English | عربی | Kurdî دواهەواڵ
ڕاستەوخۆ  
 
موقته‌دا سه‌در: له‌گه‌ڵ گه‌نده‌ڵكاران و ئه‌وانه‌ی هه‌وڵی كوشتنم ده‌ده‌ن گفتوگۆ ناكه‌م
2022-08-20 [03:48 AM]

ZNA_ هەولێر


رێبه‌ری ره‌وتی سه‌در، له‌ تویتێكدا ئاشكرایكرد، دوای پێشكه‌شكردنی پڕۆژه‌ پێشنیازێك بۆ نه‌ته‌وه‌یه‌كگرتووه‌كان، له‌باره‌ی دانیشتن و گفتوگۆ، یاخود روبه‌روبوونه‌وه‌ی راسته‌وخۆ له‌گه‌ڵ نه‌یاره‌ سیاسییه‌كانمان، هیچ وه‌ڵامێكی ئه‌رێنیمان له‌وباره‌وه‌ پێنه‌گه‌یشت.

موقته‌دا سه‌در، رێبه‌ری ره‌وتی سه‌در، له‌ هه‌ژماری تایبه‌تی خۆی له‌ تۆڕی كۆمه‌ڵایه‌تی تویته‌ر، ئه‌مڕۆ (شه‌ممه‌ 20ـی ئاب/ئۆگێستی 2022)، رایگه‌یاند، وه‌ڵامی نه‌ته‌وه‌یه‌كگرتووه‌كان، جێبه‌جێكردنی داواكارییه‌كانی شۆڕشگێران نییه‌.

هه‌روه‌ها نووسیوویه‌تی: "داوا له‌هه‌موو لایه‌ك ده‌كه‌ین، له‌به‌رامبه‌ر سیاسه‌تی په‌راوێزخستنی گه‌لی عێراق، چاوه‌ڕێی هه‌نگاوی داهاتوومان بن".

ده‌شڵێت: "چاوه‌ڕێی ئه‌وه‌ نه‌بن دووباره‌ گفتوگۆی نهێنی ئه‌نجامبده‌ین و هیچ شتێك له‌گه‌له‌كه‌م ناشارمه‌وه‌، له‌گه‌ڵ گه‌نده‌ڵكاران و ئه‌وانه‌ی هه‌وڵی كوشتنم ده‌ده‌ن، گفتوگۆ و دانیشتن ناكه‌م".

دواجار موقته‌دا سه‌در، له‌ تویته‌كه‌یدا ده‌ڵێت: "له‌پێناو گه‌لی عێراق و ئاشتی كۆمه‌ڵایه‌تی، نه‌رمی زۆرم نواند".

رۆژی 25ـی ته‌مموزی 2022، چوارچێوەی هەماهەنگی (محەمەد شیاع سوودانی)، بۆ پۆستی سەرۆکوەزیرانی عێراق كاندیدكرد، به‌ره‌به‌یانی رۆژی شه‌ممه 30ـی ته‌مموز/ یۆلیۆی 2022‌، لایه‌نگرانی ره‌وتی سه‌در، دژی هه‌نگاوه‌كه‌ی چوارچێوه‌ی هه‌ماهه‌نگی، له‌ شه‌قامی كۆمارییه‌وه‌ به‌ره‌و ناوچه‌ی سه‌وز به‌رێكه‌وتن و به‌ربه‌سته‌كانیان لابرد و دواتر چوونه‌ ناو باڵه‌خانه‌ی په‌رله‌مانی عێراق.

مسته‌فا كازمی داوای له‌ خۆپیشانده‌ران و هێزه‌ ئه‌منییه‌كان كرد، ئارامی بپارێزن و دان به‌ خۆیاندا بگرن.

دواتر محەمەد حه‌لبووسی سەرۆکی په‌رله‌مانی عێراق، هەڵپەساردنی دانیشتنەکانی پەرلەمانی به‌هۆی خۆپیشاندانه‌كانه‌وه‌ راگەیاند.

رۆژی ‌ 6ـی ئاب/ ئۆگێستی 2022 باڵه‌خانه‌ی ئه‌نجوومه‌نی نوێنه‌ران راده‌ستی هێزه‌ ئه‌منییه‌كان كرایه‌وه‌، تا ئێستا خۆپیشاندان و مانگرتنی سه‌درییه‌كان، له‌ده‌ره‌وه‌ی باڵه‌خانه‌كه‌ به‌رده‌وامه‌.

 





ئەم هەواڵە 280جار خوێندراوەتەوە
 
 
ڤیدیۆ گەلەری
ئه‌سپێك ره‌دووی ئه‌مبولانسێك ده‌كه‌وێت كه‌ برایه‌كه‌ی له‌ناودایه‌
لە شەقامێکی قەرەباڵغ منداڵێک لە سندوقی ئۆتۆمبێل دەکەوێتە خوارەوە
لێدانی سەدە ، تا ئێستا لێدانی وانەبووە
شه‌قامێك رۆده‌چێت و دوو ژن ده‌خوات
بەھرەیەکی سەرنج راکێشە
 
 

پێناسە | گەلەری | ئەرشیف | پەیوەندی

پێبژاردنی پۆلیسی هاتووچۆ هەولێر | دهۆک | سلێمانی

هەموو مافەکان پارێزراون بۆ ئاژانسی هەواڵی زاگرۆس

Developed By: Omed Sherzad