محەمەد شیاع سوودانی، سەرۆک وەزیرانی عێراق هۆشداریی دا لەوەی کە هەڵبژاردنەکانی داهاتوو “یان بناغەیەک بۆ سەقامگیری” دادەنێن، “یان پاشەکشە و لەدەستدانی دەسکەوتەکان” بەدوای خۆیاندا دەهێنن.
سوودانی، لە میانەی پێشوازیکردنی لە شێخ و کەسایەتییەکان ئەزیرج لە بەغدا گوتی: “هەڵبژاردنی شەشەمی پەرلەمان، ئەنجامەکانی بناغەیەک بۆ سەقامگیری دادەنێن کە پارێزگاری لەوە دەکات کە لەم ماوەیەدا بەدەست هاتووە یان پاشەکشە و لەدەستدانی دەسکەوتەکان بەدوای خۆیاندا دەهێنن.”
ئاشکراشی کرد: “کەسانێک هەن کە درۆ و چەواشەکاری و شێواندن دەکەن بۆ کاریگەریی لەسەر ئەو دەسکەوتانەی بەدەست هاتوون و تێکدانی گۆڕەپانەکە.”
روونی کردەوه: “حکومەت لە بارودۆخێکی سەختدا هاتە سەر کار و لە یەکەم رۆژی دەستبەکاربوونییەوە دەستی بە بەدواداچوون بۆ پێداویستییەکانی هاووڵاتیان و ئەولەوییەتەکان کرد. حکومەت هەنگاوێکی گرنگی نا بە دامەزراندنی دەرچووان و جێگیرکردنی گرێبەستەکان و مامۆستایانی وانەبێژ.”
درێژەی بە قسەکانیدا: “سندووقەکانی دەنگدان دیاری دەکەن کە بەڕێوەبردنی وڵات بۆ چوار ساڵی داهاتوو چۆن دەبێت و دەبێت دەنگدەر باش هەڵبژاردن بکات بۆ ئەو کەسەی لە ئەنجومەنی نوێنەران نوێنەرایەتی دەکات.”
ئاماژەی بەوەشدا کە “پارێزگاریمان لە ئاسایش و سەقامگیریی عێراق کردووە دوور لە هەر هەڵوێستێکی لایەنگرانه.”