English | عربی | Kurdî دواهەواڵ
ڕاستەوخۆ  
 
بەرەنگاربوونەوەی تووندوتیژیی دژی ژنان: ساڵی رابردوو 68 ژن لە هەرێمی کوردستان کوژراون
2023-01-11 [11:33 AM]

ZNA-هەولێر


بەڕێوەبەری گشتیی بەرەنگاربوونەوەی تووندوتیژیی دژی ژنان و خێزان دەڵێت، "لێدان" باوترین جۆری تووندوتیژییە لە هەرێمی کوردستان. دەشڵێت، "ساڵی رابردوو 68 ژن لە هەرێمی کوردستان کوژراون." 

 

رۆژی سێشەممە،10-01-2023، فێنک شەفیق، بەڕێوەبەری گشتیی بەرەنگاربوونەوەی تووندوتیژیی دژی ژنان و خێزان  لەبارەی ژمارە و چۆنێتیی تووندوتیژیی بەرامبەر ژنانی هەرێمی کوردستان گوتی: ''لە 11 مانگی ساڵی 2022دا نزیکەی 14 هەزار و 945 سکاڵای تووندوتیژیمان بۆ هاتوون کە سکاڵای لێدان لەناو خێزان بەراورد بە سکاڵاکانی دیکە زۆر بەرچاوترە.'' 

 

فێنک شەفیق باسی لە تووندوتیژیی خێزانی و کوژرانی ژنان لە هەرێمی کوردستان کرد و گوتی: ''ساڵی رابردوو 68 ژن لە هەرێمی کوردستان کوژراون یان خۆیان کوشتووە؛ هەروەها 80 ژن هەڵخەڵەتێندراون و 63 ژنیش ناپاکیی هاوژینییان بەرامبەرکراوە.''

 

بەڕێوەبەری گشتیی بەرەنگاربوونەوەی تووندوتیژیی دژی ژنان ئاماژەی بەوە کرد کە توندوتیژییەکان جۆراوجۆرن و ''دابەش دەبن بەسەر توندوتیژییەکانی نێو خێزان، دەرەوەی خێزان، تووندوتیژیی پیاوان بەرامبەر ژنان، تووندوتیژیی ژنان بەرامبەر پیاوان، هەروەها توندوتیژیشمان هەیە کە لەلایەن ژنانەوە بەرامبەر ژنان ئەنجام دەدرێت.''

 

فێنک شەفیق لەبارەی تووندوتیژی لە جۆری لێدان دەڵێت: "ئێمە سکاڵامان بۆ هاتووە کە چەندین تووندوتیژی بەرامبەر ئافرەت ئەنجامدرواە و نەک تەنیا لێدان، بەڵکو لەبواری دەروونیشەوە توندوتیژی کراوە". 

 

ئەو بەڕێوەبەرە باسی لە رێگەکانی تۆمارکردنی سکاڵا کرد و گوتی: ''بەڕێوەبەرایەتیی ئێمە لەسەر ئاستی هەرێمی کوردستان لە رێگەی تیمی مۆبایل، هێڵی گەرمی 119، سەنتەری راوێژکاریی خێزانی و ئاشتەوایی، ئاماری سکاڵاکان وەردەگرێت؛'' هەروەها باسی لەوەکرد کە لەگەڵ رێکخراوی نەتەوەیەکگرتووەکان لە پەیوەندیدان و سەردانی کەمپی ئاوارەکان دەکەن و لەو رێگەیەشەوە هەندێ کەس سکاڵای خۆیان تۆمار دەکەن. 

 

فێنک شەفیق ئاماژەی بە گرنگیی هێڵی 119 کرد و گوتی، ئەو هێڵە سەر بە وەزارەتی ناوخۆیە و لەلایەن بەڕێوەبەرایەتیی بەرەنگاربوونەوەی تووندوتیژیی دژی ژنان و خێزان بەڕێوەدەبرێت و ئەو کەسانەی کە هەڕەشەیان لێدەکرێت، دەتوانن بۆ تۆمارکردنی سکاڵا پەیوەندی بەو هێڵەوە بکەن.

 

بەڕێوەبەری گشتیی بەرەنگاربوونەوەی تووندوتیژیی دژی ژنان لەبارەی گلەیی هەندێک لە هاونیشتمانییان کە دەگوترێت کاتێکی زۆر پێدەچێت تاوەکو هێڵە گەرمەکان وەڵامی سکاڵا دەدەنەوە، دەڵێت، ئەو گلەییە دەگەڕێتەوە بۆ ناشارەزابوونی هاونیشتمانییانی سکاڵاکەر لە پەیوەندی لەگەڵ هێڵە گەرمەکان.

 

بەڕێوەبەرەکە باسی لە هەڕەشەکان کرد و گوتی: ''ئەوانەی هێرشیان دەکرێتە سەر، زۆربەی هێرشەکان لە جۆری ئەلیکترۆنی، هاککردن و بردنی وێنەکانی کوڕان و کچانە.'' هەروەها گوتیشی، ئەو کەسانە لەگەڵ هێڵی 119 قسە دەکەن، بەڵام کە دەگوترێت بەرامبەر ئەو هێرشە سکاڵا تۆمار بکەن، رەتیدەکەنەوە.

 

فێنک شەفیق لەبارەی ئەو کەسانەی هەڕەشەیان لێکراوە و سکاڵایان تۆمارکردووە، گوتی: ''لە زیاتر لە 3 هەزار کەس کە قسەیان لەگەڵ هێڵی گەرمی 119 کردووە و هەڕەشەیان لێکراوە، تەنیا 293 کەس سکاڵایان تۆمار کردووە و هۆکارەکەشی دەگەڕێتەوە بۆ ئەوەی ترسیان هەیە لە دەستگیرنەکردنی تۆمەتباران".

 

 

 

روداو





ئەم هەواڵە 202جار خوێندراوەتەوە
 
 
ڤیدیۆ گەلەری
گڕكانی مایۆن له‌ فلپین
ئه‌سپێك ره‌دووی ئه‌مبولانسێك ده‌كه‌وێت كه‌ برایه‌كه‌ی له‌ناودایه‌
لە شەقامێکی قەرەباڵغ منداڵێک لە سندوقی ئۆتۆمبێل دەکەوێتە خوارەوە
لێدانی سەدە ، تا ئێستا لێدانی وانەبووە
شه‌قامێك رۆده‌چێت و دوو ژن ده‌خوات
 
 

پێناسە | گەلەری | ئەرشیف | پەیوەندی

پێبژاردنی پۆلیسی هاتووچۆ هەولێر | دهۆک | سلێمانی

هەموو مافەکان پارێزراون بۆ ئاژانسی هەواڵی زاگرۆس

Developed By: Omed Sherzad