وەزیری دەرەوەی کۆماری ئیسلامی ئێران ڕایگەیاند کە دەرگای گفتوگۆی ناڕاستەوخۆ لەگەڵ ئەمریکا کراوەیە، بەڵام “لەژێر فشاری زۆردا ناچینە گفتوگۆی ڕاستەوخۆ لەگەڵ ئەمریکا.” عەباس عێراقچی هەروەها وتی، کۆماری ئیسلامی ئامادەیە و هیچ کەس بیر لە “دەستدرێژی” بۆ سەر ئێران ناکاتەوە.
عەباس عێراقچی، ڕۆژی لە کۆبوونەوەیەکدا لەگەڵ ڕۆژنامەنووسان لە وەڵامی پرسیارێک سەبارەت بە گفتوگۆ لەگەڵ ئەمریکا ڕایگەیاند: “ئێمە لەژێر فشاری زۆر و ئەو هەڕەشانەی کە ڕۆژانە دەکرێن، ناچینە گفتوگۆی ڕاستەوخۆ لەگەڵ ئەمریکا و ئەمە سیاسەتی ڕوونی ئێمەیە، تا ئەو کاتەی گۆڕانکارییەک لە ڕوانگەی لایەنی بەرامبەر بەرامبەر بە ئێران و گەلی ئێران دروست نەبێت.”
بەپێی ڕاپۆرتی ئاژانسی هەواڵی ئیسنا، عێراقچی لە پەراوێزی بەشداریکردنی لە کۆبوونەوەی دەستەی نەورۆزی کۆمەڵەی مانگی سووری ئێراندا وتی: “بەو تۆمەتانەی کە ڕۆژانە لەلایەن ئەمریکییەکانەوە ئاراستەی ئێران دەکرێن، ئەو سیاسەتانەی کە ڕۆژانە ڕادەگەیەنرێن، بەو داواکارییە نا لۆژیکی و قبوڵنەکراوانەی ڕۆژانە دەگوترێن و داوا دەکرێن، ئێمە ناچینە هیچ گفتوگۆیەکی ڕاستەوخۆ لەگەڵ لایەنە ئەمریکییەکان، بەڵام ڕێگا بۆ گفتوگۆی ناڕاستەوخۆ کراوەیە و ئێمە لە ڕێگەی کەناڵی جیاوازەوە دەتوانین ئەوە بکەین.”