English | عربی | Kurdî دواهەواڵ
ڕاستەوخۆ  
 
فه‌ره‌نسا ژماره‌یه‌ك ئافره‌ت و منداڵی چه‌كدارانی داعش ده‌گه‌ڕێنێته‌وه‌ وڵاته‌كه‌ی
2023-01-24 [07:31 AM]

ZNA-هەولێر


ئه‌مڕۆ سێشه‌ممه‌ (24ـی كانوونی دووه‌م/یه‌نایه‌ری 2023)، وه‌زاره‌تی ده‌ره‌وه‌ی فه‌ره‌نسا له‌ راگه‌یه‌ندراوێكدا ئاماژه‌ی به‌وه‌كردووه‌، "فه‌ره‌نسا 15 ئافره‌ت و 32 منداڵی چه‌كدارانی داعش له‌ سووریا ده‌گه‌ڕێنێته‌وه‌ وڵاته‌كه‌ی."

به‌گوێره‌ی راگه‌یه‌ندراوه‌كه‌ی وه‌زاره‌تی ده‌ره‌وه‌ی فه‌ره‌نسا، ئه‌و ئافره‌ت و منداڵانه‌ی چه‌كدارانی داعش كه‌ گه‌ڕێندراونه‌ته‌وه‌، له‌ناو ژماره‌یه‌ك‌ كه‌مپی "باكووری رۆژهه‌ڵاتی سووریا"دا ده‌ژیان.

 له‌ راگه‌یه‌ندراوه‌كه‌ی وه‌زاره‌تی ده‌ره‌وه‌ی فه‌ره‌نسادا هاتووه‌، "منداڵه‌‌كان راده‌ستی لایه‌نه‌ تایبه‌تمه‌ندییه‌كان ده‌كرێن بۆ ئه‌وه‌ی به‌دواداچوونی كۆمه‌ڵایه‌تی و پزیشكییان بۆ بكرێت و مێردمنداڵه‌كانیش راده‌ستی ده‌سه‌ڵاتی دادوه‌ری تایبه‌تمه‌ند ده‌كرێن".

ئه‌مه‌ له‌ كاتێكدایه‌، رۆژی یه‌كشه‌ممه‌ (8ـی كانوونی دووه‌م/یه‌نایه‌ری 2023)، رۆژنامه‌ی زه‌ سه‌بیكتاتۆری به‌ریتانی له‌ راپۆرتێكدا ئاشكرایكرد، رێكخراوی داعش دوای چوار ساڵ له‌ شكستهێنانی، جارێكی دیکە ده‌گه‌ڕێته‌وه‌ ‌و  شێواز و تاكتیكی پێکهێنانی شانه‌ نووستووه‌كانی گۆڕیوه‌ و هێرشی خوێناوی له‌ عێراق و سووریا ئه‌نجام ده‌ده‌ن.

له‌ راپۆرته‌كه‌دا هاتووه‌، شه‌ڕی دژ به‌ تیرۆر كۆتایینه‌هاتووه‌ و ترسی‌ دووباره‌بوونه‌وه‌ی داعش بۆ ئه‌و نه‌وه‌ نوێیه‌ی داعش ده‌گه‌ڕێته‌وه‌ كه‌ له‌ كه‌مپی هۆل ده‌ژین، به‌جۆرێك مانگانه‌ 80 منداڵ له‌كه‌مپه‌كه‌دا له‌دایك ده‌بن، ئێستا نزیكه‌ی 60 هه‌زار ژن و منداڵ له‌ كه‌مپه‌كانی باكووری رۆژئاوای سووریا نیشتەجێکراون، كه‌ نیوه‌یان له‌سه‌رووی ته‌مه‌نی 18 ساڵییه‌وه‌ن. ئه‌م ژماره‌ زۆره‌ی گیراوان مه‌ترسی دروستبوونی نه‌وه‌ی دووه‌می داعشی لێده‌كرێت و به‌رده‌وام رێكخراوه‌كه‌ هه‌ڕه‌شه‌ی ئازادكردنیان ده‌كات.

