2023-01-30 [06:07 AM]

بەرەبەیانی ئەمڕۆ دووشەممە لە دوای کردنەوەی بازاڕەکانی ئاسیا، نرخی هەر ئۆنسەیەک زێڕ نەیتوانی بەربەستی 1930 دۆلار بشکێنێت و لەنێوان 1925 دۆلار بۆ 1930 دۆلار مامەڵەی پێوەکرا.

لە دوایین رۆژی مامەڵەکان لە هەفتەی رابردوو لە رۆژی هەینی بەهۆی نیگەرانی لە ئامارەکانی هەڵاوسان و نرخەکانی بەکاربەر و هەروەها کۆمەڵێک ئاماری دیکەی پەیوەست بە ئابووریی ئەمریکا، نرخی زێڕ لە نزیکەی 1950 دۆلارەوە دابەزی بۆ نزیکەی 1930 دۆلار.

بازرگانانی زێڕ نیگەرانن لەوەی کە ئامارە ئەرێنییەکانی پەیوەست بە ئابووریی ئەمریکا کە هەفتەی رابردوو بڵاوبوونەوە کاریگەری لەسەر بڕیاری بانکی ناوەندیی ئەمریکا لەم هەفتەیەدا دروستبکەن.

بەپێی شرۆڤەکارانی بازاڕی زێڕ، نرخی ئاستی 1950 دۆلار بووەتە بەربەستێکی گەورە لە بەردەم بەرزبوونەوەی نرخی زێڕ و ئاستی 1918 دۆلاریش بە ئاستێکی گرنگی بەرگری هەژمار دەکرێت کە دەتوانێت رێگری بکات لە دابەزینی زیاتری نرخی ئەو کانزایە.

بەپێی ماڵپەری (ئێف ئێکس ستریت) شکاندنی هەر یەکە لەو ئاستانە رێگە بۆ گۆڕینی ئاراستەی نرخی زێڕ خۆشدەکات و ئەگەر نرخی زێر بتوانێت 1950 دۆلار تێپەڕێنێت، دەکرێت زیاتریش بەرزبێتەوە بۆ نزیکەی 2000 دۆلار.

بە پێچەوانەوە گەڕانەوەی نرخی زێڕ بۆ ئاستی 1900 دۆلار لە کاتی دابەزینی زیاتری نرخی زێڕ، یەکێکە لە سیناریۆ بەهێزەکان. هەمووی ئامانە پەیوەستە بە بڕیاری بانکی ناوەندیی ئەمریکا لەسەر سوودی بانکی لە کاژێر 09:00ـی شەوی ئەم چوارشەممەیە بە کاتی هەولێر. 

ئەوە دەبێتە یەکەم کۆبوونەوەی بانکی ناوەندیی ئەمریکا لە ئەمساڵدا و هەر چەشنە بەرزکردنەوەی سوودی بانکی لە سەرووی 0.25٪ وە دەتوانێت نرخی زێڕ بەرێژەیەکی بەرچاو دابەزێنێتەوە بۆ تەنانەت خوارەوەی 1900 دۆلار.