2023-02-12 [04:49 AM]

لەگەڵ نزمبوونەوەی پلەکانی گەرمای شانشینی یەکگرتوو، دەسەڵاتدارانی تەندرووستیی ئەو وڵاتە چەند ڕێنماییەکیان دەرکردووە و تێیدا هۆشدارییان بە تووشبووانی نەخۆشیی شەکرەداوە خۆیان لە کەشی سارد بپارێزن

. بەپێی هەواڵێکی ماڵپەڕی سکای نیوز، دامەزراوەی خێرخوازیی بەریتانی چەند ئامۆژگاریەکی لەبارەی چۆنیەتی مامەڵەکردنی ئەو کەسانەی نەخۆشی شەکرەیان هەیە لە کەشوهەوای سارددا دەرکردووە

. لەوبارەیەوە دۆگلاس توینفۆر، سەرۆکی بەشی چاودێریی لە ناوەندی چاودێریی نەخۆشانی شەکرەی بەریتانیا دەڵێت: بەڕاستی گرنگە گەرم بمێنیتەوە، چونکە سەرما ئەگەری تووشبوون بە جەڵتەی دڵ و جەڵتەی مێشک زیاد دەکات، نەخۆشی شەکرەش زیاتر مرۆڤ دەخاتە مەترسییەوە بۆ تووشبوون بەو لێکەوتانە

. وتوشیەتی: پابەندی ئامۆژگارییەکان بن و ماڵەکەت گەرم بکەنەوە بۆ لانیکەم 18 پلەی سەدی لەو ژوورانەی کە بە بەردەوامی بەکاریان دەهێنیت و پەنجەرەی ژووری نووستن لە شەودا بە داخراوی بهێڵەرەوە.

هەربەپێی ڕێنماییەکان، چاودێریی ئاستی شەکری ناو خوێنت بکە و ئامادەبە بۆ دەستکاریکردنی سیستەمی خۆراکیت یان ژەمی ئەنسۆلین، هەروەک بۆ ئەگەری بوونی هەر کێشەیەک پشکنین بۆ پێیەکانت بکەن و بەباشی ئاگاداری دەرمانەکانت بە

. لەڕێنماییەکاندا هەر ئەوانەی نەخۆشیی شەکرەیان هەیە داوایان لێنەکراوە لەکەشی سارددا ئاگاداری خۆیان بن، بەڵکو ئەوانەشی بەدەست نەخۆشییەکانی وەک رەبۆ و نەخۆشییەکانی تری سییەکانەوە دەناڵێنن داوایان لێکراوە کە پێویستە زۆر وریای خۆیان بن

. دکتۆر ئیریکا ڕادفۆرد دەڵێت: "سەرما دەبێتە هۆی توندکردنی تەنگەنەفەسی و مەترسیی جددی لە کەسانی تووشبوو بە نەخۆشییەکانی تری سییەکان". باسی لەوەشکردووە کە زۆر گرنگە چەند پارچە جلێکی ئەستوور لەبەر بکرێت و جەستە بەباشی دابپۆشرێت، جگە لەوەی خواردنەوە گەرمەکانیش گەلێک سودیان هەیە

. لە درێژەی قسەکانیدا وتویەتی: بەو پێیەی هەوکردنی ڤایرۆسی دەتوانێت نیشانەکانی نەخۆشیی هەناسەدان توندتر بکات، بۆیە باشتر وایە خۆت بەدوور بگرێت لە بەرکەوتن لەگەڵ ئەو کەسانەی کە تووشی ئەنفلۆنزا یان هەڵامەت بوون".