2023-03-11 [02:14 AM]

وەزیری تەندروستی وردەكاریی پرۆژەیاسای بیمەی تەندروستی دەخاتە ڕوو و دەڵێت: بەهۆی یاساكە خەرجی لەسەر هاووڵاتییان كەم دەبێتەوە و كاتێك هاووڵاتییەك نەخۆش دەبێت، پێویست ناكات خەرجییەكی زۆر بكات، هەروەها كەمدەرامەتان و كرێكاران و كەسوكاری شەهیدان و پێشمەرگە و كۆمەڵێك چین و توێژ و فەرمانبەران، خاوەنی بیمە و دڵنیایی تەندروستی دەبن.

د. سامان بەرزنجی، وەزیری تەندروستیی حکوومەتی هەرێمی کوردستان، ڕایگەیاند: "چەند پڕۆژەیەكی بواری تەندروستیمان  پێشكەش بە ئەنجوومەنی وەزیان و پەرلەمان كردووە كە بریتین لە دوو پرۆژەیاسا لە پەرلەمانی كوردستان، کە دوای پەسەندكردنیان، دەرچوون و یەكێكیان بەرەنگاربوونەوەی ماددە هۆشبەرەكانە، دووەمیشیان مافی نەخۆش و پەیڕەوی مافی نەخۆش دانراوە، بەڵام ئێستا پرۆژەیاسای وەزارەتی تەندروستی وەكوو پرۆژەیاسایەكی نوێ‌ و پرۆژەیاسای مافی پزیشكان و پرۆژەیاسای ئەنجوومەنی پزیشكی و چەند پرۆژەیاسایەكی دیكە.''

ئەو باسی لە لە ئامادەكردنی پرۆژەیاسایەكی گرنگ كرد و گوتی: "چەند چاكسازییەكی دیكە هەیە و كاری لەسەر دەكەین ئەوانەی زۆر گرنگن یەكێكیان ڕەشنووسی پرۆژەیاسای بیمەی تەندروستییە و ئامادەیە و لە ئایندەیەكی زۆر نزیكدا ڕەوانەی ئەنجوومەنی وەزیرانی دەكەین كە پڕۆژەیەكی گرنگ و ستراتیژییە.''

لەبارەی گرنگی پڕۆژەی بیمەی تەندروستی گوتی: "ئەو پڕۆژەیە چەترێكە بۆ باشتركردنی خزمەتگوزاری و بەڕێوەبردنی كەرتی تەندروستی، هەم بۆ هاووڵاتییان هەم بۆ سیستەمی تەندروستی چەندین ئامانج دەپێكێت، گرنگترینیان هاوسەنگیی خزمەتگوزاریی تەندرستی دەهێنێـە دی بۆ هەموو هاووڵاتییان بەبێ جیاوازی لە نێوان هەژار و دەوڵەمەند، بە كوالێتییەكی باش و بەرز خزمەتگوزارییەكان پێشكەش دەكرێت، دووەم ئامانجیش بەرزكردنەوەی كێبڕكێی كوالێتییە لە نێوان نەخۆشخانەكاندا.''

زیاتر گوتیشی: "سێیەم ئامانجی پرۆژەیاساكە كەمكردنەوەی خەرجییە لەسەر هاووڵاتییان، بۆ نموونە كاتێك هاووڵاتییەك نەخۆش دەبێت پێویست ناكات خەرجییەكی زۆر بكات، بەڵكوو بە خەرجییەكی كەم چارەسەری خۆی دەكات لە بواری دەرمان و نەشتەرگەریدا، هەروەها كەمدەرامەتان و كرێكاران و كەسوكاری شەهیدان و پێشمەرگە و كۆمەڵێك چین و توێژ و فەرمانبەران خاوەنی بیمە و دڵنیایی تەندروستی دەبن.

وەزیری تەندروستی جەختی كردەوە پڕۆژەكە هاوكار و  پشتیوانی حكوومەتیش دەبێت بۆ درێژەدان و بەرەوپێشبردنی سیستەمی تەندروستی لە بواری ئابووریی تەندروستیدا و گوتیشی: "بەهۆی ئەو یاسایە نەخۆشخانەكانی كەرتی گشتی و تایبەت دێنە نێو چوارچێوەی یەك سیستەم و یەك سیستەم بەڕێوەی دەبات.''

سامان بەرزنجی ئاشكرایشی كرد، بەهۆی یاساكەوە هەموو هاووڵاتییەك دۆسیەی تایبەت بە خۆی دەبێت لەنێو سیستەم و خزمەتگوزاریی تەندروستیدا و خاوەنی كارتی تەندروستیی خۆی دەبێت.

شوان به‌رزنجی