبێت برا خۆشەویستەکانمان لە حەشدی شەعبی لەسەر یەکێک لەو دوو لایەنە هەژماربکرێن؛ بەڵام دڵنیام ئەوان پشتیوانی بۆچوونەکانم دەکەن لەوەی گوتوومە لە داواکاری بۆ هەبوونی یەکڕیزی لە چوارچێوە ئاسمانی و ئایینی و مرۆییەکانەوە. موجاهیدانی حەشدی شەعبی نزیکترن لە بۆچوونەکانمان و ئەوانەی ئێمە لە (ئال سەدر) پەیڕەویان دەکەین". 

 

رێبەری رەوتی سەدر هەروەها دەڵێت: "لێرەوە سڵاوی ئیسلامیان بۆ دەنێرم. ئەوان لەپێناو نیشتمانەکەیان قوربانییان دا و تەواو ئامادەن بۆ بەرگریکردن لە چاکسازی. ئەوان سەربازی عێراق و جەنگاوەرانی ژێر ئاڵای (ئالسەدر) بوون دژی داگیرکەر و ئێستاش بەو جۆرەن. ئەوان لە عێراقن و بۆ خاکی عێراق دەبن و پاشکۆیەتی و ملکەچی بۆ هیچ کەس و لایەنێك قبووڵ ناکەن، جگە لە چاکەکاران لە ئالی رەسوولم سڵاو و دروودی خوای لەسەر بێت."





ئەم هەواڵە 265جار خوێندراوەتەوە
 
 
ڤیدیۆ گەلەری
ئه‌سپێك ره‌دووی ئه‌مبولانسێك ده‌كه‌وێت كه‌ برایه‌كه‌ی له‌ناودایه‌
لە شەقامێکی قەرەباڵغ منداڵێک لە سندوقی ئۆتۆمبێل دەکەوێتە خوارەوە
لێدانی سەدە ، تا ئێستا لێدانی وانەبووە
شه‌قامێك رۆده‌چێت و دوو ژن ده‌خوات
بەھرەیەکی سەرنج راکێشە
 
 

پێناسە | گەلەری | ئەرشیف | پەیوەندی

پێبژاردنی پۆلیسی هاتووچۆ هەولێر | دهۆک | سلێمانی

هەموو مافەکان پارێزراون بۆ ئاژانسی هەواڵی زاگرۆس

Developed By: Omed Sherzad