English | عربی | Kurdî دواهەواڵ
ڕاستەوخۆ  
 
وه‌زاره‌تی شه‌هیدان و ئه‌نفالكراوان: ئاماده‌كاری بۆ گه‌ڕانه‌وه‌ی 171 ڕووفاتی ئه‌نفالكراو له‌ بیابانه‌كانی سه‌ماوه‌ كراوه‌
2022-08-09 [02:44 AM]


وه‌زاره‌تی شه‌هیدان و ئه‌نفالكراوانی حكوومه‌تی هه‌رێمی كوردستان له‌ ڕوونكردنه‌وه‌یه‌كدا بۆ ڕای گشتی ئاشكرای كرد كه‌ ئاماده‌كاری ته‌واو كراوه‌ بۆ گه‌ڕانه‌وه‌ی ڕووفاتی 171 ئه‌نفالكراوی كورد له‌ بیابانه‌كانی سه‌ماوه‌.

وه‌زاره‌ته‌كه‌ ڕایگه‌یاند: ماوەیەكە لەلایەن كەسوكاری شەهیدان و قوربانییانی تاوانەكانی جینۆساید و ڕێكخراوەكانی كۆمەڵگای مەدەنی، پرسیار دەكرێت لەبارەی ڕووفاتی قوربانییانی تاوانەكانی ئەنفال كە لە گۆڕە بەكۆمەڵەكانی باشووری عێراق زیندەبەچاڵ كرابوون.

ڕاشیگه‌یاند: هەر لە سەرەتای دەستبەكاربوونی كابینەی نۆیەمی حكوومەتی هەرێمی كوردستان، وەزارەتی كاروباری شەهیدان و ئەنفالكراوان ئەركی گەڕان بەشوێن چارەنووسی قوربانییانی ئەو تاوانانە و دۆزینەوەی گۆڕە بەكۆمەڵەكان و دواتریش هەڵدانەوەیان لەچوارچێوەی تیمی نیشتمانی هەڵدانەوەی گۆڕەبەكۆمەڵەكانی عێراق، بەپێی یاسای پاراستنی گۆڕە بەكۆمەڵەكان ژمارە (5)ی ساڵی 2006، هێنانەوەی ڕووفاتی شەهیدەكانی بۆ كوردستان كردۆتە پێشینەی كارەكانی، لەو چوارچێوەیەشدا لە ساڵی 2019 و لەكاتی دۆزینەوەی ژمارەیەك گۆڕی بەكۆمەڵ لە بیابانی سەماوە و بە دیاریكراوی لەناوچەی (تل الشیخیە)، بەڕێوەبەرایەتی گۆڕە بەكۆمەڵەكانی وەزارەتمان بەهەماهەنگی دەزگای شەهیدانی عێراق تیمەكانیان ناردە شوێنی گۆڕەكان و بەشداربوون لە هەڵدادانەوەی گۆڕەكان و گواستنەوەی ڕووفاتی (171) شەهیدی جینۆسایدکراو بۆ پزیشكی دادی بەغدا بە مەبەستی ئەنجامدانی شیكاری و گرتنەبەری ڕێكارە یاسایی و زانستییەكان و دواتر هێنانەوەیان بۆ كوردستان.

ئاماژه‌ی به‌وه‌ش دا: بەڵام بەهۆی سەرهەڵدان و بڵاوبوونەوەی پەتای كۆرۆنا (کۆڤید ١٩) بۆ ماوەیەك ئەو كارە دواكەوت و پاش ڕەوینەوەی ئەو پەتایە وەزارەتمان بە هەماهەنگی لەگەڵ لایەنە پەیوەندارەكانی حكوومەتی هەرێمی كوردستان، ئامادەكاری پێویستی ئەنجام دا بۆ هێنانەوەی شكۆمەندانەی ڕووفاتەكان و بەخاكسپاردنەوەیان لە زێدی خۆیان.

جه‌ختیشی كرده‌وه‌: جارێكی تر شاندی وەزارەت و پزیشكی دادی هەولێر لە مانگی ئاداری ئەم ساڵدا سەردانی دەزگای شەهیدانی عێراقیان كرد و گفتوگۆ لەسەر ئەم بابەتە كرا و بڕیار درا لە ماوەیەكی نزیكدا لە ڕێوڕەسمێكی شایستەدا ئەو ئەركە نیشتمانییە بگاتە ئەنجام، بەڵام جێی داخە كە ژمارەیەك پەرلەمانتاری كورد لە ئەنجوومەنی نوێنەرانی عێراق و ژمارەیەك بەناوی كەسوكاری قوربانییان نامەی ناڕەزاییان لە گەڕاندنەوەی ڕووفاتەكان دایە دەزگای شەهیدانی عێراق، كە ڕازی نین بەو ڕێكارانەی پێشتر گیراونەتەبەر بۆ هێنانەوەی ڕووفاتی شەهیدانی گۆرە بەکۆمەڵەکان و شەهیدانی جینۆسایدكراو گرفتیان بۆ ئەو پڕۆسەیە دروست كرد.

وه‌زاره‌تی شه‌هیدان و ئه‌نفالكراوان هه‌روه‌ها ڕایگه‌یاند: بۆ ئەم مەبەستە وەزیری شەهیدان و ئەنفالكراوان كۆبوونەوەی لەگەڵ جێگری سەرۆك وەزیران كرد و تیایدا گفتوگۆی چڕوپڕ لەم بارەیەوە كرا و وەزارەتی شەهیدان و ئەنفالكراوان جەخت لەسەر پێویستی گەڕاندنەوەی ئەو ڕوفاتانە دەكاتەوە كە ژمارەیان (171) ڕووفاتە و هەموو ئامادەكارییەكیشی بۆ ئەم مەبەستە ئەنجامداوە و هەوڵەكانیش بەردەوام دەبێت بۆ هێنانەوەی ئەو ڕووفاتانە.





ئەم هەواڵە 409جار خوێندراوەتەوە
 
 
ڤیدیۆ گەلەری
ئه‌سپێك ره‌دووی ئه‌مبولانسێك ده‌كه‌وێت كه‌ برایه‌كه‌ی له‌ناودایه‌
لە شەقامێکی قەرەباڵغ منداڵێک لە سندوقی ئۆتۆمبێل دەکەوێتە خوارەوە
لێدانی سەدە ، تا ئێستا لێدانی وانەبووە
شه‌قامێك رۆده‌چێت و دوو ژن ده‌خوات
بەھرەیەکی سەرنج راکێشە
 
 

پێناسە | گەلەری | ئەرشیف | پەیوەندی

پێبژاردنی پۆلیسی هاتووچۆ هەولێر | دهۆک | سلێمانی

هەموو مافەکان پارێزراون بۆ ئاژانسی هەواڵی زاگرۆس

Developed By: Omed Sherzad