سوپای ئێران ڕایگەیاندووە، ئەگەر ئیسرائیل وەڵامی هێرشەکەی سوپای پاسداران بداتەوە، ئەوا ڕووبەڕووی هێرشێکی بەرفراوان دەبێتەوە.
محەممەد باقری، سەرۆکی ئەرکانی گشتیی هێزە چەکدارەکانی ئێران ڕۆژی یەکشەممە ١٤ی نیسان لە بەیاننامەیەکدا وتی: بە بۆچوونی ئێمە ئۆپەراسیۆنی دژ بە ئیسرائیل کۆتایی هاتووە و نیە بۆ درێژەدان بەو ئۆپەراسیۆنە هیچ نیازێک.
باقری گوتی: ئەگەر ئیسرائیل لەسەر خاکی خۆمان و لە ناوەندەکانمان لە سوریا یان وڵاتێکی دیکە هەنگاوێک لە دژی ئێمە بگرێتەبەر، هەڵمەتی داهاتوومان گەورەتر دەبێت.
سەرۆکی ئەرکانی هێزە چەکدارەکانی ئێران زیادی کرد: هەوڵمان دا ئەم ئۆپەراسیۆنە تا ڕادەی سزا ئەنجام بدەین و دانیشتوان و ناوەندە ئابوورییەکانی ئیسرائیلیش لێیان نەدرا.
ئاماژەی بەوەشکرد، لەڕێگەی باڵیۆزخانەی سویسرا پەیامێکمان بۆ ئەمریکا نارد کە ئەگەر لە کاردانەوەی ئیسرائیلدا هاوکار بێت ، بنکەکانیان هیچ ئاسایشێکیان نابێت.
لە لایەکی دیکەوە، حوسێن سەلامی، فەرماندەی گشتییی سوپای پاسداران سەبارەت بە هێرشی ئێران بۆ سەر ئیسرائیل گوتی: هەڵمەتی سنووردارمان ئەنجامدا، بەڵام دەکرا بەرفراوانتر بێت.
فەرماندەی گشتیی سوپای پاسداران زیادی کرد: پێشنیار دەکەم ئیسرائیل ڕەفتاری ڕابردووی خۆی ڕابگرێت و لەم هەنگاوە فێربێت.
