English | عربی | Kurdî دواهەواڵ
ڕاستەوخۆ  
 
بەرزبوونەوەی بەهای دۆلار نرخی زێڕی دابەزاند
2022-11-14 [07:15 AM]

ZNA-هەولێر


نرخی نەوت ئەمڕۆ دووشەممە، 14-11-2022 لەدوای کردنەوەی بازاڕەکانی ئاسیا لەم هەفتەیەدا بە رێژەی 1٪ بەرزبووەوە. هۆکارەکەی کرانەوەی زیاتری چین و لادانی بەربەستەکانی هاتووچۆیە. هاوکات نرخی زێڕ بەهۆی بەرزبوونەوەی بەهای دۆلار، کەمێک دابەزی. 

 

نرخی نەوتی برێنتی دەریای باکوور 87 سەنت بەرزبووەوە و بە 96 دۆلار و 86 سەنت مامەڵەی پێوەکرا. نرخی نەوتی سووکی تێکساسی ئەمریکاش 80 سەنت بەرزبووەوە و بە 89 دۆلار و 76 سەنت مامەڵەی پێوەکرا.

 

هۆکاری بەرزبوونەوەی نرخی نەوت، ئەمڕۆ دووشەممە بۆ کرانەوەی زیاتری چین و لادانی بەربەستەکانی هاتووچۆ دەگەڕێتەوە کە گەشبینی دروستکردووە بەوەی ئابووریی ئەو وڵاتە لەوە بەدواوە بەرەو گەشەسەندنی زیاتر بڕوات و بەو پێیەش خواست بۆ بەکارهێنانی نەوت زیاد بکات.

 

لە چەند هەفتەی رابردوودا، بەهۆی بەرزبوونەوەی ژمارەی تووشبووان بە ڤایرۆسی کۆرۆنا، حکومەتی ئەو وڵاتە رێوشوێنی تووندی بۆ هاتووچۆ گرتبووەبەر.

 

ستێڤن ئێنەس، شرۆڤەکاری سەر بە کۆمپانیای راوێژکاریی (ئێس پی ئای ئەسێت مانەجمێنت) لەو بارەیەوە رایگەیاند، "نرخی نەوت و کانزاکان بەرزبووەتەوە، دوای ئەوەی ئاژانسی تەندروستیی چین رێوشوێنەکانی خۆی لە دژی تەشەنەکردنی ڤایرۆسی کۆرۆنا هەموارکردەوە."

 

لەلایەکی دیکەوە کۆمپانیای راوێژکاریی ING رایگەیاند، هەرچەندە چین بەربەستەکانی هاتووچۆی کەمکردوونەوەتەوە، بەڵام بازاڕی نەوت پێویستی بەوەیە هێشتا ئەو وڵاتە ئاسانکاریی زیاتر بۆ هاتووچۆی هاووڵاتییان بکات.

 

نرخی هەر ئۆنسەیەک زێڕ بۆ 1760 دۆلار دابەزی

 

ئەمڕۆ نرخی زێڕ دابەزی و نەیتوانی درێژە بە ئاستە بەرزەکانی سێ هەفتەی رابردووی خۆی بدات، هەر ئۆنسەیەک بە رێژەی %0.5 دابەزی و بە 1760 دۆلار مامەڵەی پێوەکرا.

 

دابەزینی نرخی زێڕ بەهۆی بەرزبوونەوەی بەهای دۆلارەوە روویداوە.

 

نرخی زێڕ هەفتەی رابردوو گەورەترین بەرزبوونەوەی هەفتانەی خۆی لە ماوەی دوو ساڵی رابردوودا بەخۆیەوە بینی، دوای ئەوەی بەهای دۆلار بەرامبەر بە دراوەکانی دیکە بە رێژەیەکی بەرچاو دابەزی.

 

کردنەوەی بازاڕەکانی ئاسیا لەم هەفتەیە هاوکاتە لەگەڵ بەرزبوونەوەی بەهای دۆلار بە رێژەی 0.4٪، بەپێی شرۆڤەکاران، بەرزبوونەوەی تەنانەت ئەو رێژە کەمە لە بەهای دۆلار بەرامبەر بە دراوەکانی دیکە بووەتە هۆکار بۆ دابەزینی نرخی زێڕ.

 

نرخی دۆلار بەرامبەر دراوە جیهانییەکان: 
 
100 دۆلار بەرامبەرە بە 148 هەزار و 125 دیناری عێراقی
 
یۆرۆ - دۆلار 1.03 EUR/USD
 
پاوەند - دۆلار 1.17 GBP/USD
 
دۆلار - لیرە 18.56 USD/TRY
 
یەک دۆلار - ریاڵ (تمەن) 35 هەزار و 500 تمەن USD/IRR
 
یەک دۆلاری ئەمریکی: 60.33 روبڵی رووسی

 





ئەم هەواڵە 262جار خوێندراوەتەوە
 
 
ڤیدیۆ گەلەری
گڕكانی مایۆن له‌ فلپین
ئه‌سپێك ره‌دووی ئه‌مبولانسێك ده‌كه‌وێت كه‌ برایه‌كه‌ی له‌ناودایه‌
لە شەقامێکی قەرەباڵغ منداڵێک لە سندوقی ئۆتۆمبێل دەکەوێتە خوارەوە
لێدانی سەدە ، تا ئێستا لێدانی وانەبووە
شه‌قامێك رۆده‌چێت و دوو ژن ده‌خوات
 
 

پێناسە | گەلەری | ئەرشیف | پەیوەندی

پێبژاردنی پۆلیسی هاتووچۆ هەولێر | دهۆک | سلێمانی

هەموو مافەکان پارێزراون بۆ ئاژانسی هەواڵی زاگرۆس

Developed By: Omed Sherzad