English | عربی | Kurdî دواهەواڵ
ڕاستەوخۆ  
 
وەزارەتی کشتوکاڵ مەرجەکانی پێدانی قەرز بۆ جووتیاران و دەرچووانی زانکۆ بڵاودەکاتەوە
2022-09-27 [03:14 AM]

ZNA- هەولێر


وەزارەتی کشتوکاڵ و سەرچاوەکانی ئاوی هەرێمی کوردستان شەش مەرجی بۆ پێدانی قەرزی تایبەت بە جووتیاران و دەرچووانی کشتوکاڵی و ڤێتێرنەری راگەیاند. راوێژکارێکی وەزارەتەکەش دەڵێت، قەرزەکە دەبێتە هۆی بووژانەوەی کشتوکاڵ و ئاژەڵداری و پیشەسازی، "هەروەها هەلی کار بۆ چەندین کەس لە دەرەوەی ئەو سێکتەرانە دەڕەخسێنێت."

 

رۆژی سێشەممە، 27ـی ئەیلوولی 2022، وەزارەتی کشتوکاڵ و سەرچاوەکانی ئاوی هەرێمی کوردستان مەرج و رێنماییەکانی پێدانی قەرزی بە دەرچووانی کشتوکاڵ و ڤێتێرنەری و جووتیاران راگەیاند کە لە گشتاندنێکدا بۆ فەرمانگەکانی وەزارەتەکەی ناردووە.

 

لە نووسراوەکەی وەزارەتی کشتوکاڵ هاتووە: دوای واژۆکردنی یاداشتی لێکتێگەیشتن لەگەڵ بانکی (قرتاسی ئیسلامی) بەمەبەستی دابینکردنی قەرزی بانکی و پاڵپشتیی پڕۆژەکانی جووتیاران و دەرچووانی کشتوکاڵی و فێتێرنەری، ئەو رێنماییانەمان دەکرد:

 

1- وەرگرتنی مامەڵەی جووتیاران و دەرچووانی کشتوکاڵی و فێتێرنەری ئەوانەی کە خوازیارن سوودمەند بن بەمەبەستی دامەزراندنی پڕۆژەی بچووک و مامناوەند و بەرزکردنەوەی بۆ بەڕێوەبەرایەتیی کاروباری یاسایی لە دیوانی وەزارەت.

 

2- پشتگیریی بەڕێوەبەرایەتییە گشتییەکانمان لەگەڵ سەرجەم بەراییەکانی تایبەت بە پڕۆژەکە هاوپێچ دەکرێت، بەمەبەستی هەڵسەنگاندن و پەسندکردن و ئاراستەکردنی بۆ بانکی ناوبراو.

 

3- خاوەن بیرۆکە پێویستی بە (کەفیل)ێک دەبێت بۆ بانکی ناوبراو کە فەرمانبەری حکومەت بێت.

 

4- بڕی قەرزەکە لە 15 ملیۆن دەستپێدەکات تاوەکو 100 ملیۆن دیناری عێراقی دەبێت و بەگوێرەی ئاستی پڕۆژەکە، لەماوەی (1 ساڵ تاوەکو 5 ساڵ) قەرزەکە دەدرێتەوە و لەدوایی شەش مانگی یەکەمی سوومەندبوونی قەرزەکە.

 

5- کاری وەزارەتمان تەنیا هەڵسەنگاندن و پەسندکردن و پشتگیری و چاودێری پڕۆژەکانە لەڕووی هونەری و پێشخستن و دۆزینەوەی هەلی کار بۆ جووتیاران و دەرچووانی کشتوکاڵی و فێتێرنەری.

 

6- سەرجەم رێکارە کردارییەکان وەکو (یاسایی و دارایی و کارگێڕی) لە بانک لەگەڵ خاوەن پڕۆژەکە یەکلایی دەکرێنەوە.

 

لەبارەی قەرزەکەوە، رۆژی سێشەممە، 27ـی ئەیلوولی 2022، شەیما جەمال کوێخا، راوێژکاری وەزارەتی کشتوکاڵ و سەرچاوەکانی ئاوی هەرێمی کوردستان بە تۆڕی میدیایی رووداوی گوت: "قەرزەکە کراوە دەبێت، واتە تەنیا چەند کەسێکی دیاریکراو ناگرێتەوە، بەڵکو ژمارەکە دیاریکراو نییە، قەرزەکە دەبێتە هۆی بووژانەوەی کەرتی کشتوکاڵ و ئاژەڵداری و پیشەسازی و هەلی کار بۆ خەڵکانێکی زۆر دەڕەخسێنێت، تەنانەت ئەوانەشی دەرچووی ئەو کۆلێژ و بەشانەش نیین یان جووتیاریش نین."

 

رۆژی دووشەممە، 19ـی ئەیلوولی 2022، بە ئامادەبوونی بێگەرد تاڵەبانی، وەزیری کشتوکاڵ یاداشتی لێکتێگەیشتنی نێوان وەزارەت و بانکی (القرطاس)ی ئیسلامی بۆ پێدانی قەرزی بانکی بە جووتیاران و دەرچووانی کۆلێژی کشتوکاڵی واژۆ کرا.

 

بڕی قەرزەکە لەنێوان 15 ملیۆن بۆ 100 ملیۆن دینارە، ئەوانەی داوای قەرزەکە دەکەن، دەبێت پڕۆژە پێشکێش بکەن. لەڕێگەی لیژنەیەکەوە پڕۆژەکەیان هەڵدەسەنگێندرێت و بەپێی قەبارەی پڕۆژەکە، دەتوانێت پارە وەربگرێت.

 

بەپێی رێککەوتنەکە، ماوەی وەرگرتنەوەی پارەکەش لە دوای مانگی شەشەمی دروستکردنی پڕۆژەکە دەبێت، قەرزەکەش هیچ سوودێکی ناچێتە سەر و ماوەی دانەوەیشی پێنج ساڵ دەخایێنێت.

 

وەزارەتی کشتوکاڵ و سەرچاوەکانی ئاو دەیەوێت لەڕێگەی قەرزەکەوە پڕۆژە بچووک و مامناوەندەکان بۆ بووژانەوەی کەرتی کشتوکاڵ و ئاژەڵداری زیاد بکات و ئاستی بەرهەم لەو بوارەدا زیاد بکات.





ئەم هەواڵە 280جار خوێندراوەتەوە
 
 
ڤیدیۆ گەلەری
گڕكانی مایۆن له‌ فلپین
ئه‌سپێك ره‌دووی ئه‌مبولانسێك ده‌كه‌وێت كه‌ برایه‌كه‌ی له‌ناودایه‌
لە شەقامێکی قەرەباڵغ منداڵێک لە سندوقی ئۆتۆمبێل دەکەوێتە خوارەوە
لێدانی سەدە ، تا ئێستا لێدانی وانەبووە
شه‌قامێك رۆده‌چێت و دوو ژن ده‌خوات
 
 

پێناسە | گەلەری | ئەرشیف | پەیوەندی

پێبژاردنی پۆلیسی هاتووچۆ هەولێر | دهۆک | سلێمانی

هەموو مافەکان پارێزراون بۆ ئاژانسی هەواڵی زاگرۆس

Developed By: Omed Sherzad