2023-02-12 [02:34 AM]

حكوومەتی عێراق، وەزارەتی بازرگانی رادەسپێرێ، بە زووترین كات پرۆگرامی كارتی بەشەخۆراك تەواو بكات و ڕێوشوێنی بەپەلەش بۆ دابینكردنی كەلوپەلی بەشەخۆراك لە مانگی ڕەمەزاندا بگرێتە بەر.

نووسینگەی ڕاگەیاندنی سەرۆك وەزیرانی عێراق، لە ڕاگەیەندراوێكدا بڵاویكردەوە: "ئەمڕۆ محەمەد شیاع سوودانی، سەرۆك وەزیرانی عێراق، سەرپەرشتیی كۆبوونەوەیەكی تایبەت بە گفتوگۆكردن لەسەر كارتی بەشەخۆراكی كرد، ئەویش بە ئامادەبوونی وەزیری بازرگانی و بەڕێوەبەری گشتیی كۆمپانیای گشتیی بازرگانیی خۆراك و سەرۆكی دەستەی ڕاوێژكاران لە دیوانی سەرۆكی حكوومەت، لە كۆبوونەوەكەدا بەرنامەیەكی ئەلیكترۆنی خرایە ڕوو، كە بریتییە لە پەسەندكردنی كارتێكی ئەلیكترۆنی بۆ هەر سەرۆك خێزانێك، كە بەشەخۆراكی مانگانەی هەیە."

بەپێی بەیاننامەكە: "سوودانی، وەزارەتی بازرگانی راسپاردووە، بەمەبەستی وەستاندنی بەهەدەردانی پارەی گشتی، بەزووترین كات ئەو بەرنامەیە تەواو بكات."

جەختیش كراوەتەوە كە: "لە كۆبوونەوەكەدا بە ڕێنوێنی سەرۆكی حكوومەت، بڕیارد را بۆ گرتنەبەری ڕێوشوێنی بەپەلە، بۆ دابینكردنی كەلوپەلی بەشەخۆراك لە مانگی ڕەمەزانی پیرۆز، بۆ سەرجەم هاووڵاتییان و خەڵكی هەژار، كە دەستەی پاراستنی كۆمەڵایەتی دەیانگرێتەوە، بڕیاری گونجاویش لەوبارەیەوە درا."

حكوومەتی عێراق ئاشكرای كردووە، جێبەجێكردنی ئەلیكترۆنیی نوێ بۆ بەشەخۆراك بە شێوەیەكە، ناوی مردوان و دانیشتوانی دەرەوەی عێراق و هەموو ناوێكی خەیاڵی ئاشكرا دەكات و ئەو ناوانەش ئاشكرا دەكات، كە بە راستەقینەیی بەشەخۆراك وەردەگرن.

لای خۆیەوە، نەوزاد شێخ كامیل، بەڕێوەبەری گشتیی بازرگانی لە وەزارەتی بازرگانی و پیشەسازیی حكوومەتی هەرێمی كوردستان،  ڕایگەیاند: "هەر بڕیار و رێنوێنییەكی تازە بۆ بەشەخۆراك و پسوولەی خۆراك لە عێراق دەربچێت، هەرێمی كوردستانیش دەگرێتەوە و ئێمەش لە هەرێمی كوردستان بەپێی بڕیارەكانی وەزارەتی بازرگانیی عێراق، بەشەخۆراك دابەش دەكەین."

جەختیشی كردەوە، هەندێك كۆبوونەوە و بابەتی پراكتیكی كراون، بۆ ئەوەی بەشەخۆراك لە رێگەی كارتی ئەلیكترۆنی دابەش بكرێت.

بەڕێوەبەری گشتیی بازرگانی ڕوونی کردەوە، لە ساڵی 2022دا پێنج بەشەئارد و 11 بەشەخۆراک دابەش كراو،.

شوان به‌رزنجی