راپۆرته‌كه‌ روونیكردووه‌ته‌وه‌، رێكخراوی داعش به‌رپرسیارێتی زیاتر له‌ 500 هێرشی تیرۆریستی لە ئەستۆ گرتووه،كه‌ له‌ خاكی عێراق و سووریا ئه‌نجامدراوه‌، ئه‌مه‌ش به‌ڵگه‌ی حاشاهه‌ڵنه‌گره‌ له‌سه‌ر به‌رده‌وامی مه‌ترسییه‌كانی داعش له‌ناوچه‌كه‌دا.

ئاماژه‌ به‌وه‌كراوه‌، رێكخراوه‌كه‌ گۆڕانكاری له‌ پلان و شێوازی دروستكردنی شانه‌ نووستووه‌كانیان بۆ ئه‌نجامدانی هێرشی كردووه‌، له‌وانه‌ به‌شێك له‌ چه‌كدارانی داعش له‌ناوچه‌ جیاجیاكان و له‌ ناوچه‌ بیابانییه‌ فراوانه‌كان و ناوچه‌ چیاییه‌كاندا خۆیان حه‌شار ده‌ده‌ن، به‌شی زۆری ئه‌و هێرشانه‌ی ئه‌نجامیده‌ده‌ن خوێناوین، به‌جۆرێك له‌ كانوونی یه‌كه‌می ساڵی رابردوو له‌عێراق و سووریا 45 كه‌سیان له‌ڕێگه‌ی سووتاندن و به‌ ئامانجگرتنی كاروانه‌ سه‌ربازییه‌كانه‌وه‌ كوشتووه‌. ئه‌مه‌ش زه‌نگی مه‌ترسیداره‌ له‌باره‌ی زیادبوونی كرده‌وه‌ی تیرۆریستی ‌.

بەگوێرەی راپۆرتەکە زیاتر له‌ 30 هه‌زار چه‌كداری رێكخراوه‌كه‌ له‌ عێراق و سووریا له‌ به‌ندینخانه‌كاندان، ئه‌م سوپایه‌ له‌ هاووڵاتیانی ده‌یان وڵاتی جیهان پێكهاتوون‌ و ئاماده‌نین وه‌ریانبگرنه‌وه‌ و رێكخراوه‌كه‌ش مێژووییه‌كی دوورو درێژی له‌ هێرشكردنه‌ سه‌ر به‌ندینخانه‌كان و رزگاركردنی گیراوانی دا هه‌یه‌، عێراقی و سوورییەکان سێ لەسەر چواری ئەو 60 هەزار دەستگیرکراوە پێکدەهێنن.

هاوكات له‌كه‌مپ و گرتووخانه‌كانی سووریادا 10 هه‌زار سه‌ربازی وڵاتان هه‌ن‌، سه‌ره‌ڕای هه‌وڵه‌ نێوده‌وڵه‌تییه‌كان ته‌نیا توانراوه‌ 537 چه‌كداری بیانی بگه‌ڕێندرێنه‌وه‌، به‌جۆرێك رێژه‌ی گه‌ڕانه‌وه‌ی بیانییه‌كان 0.5% تێپه‌ڕ ناكات و ئه‌گه‌ر پرۆسه‌كه‌ به‌مشێوه‌یه‌ بڕوات، ئه‌وا پێویستی به‌ 30 ساڵه‌ تاوه‌كو تەواوی چه‌كداره‌كان دەگەڕێندرێنە.





ئەم هەواڵە 112جار خوێندراوەتەوە
 
 
ڤیدیۆ گەلەری
گڕكانی مایۆن له‌ فلپین
ئه‌سپێك ره‌دووی ئه‌مبولانسێك ده‌كه‌وێت كه‌ برایه‌كه‌ی له‌ناودایه‌
لە شەقامێکی قەرەباڵغ منداڵێک لە سندوقی ئۆتۆمبێل دەکەوێتە خوارەوە
لێدانی سەدە ، تا ئێستا لێدانی وانەبووە
شه‌قامێك رۆده‌چێت و دوو ژن ده‌خوات
 
 

پێناسە | گەلەری | ئەرشیف | پەیوەندی

پێبژاردنی پۆلیسی هاتووچۆ هەولێر | دهۆک | سلێمانی

هەموو مافەکان پارێزراون بۆ ئاژانسی هەواڵی زاگرۆس

Developed By: Omed Sherzad