ئەمڕۆ پێنجشەممە 10/10/2024، مەسرور بارزانی، سەرۆکی حکوومەتی هەرێمی کوردستان، لە ڕێوڕەسمی دانانی بەردی بناغەی جووتسایدی هەولێر – کۆیە، وتارێكی پێشكەش كرد و لە بەشێكیدا گوتی: “دوای دوو هەفتە ئەمڕۆ بەڵێنەكەمان جێبەجێ دەكەین و بەردی بناغەی جووتسایدی هەولێر – كۆیە دادەنێین و ڕێگەکە دەتوانێت یارمەتیدەرێکی زۆر بێت بۆ بەستنەوەی شاری کۆیە، تەقتەق و دەوروبەری بە هەولێری پایتەخت و دەبێتە بەشێکی سەرەکی لە بەستنەوەی هەولێر بە سلێمانی.”
سەرۆکی حکوومەت باسی لەوەش کرد: “ئێمە بەرنامە و پلانی زۆرمان هەبووە بۆ دروستکردنی تۆڕێکی باشی ڕێگەکان بۆ بەستنەوەی هەموو شارەکان بە یەکترەوە و وردە وردە خەریکین ئەو پلانە جێبەجێ دەکەین.”
گوتیشی: “خەڵكی كۆیە شایەنی ئەوەن خزمەت و پڕۆژەی زیاتر بكرێن، پێشتر لە كابینەكانی پێشووی حكوومەت، بەهۆی ڕێگرییەكان جووتسایدی هەولێر – كۆیە نەكراوە، هیوادارین ڕێگرییەكان نەمێنن بۆ ئەوەی دەستی ئاوەدانی بگاتە هەموو كوردستان.”
سەرۆكی حكوومەتی هەرێمی كوردستان ئاماژەی بەوەش دا: “هیوادارین شۆفێران دوای كردنەوەی شەقامەكە، سەرپێچی لە ڕێنماییەكان نەكەن.”
بەپێی زانیارییەكان، شەقامی جووتسایدی هەولێر – كۆیە 32 مەتر پان دەبێت، بە باشترین دیزاین و كوالێتیی سەردەمیانە دروست دەكرێت، پڕۆژەكەش لەلایەن كۆمپانیای ئەوزەن دروست دەكرێت.
هەر لە جووتسایدەكەدا، پردێك بە درێژیی 250 مەتر دروست دەكرێت، پێنج ئۆڤەرپاسیش دروست دەكرێن و ناوچە سەرەكییەكانی نزیك شەقامەكە پێكەوە دەبەستێتەوە.