سەرچاوەیەکی ئەمنی بڵاویکردەوە، لە ئەنجامی تەقینەوەی بۆمبێکی چێندراو، لە قەزای خورماتوو، سێ پێشمەرگە کە دوو ئەفسەری باڵای تێدایە کوژراون و سێ سەربازی سوپای عێراقیش برینداربوون.
ئەمڕۆ یەکشەممە، 17-11-2024، سەرچاوەیەکی ئەمنی بە میدیای ناوخۆی ڕاگەیاند، ” تەقینەوەکە لە نزیک یەکێک لە بیرە نەوتییەکانی ناوچەی پەڵکانەی سەر بە قەزای دوزخورماتوو چێنراوە، و لەکاتی دەوریەیەکی سەربازی هاوبەشدا تەقیوەتەوە کە ئەندامانی سوپای عێراق و فەوجی 3، 20ـی تێدابووە“.
ڕوونیشیکردەوە، “تەقینەوەکە بووە هۆی برینداربوونی سێ سەربازی سوپای عێراق و کوژرانی عەقید سامان سابر سلێمان، عەقید محەمەد ئەندازیار و سەربازێکی دیکەی هێزەکانی پێشمەرگە“.
ئەو سەرچاوەیە ئاماژەی بەوەشکرد، هێزە ئەمنییەکان لێکۆڵینەوەیان لە ڕووداوەکە دەستپێکردووە بۆ دیاریکردنی ئەو کەسانەی بەرپرسیارن لە چاندنی بۆمبەکە، هاوکات ڕێوشوێنی خۆپارێزییان گرتووەتەبەر بۆ بەرزکردنەوەی ئاسایشی ناوچەکە.