جێسی باکڵی، ئەکتەری ئیرلەندی و براوەی خەڵاتی هەڵبژاردەی رەخنەگران بۆ ساڵی 2026، رایگەیاند، بەرجەستەکردنی رۆڵی دایک لە فیلمی “Hamnet” وایکردووە زیاتر ئارەزووی دایکایەتی بکات.
باکڵی لە فیلمی “Hamnet”دا رۆڵی “ئەگنیس” هاوژینی ویلیام شێکسپیر دەگێڕێت، کە چیرۆکەکە باس لە مەرگی کوڕە 11 ساڵانەکەیان دەکات.
باکڵی دوای وەرگرتنی خەڵاتی باشترین ئەکتەر، رایگەیاند: “لە کاتی وێنەگرتنی فیلمەکەدا دایک نەبووم، بەڵام زۆر ئارەزووم دەکرد ئەو هەستە تاقیبکەمەوە. دایکان بوونەوەرێکی سەرسوڕهێنەرن”.
ئەم ئەکتەرە کە لە 2025 بووە دایکی کچێک و ئێستا تەمەنی کۆرپەکەی شەش مانگە، ئاماژەی بەوە کرد کە رۆڵگێڕان لەم فیلمەدا شەرەفێکی گەورە بووە بۆی، بەتایبەت بۆ ناساندنی کەسایەتی “ئەگنیس” کە هەمیشە لە مێژوودا لە ژێر سێبەری ناوی شێکسپیردا فەرامۆش کراوە.