English | عربی | Kurdî دواهەواڵ
ڕاستەوخۆ  
 
کشتوکاڵی هەولێر: ئەمساڵ جووتیاران 500 هەزار تۆن پەتاتەیان بەرهەمهێناوە
2022-09-09 [05:44 AM]

ZNA- هەولێر


بەڕێوەبەری گشتیی کشتوکاڵی هەولێر دەڵێت، جووتیارانی هەرێمی کوردستان پشتیان بە سیستمی ئاودێریی مۆدێرن بەستووە و ئەوەش هۆکارێگی گرنگە بۆ بەفیڕۆنەچوونی سامانی ئاو" و دەشڵێت: "بەرهەمی کشتوکاڵی ئەمساڵ هەمەڕەنگە و بەتەنیا پەتاتە هێندەی دانەوێڵە لە هەرێمی کوردستان بەرهەمهاتووە".

 

رۆژی هەینی، 9-9-2022 هێمن سەید موراد، بەڕێوەبەری گشتی کشتوکاڵی هەولێر  رایگەیاند: "هەنگاوی گەورە بۆ کەمکردنەوەی بەفیڕۆدانی ئاو لە کەرتی کشتوکاڵ نراوە و ئێستا جووتیاران کار بە سیستمەکانی دڵۆپە و پرژاندن بۆ ئاودێری بەروبوومەکانیان دەکەن، ئەوەش بە بەراورد لەگەڵ شێوازە کۆنەکەی ئاودێریکردن، بەفیڕۆدان کەمدەکاتەوە".

 

هێمن سەید موراد گوتی: "ئێستا سیستمی ئاودێریی پێشکەوتووتر هاتووەتە هەرێمی کوردستان کە بۆری کاغەزییە، ئەو بۆرییە بە قووڵایی 30 سانتیمەتر دەخرێتە ژێر خاک و بەردەوام شێ بۆ رەگی بەروبوومە کشتوکاڵییەکە دروستدەکات، لەو شێوازەدا بەراورد بە سیستمی دڵۆپە و پرژاندن، ئاو کەمتر بەفیڕۆ دەچێت".

 

بەڕێوەبەری گشتیی کشتوکاڵی هەولێر نایشارێتەوە کە کارکردن بەو سیستمانە خەرجی دەخاتە ئەستۆی جووتیاران، بەڵام ئەوان پابەندن بە بەکارهێنانی ئەو سیستمە ئاودێرییە نوێیانە و زۆربەیان پشتیان پێ بەستووە بۆ ئەوەی بەروبوومێکی بەپیتیان هەبێت.

 

بەگوتەی هێمن سەید موراد، ئەمساڵ سەرباری ئەوەی رێژەی باران بارین کەمتر بوو لە پار، بەڵام بەروبوومی کشتوکاڵی زیاتر بووە، لەبەرئەوەی بەشێک لە پێداویستییەکانیان بۆ جووتیاران دابین کردبوو، لەوانە قڕکەریان بەبێ بەرامبەر پێدابوون بۆ پاراستنی بەروبوومەکانیان.

 

لەبارەی ساخکردنەوەی بەروبوومی جووتیارانیش بەڕێوەبەری گشتیی کشتوکاڵی هەولێر دەڵێت: "ئەمساڵ بەتەنیا کارگەی دۆشاوی تەماتەی هەریر هەزار و 500 تۆن تەماتەی لە جووتیاران کڕیوەتەوە و کۆمەڵێک کارگەی دیکەش هەن کە رۆڵیان لە ساخکردنەوەی بەرهەمی تەماتەی جووتیاران هەیە. لەگەڵ ئەوەشدا رێککەوتنێکمان لەگەڵ حکومەتی عێراق کردووە بۆ ئەوەی جووتیارانی هەرێمی کوردستان بتوانن بەرهەمەکانیان رەوانەی خواروو و ناوەڕاستی عێراق بکەن".

 

هێمن سەید موراد باسی لەوەشکرد کە لە کۆتایی مانگی پێنجەوە تاوەکو ئێستا زۆربەی پێداویستییەکانی بازاڕی میوە و سەوزەی هەرێمی کوردستان بەروبوومی ناوخۆییە و بەشێکیشی هەناردەی عێراق کراوە و دەشڵێت: "بەرهەمی پەتاتە ئەمساڵ زیاتر لە 500 هەزار تۆن بووە".

 





ئەم هەواڵە 244جار خوێندراوەتەوە
 
 
ڤیدیۆ گەلەری
ئه‌سپێك ره‌دووی ئه‌مبولانسێك ده‌كه‌وێت كه‌ برایه‌كه‌ی له‌ناودایه‌
لە شەقامێکی قەرەباڵغ منداڵێک لە سندوقی ئۆتۆمبێل دەکەوێتە خوارەوە
لێدانی سەدە ، تا ئێستا لێدانی وانەبووە
شه‌قامێك رۆده‌چێت و دوو ژن ده‌خوات
بەھرەیەکی سەرنج راکێشە
 
 

پێناسە | گەلەری | ئەرشیف | پەیوەندی

پێبژاردنی پۆلیسی هاتووچۆ هەولێر | دهۆک | سلێمانی

هەموو مافەکان پارێزراون بۆ ئاژانسی هەواڵی زاگرۆس

Developed By: Omed Sherzad