لە تورکیا، پۆلیسی هاتوچۆ شێوازێکی نوێی چاودێریکردنی شۆفێران بەکاردەهێنێت، بە بەکارهێنانی درۆن و هەلیکۆپتەر بۆ تۆمارکردنی سەرپێچییەکان. ئەم شێوازە جیاوازە بووەتە جێگەی مشتومڕ و ڕەخنەی شۆفێران.
بەپێی زانیارییەکان، درۆنەکان بە ئاسماندا دەفڕن و چاودێریی ڕەفتاری شۆفێران دەکەن. هەر شۆفێرێک پابەند نەبێت بە ڕێنماییەکانی هاتوچۆوە، وەک بەکارهێنانی مۆبایل لەکاتی شۆفێریدا، بەنەبەستنی قایشی سەلامەتی، یان لێخوڕینی خێرا و تێپەڕاندنی ترافیک لایت، درۆنەکە وێنەی ئۆتۆمبێلەکەی دەگرێت و سزای بۆ تۆمار دەکرێت.
ئامارەکان دەریدەخەن کە لە سەرەتای ئەمساڵەوە تاوەکو ١٤ی ئادار، نزیکەی ٣٣ هەزار و ٧٧٠ ئۆتۆمبێل و شۆفێر لە ڕێگەی درۆن و هەلیکۆپتەرەوە سزا دراون.
شۆفێران نیگەرانی خۆیان دەردەبڕن لەم شێوازە چاودێریکردنە، چونکە بەبێ ئاگادارکردنەوە سزادەدرێن و هەستی ئەوەیان هەیە کە تەڵەیان بۆ دانراوە.
جێی ئاماژەیە، لە زۆربەی وڵاتانی جیهان و هەرێمی کوردستانیش، کامێرای چاودێری بۆ هاتوچۆ بەکاردەهێنرێت، بەڵام بە شێوەیەکی گشتی، پێش کامێراکان تابلۆی ئاگادارکردنەوە دادەنرێت بۆ ئەوەی شۆفێران ئاگاداری هەبوونی چاودێری بن و خۆیان بپارێزن.
