سەرۆکی گشتیی حزبی بزووتنەوەی نەتەوەپەرستی تورکیا (MHP)، دەوڵەت باخچەلی، بە بۆنەی جەژنی نەورۆزەوە پەیامێکی نووسراوی بڵاو کردەوە و داوایەکی گرنگ لە پارتی کرێکارانی کوردستان (PKK) کرد کە لە زووترین کاتدا کۆنگرەیەک بەڕێوە ببات و بڕیاری خۆهەڵوەشاندنەوە بدات.
باخچەلی لە پەیامەکەیدا جەختی لەوە کردەوە کە نەورۆز، وەک سەرچاوەیەکی گرنگی ناسنامە و یەکێتیی نەتەوەیی، دەبێت ببێتە هەنگاوێک بۆ کۆتاییهێنان بە شەڕ و ئاژاوە لە تورکیا.
باخچەلی لە درێژەی پەیامەکەیدا، بەرز نرخاندنی بەشداریی سەرۆک کۆماری تورکیا، ڕەجەب تەییب ئەردۆغان، لە ڕێوڕەسمەکانی نەورۆز کرد و گوتی ئەم بەشدارییە پەیامێکی بەنرخ و پڕ مانا لە خۆ دەگرێت بۆ پتەوکردنی ئاشتی و یەکگرتوویی لە وڵاتدا. هەروەها ئاماژەی بەوە کرد کە نەورۆز تەنها جەژنێکی سروشتی بەهاری نییە، بەڵکو نیشانەیەکی قووڵی کەلتوور و مێژووی هاوبەشی نەتەوەی تورکە.
باخچەلی، کە یەکێکە لە هاوپەیمانە سەرەکییەکانی حکومەتی تورکیا لە چوارچێوەی هاوپەیمانیی کۆماردا، داوای لە PKK کرد گوێ بە بانگەوازی ٢٧ی شوباتی ئیمراڵی بدات کە لە لایەن عەبدوڵڵا ئۆجالان، سەرکردەی زیندانیکراوی ئەم حزبەوە، پێشکەش کرابوو.
ئەم بانگەوازە داوای کۆتاییهێنان بە شەڕی چەکداری و خۆهەڵوەشاندنەوەی PKKی کردبوو.
باخچەلی جەختی کردەوە ئەگەر PKK ئەم بانگەوازە جێبەجێ نەکات، دەکرێت ئەنجامەکانی نەخوازراو بن و ئاڵۆزی سەرهەڵبدەن و ئاشتی و سەقامگیریی وڵات بخەنە مەترسییەوە.
باخچەلی لە بەشێکی دیکەی پەیامەکەیدا، پێشنیارێکی کۆنکرێتی پیشکەش کرد و گوتی: “پێشنیارمان ئەوەیە PKK لە ڕۆژی ٤ی گوڵانی ٢٠٢٥، کە ڕۆژێکی یەکشەممەیە، لە شارۆچکەی مەلەزگیر لە پارێزگای مووش، کۆنگرەیەکی تایبەت بەڕێوە ببات و بە هاوکاریی حزبی دەم (DEM) کە بە نزیک لە کوردەکانەوە دەزانرێت، بڕیاری خۆهەڵوەشاندنەوەی خۆی بدات و کۆتایی بە ناکۆکییەکانی ئەم دۆسیەیە بهێنێت.” ئەم پێشنیارە بەشێکە لە هەوڵەکانی باخچەلی بۆ دەستپێکردنی پرۆسەیەکی سیاسی کە ئامانجی کۆتاییهێنان بە چالاکییەکانی PKK و گەڕانەوەی ئاسایشە بۆ تورکیا.
ئەم داواکارییە لە کاتێکدا دێت، تورکیا لە ماوەی ساڵانی ڕابردوودا شەڕێکی چەکداریی بەردەوام لەگەڵ PKKدا هەبووە و بە ترۆریستی لە لایەن ئەنکەرە و هاوپەیمانەکانییەوە ناودێر کراوە.
