رێکخراوی گۆڵدن گڵۆب رایگەیاند کە ئەستێرەی بەریتانی، هێلین میرین، بۆ وەرگرتنی خەڵاتی سێسیل بی. دیمیل بۆ ساڵی 2026 دەستنیشانکراوە، کە یەکێکە لە بەرزترین خەڵاتەکانی بواری سینەما و بۆ رێزلێنان لە کاروانی پیشەیی و بەشدارییە بەنرخەکانی پێشکەش دەکرێت.
بڕیارە میرین خەڵاتەکەی لە ئاهەنگێکی تەلەڤزیۆنیی تایبەتدا بە ناوی “Golden Eve” وەربگرێت، کە شەوی پێنجشەممە، 8ی کانوونی دووەمی 2026، لە کەناڵی CBS و پلاتفۆرمی پاراماونت+ پەخش دەکرێت.
هێلین هۆهن، سەرۆکی گۆڵدن گڵۆب، رایگەیاند: “هێلین میرین هێزێکی هونەریی بێوێنەیە و کاروانەکەی سەرسوڕهێنەرە. نواندنە ناوازەکانی و پابەندبوونی قووڵی بە هونەرەوە، بووەتە ئیلهام بۆ نەوەکانی هونەرمەندان و بینەران لە سەرانسەری جیهاندا. شانازییەکی گەورەیە کە رێزی لێدەگرین”.
میرین یەکێکە لە دیارترین ئەستێرەکانی هونەری هاوچەرخ و خاوەنی خەڵاتەکانی ئۆسکار، ئێمی، بافتا، ساگ و تۆنییە، لەگەڵ سێ خەڵاتی گۆڵدن گڵۆب.