پەیامی یەکێتی زانایانی ئایینی ئیسلامی کوردستان

بەناوی خوای بەخشندەی میهرەبان

(وَلِتُكْمِلُوا الْعِدَّةَ وَلِتُكَبِّرُوا اللَّهَ عَلَى مَا هَدَاكُمْ وَلَعَلَّكُمْ تَشْكُرُونَ ) البقرة: 185..

بە بۆنەی هاتنەی جەژنی پیرۆزی رەمەزان؛ پیرۆزباییەکی گەرم ئاراستەی سەرجەم موسڵمانان بەگشتی و کوردستانیانی ئازیز بە تایبەتی دەکەین، لە خوای گەورە داواکارین رۆژوو تاعەت و خواپەرستی هەموو لایەکی قەبوڵ کرد بێت..

جەژن رەمزی خۆشی و خۆشحاڵبوونە لەبەرامبەر تەواوبوونی مانگێک خواپەرستی و عیبادەت و بەرۆژوو بوون، بە واتای هەستکردن بە خۆشی و دیداری دۆست و خزم و دەربڕینی شوکرانەبژێری و هاوبەشیکردنی تێکڕای ئۆممەتی ئیسلامی لە ئامانجێگی گەورەی خوداپەرستی و هێنانەدی ئاشتی و مرۆڤدۆستی دێت.

جەژن بۆ دووبارە داڕشتنەوەی پەیوەندی کۆمەڵایەتییەکانە لەسەر بنەمای نیەتپاکی و خۆشەویستی و بڵاوکردنەوەی تەبایی و گیانی لێبوردەیی و رێزگرتن لە یەکتر؛ وەک هەنگاوێکی گرنگ و کاریگەر لەسەر ئاستی جیهانی ئیسلامی، ئەمەش دوای بەجێهێنانی فەرمانی خوای گەورە لە جێبەجێکردنی فەریزەی رۆژووگرتن و رێزگرتن لە مانگی پڕ خێری رەمەزان.

لێرەوە سوپاسی تایبەتی تەواوی مامۆستایانی بەرێزی ئایینی دەکەین، کە خزمەتێکی گەورەیان لە مانگی رەمەزان پێشکەش کرد، هەروەها سوپاس بۆ سەرجەم موسڵمانان بەتایبەت و دام و دەزگا حکومیەکان و خێرخوازان بە گشتی، کە بە رێزگرتن و کۆمەکی و یارمەتیدان خزمەتی زۆریان گەیاند.

هیوادارین ئەم جەژنە هاندەر بێت بۆ ئاشتەوایی و مایەی خێرو خۆشی بۆ هەموو لایەک و کوردستان هەر ئاوەدان و ئارام بێت.

یەکێتی زانایانی ئایینی ئیسلامی کوردستان

29ی ئاداری 2025 زاینی

29ی رەمەزانی 1446 کۆچی