ئێواره‌ی ئه‌مڕۆ یه‌كشه‌ممه 4/8/2024، ساسان عه‌ونی، وه‌زیری شاره‌وانی و گه‌شتوگوزار، سه‌رۆكایه‌تیی شاره‌وانیی هه‌ولێری به‌سه‌ركرده‌وه و به‌دواداچوونی بۆ كاره‌كانی سه‌رۆكایه‌تییه‌كه و سه‌رجه‌م فه‌رمانگه‌كانی كرد.
له كۆبوونه‌وه‌یه‌كدا كه هه‌ر یه‌كه له سه‌رۆكی شاره‌وانی و به‌ڕێوه‌به‌رانی هه‌ر شه‌ش شاره‌وانییه‌كه‌ی هه‌ولێر و به‌ڕێوه‌به‌رانی ئه‌ندازه‌ی پاركه‌كان و خزمه‌تگوزاریی ژینگه‌پارێزی و كارگه‌ی قیر و سه‌رۆك به‌شه‌كانی ناو سه‌رۆكایه‌تیی شاره‌وانیی هه‌ولێر ئاماده بوون، ساسان عه‌ونی، وه‌زیری شاره‌وانی و گه‌شتوگوزار به وردی به‌دواداچوونی بۆ ئیشوكاره‌كانی سه‌رۆكایه‌تیی شاره‌وانیی هه‌ولێر و سه‌رجه‌م فه‌رمانگه‌كانی سه‌ر به‌و سه‌رۆكایه‌تییه كرد. هه‌روه‌ها به‌شه‌كانی سه‌رۆكایه‌تییه‌كه‌ی به‌سه‌ركرده‌وه.
له‌و كۆبوونه‌وه‌یه‌‌دا ساسان عه‌ونی، وه‌زیری شاره‌وانی و گه‌شتوگوزار چه‌ند ته‌وه‌رێكی گرنگیی په‌یوه‌ست به خزمه‌تكردنی شاری هه‌ولێر و دانیشتووانی شاره‌كه‌ی له‌گه‌ڵیاندا گفتوگۆ كرد و له نزیكه‌وه به‌دواداچوونی بۆ ئیشوكاری فه‌رمانگه‌كان و داواكاریی هاووڵاتییانی هه‌ولێر كرد، هاوكات جه‌ختی له‌سه‌ر نه‌هێشتنی ڕۆتین و خاوێنكردنه‌وه و ڕێكخستنه‌وه‌ی زیاتری سه‌نته‌ری شاری هه‌ولێر كرده‌وه، هه‌روه‌ها ئاماژه‌ی به‌وه‌ش كرد ده‌بێت له گه‌یاندنی خزمه‌تگوزاری به‌و شوێنانه‌ی هه‌ولێر كه پێویستییان به خزمه‌تگوزارییه جۆراوجۆره‌كانه كه‌مته‌رخه‌م نه‌بن و به هه‌موو شێوه‌یه‌ك خزمه‌تی خه‌ڵك و شاره‌كه بكه‌ن.
وه‌زیری شاره‌وانی و گه‌شتوگوزار له‌پای ئه‌و خزمه‌ته زۆره‌ی پێكه‌شیان كردووه، سوپاسی فه‌رمانگه‌كانی كرد كه له ڕابردوودا كاری زۆر باشیان بۆ شاری هه‌ولێر كردووه، له هه‌مان كاتدا داوای لێكردن له پلانه‌كانیاندا كار و پرۆژه‌ی زیاتر ئه‌نجام بده‌ن و ئه‌وه‌ی له توانای شاره‌وانییه‌كاندایه ده‌بێت بۆ خزمه‌تی خه‌ڵكی شاری هه‌ولێر بخڕێته‌‌گه‌ڕ. هه‌روه‌ها هه‌موو جۆره پاڵپشتییه‌كی حكوومه‌تی هه‌رێمی كوردستان و وه‌زاره‌تی شاره‌وانی و گه‌شتوگوزاری بۆیان دووپاتكرده‌وه له‌پێناو خزمه‌تكردنی زیاتری دانیشتووانی شاره‌كه و گه‌شه‌پێدانی شاری هه‌ولێر به گشتی.