حەمەی حەمەسەعید، وەزیری رۆشنبیری و لاوانی حکومەتی هەرێمی کوردستان، رۆژی سێشەممە، لە دیوانی وەزارەت پێشوازیکرد لە لیو جەنگ کونسوڵی گشتیی کۆماری چینی میللی و شاندێکی یاوەری.
لە دیدارێکدا، وەزیری رۆشنبیری و لاوان پیرۆزبایی لە دەستبەکاربوونی “لیو جەنگ” کرد و هیوای خواست لە ئەرکە نوێیەکەیدا سەرکەوتوو بێت.
وەزیری رۆشنبیری و لاوان ئاماژەی بە گرنگی هەماهەنگی کولتووری و پەرەپێدانی پەیوەندییە ڕۆشنبیری و هونەری و وەرزشییەکان لە نێوان هەرێمی کوردستان و کۆماری میللی چین کرد.
لە بەرامبەردا، کونسوڵی گشتیی کۆماری چینی میللی لە هەرێم، رایگەیاند، وڵاتەکەی بە بایەخەوە دەڕوانێتە پەرەپێدانی پەیوەندیی کولتوورییەکان و لە بەرنامەیاندا هەیە، خولی درێژمەودا بۆ فێربوونی زمانی چینی بکەنەوە و پەرەی زیاتر بە هونەری یارییە جەنگییەکان بدەن.
شاندی کونسوڵخانەی چین جگە لە کونسوڵی گشتیی، پێکهاتبوون لە چێنگ گاوجینگ، سەرۆکی بەشی رامیاری کونسوڵخانە، تانگ یان لە بەشی رامیاری و رووبار سەلاحەدین، بەڕێوەبەری پەیوەندییە گشتییەکانی کونسوڵخانە.
لە کۆتایی دیدارەکەدا، وەزیری رۆشنبیری و لاوان و کونسوڵی گشتیی کۆماری چینی میللی دیاریان پێشکەش بە یەکدی کرد.