لە کۆریای باشوور، بەهۆی ئاگرکەوتنەوە لە دارستانان، چەندین کەس گیانیان لەدەست دا. تا ئێستا هەزاران هێکتار زەوی سووتاون و سەدان کەس لە دانیشتووان ناچاربوون ماڵەکانی خۆیان بەجێبهێڵن. حکومەت بەڵێنی یارمەتیی بەرفراوانی داوە.
بەهۆی بەردەوامیی ئاگرکەوتنەوە لە دارستانەکانی کۆریای باشوور، لانیکەم چوار کەس گیانیان لە دەست داوە و شەش کەسی دیکەش برینداربوون و باری تەندروستیی پێنج کەسیان ناجێگیرە.
بەپێی ڕاپۆرتی ئاژانسی هەواڵی یۆنهاپی کۆری، نزیکەی ١٥٠٠ کەس لە دانیشتووانی ئەو ناوچانە ناچاربوون ماڵ و باڵەخانەکانی خۆیان چۆڵ بکەن.
بەپێی هەمان ڕاپۆرت، کوژراو و بریندارەکان بریتین لە ئاگرکوژێنەوەکان و کارمەندانی حکومەت کە لەکاتی ئەنجامدانی ئەرکەکانیاندا، لەلایەن گڕی ئاگرەوە گەمارۆ دراون. ئاگرکەوتنەوەکان لە ڕۆژی هەینی ٢١ی مارس لە شارۆچکەی سانچئۆنگ، کە دەکەوێتە نزیکەی ٢٥٠ کیلۆمەتری باشووری ڕۆژهەڵاتی سیئۆل، دەستیان پێکردووە.
بەرپرسان ڕایانگەیاندووە کە بای وشک و وشکەساڵیی بەردەوام، توندی و بڵاوبوونەوەی ئاگرکەوتنەوەکانی زیاتر کردووە. تا نیوەڕۆی ڕۆژی یەکشەممە ٢٣ی مارس بە کاتی ناوخۆیی، نزیکەی ٣٣٠٠ هێکتار زەوی سووتاوە، کە دەکاتە نزیکەی ٤٦٠٠ یاریگای تۆپی پێ.
حکومەتی کۆریای باشوور ناوچە زیانلێکەوتووەکانی وەک ناوچەی کارەساتبار ڕاگەیاندووە و بەڵێنی داوە کە هەموو سەرچاوە بەردەستەکان بۆ کۆنتڕۆڵکردنی ئاگرکەوتنەوەکان بەگەڕ بخات.
بەپێی ڕاپۆرتی بەڕێوەبەرایەتی دارستانی کۆریا، تەنها لە ڕۆژی شەممە ٢٢ی مارس، ١٦ حاڵەتی ئاگرکەوتنەوە لە دارستانەکان لە چەندین ناوچە تۆمار کراوە.
ئاگرکەوتنەوە لە دارستانەکانی کۆریای باشوور لە ماوەی وشکەساڵیی درێژخایەندا بە شێوەیەکی بەردەوام ڕوودەدات. لەگەڵ ئەوەشدا، لە ساڵانی ڕابردوودا، بەرزبوونەوەی پلەی گەرمای ناوەندی و ڕوودانی دیاردە کەشوهەواییە توندەکان، مەترسی و توندیی ئەم ئاگرکەوتنەوانەی بە ڕێژەیەکی بەرچاو زیاد کردووە. زانایان زیادبوونی ئاگرکەوتنەوەکان لە دارستانەکانی کۆریای باشوور وەک نیشانەیەک لە گۆڕانکارییە کەشوهەواییە بەرفراوانەکان هەڵدەسەنگێنن.
