لە هەنگاوێکی گرنگی فەرهەنگی و ئەکادیمیدا، شاری بێرمینگهام لە بەریتانیا بووە مەڵبەندی یەکەمین فێستیڤاڵی تایبەت بە سینەمای کوردی. ئەم فێستیڤاڵە کە لە ساڵی ٢٠٢٦دا دەستی پێکردووە، دوای سەرکەوتنی دوو دیداری پێشووتری فیلمی کوردی دێت و ئامانجیەتی ببێتە ناسنامەیەکی هونەری بۆ کورد لە تاراوگە.
ڕێکخەرانی فێستیڤاڵی فیلمی کوردیی بێرمینگهام ئاماژە بەوە دەکەن، ئەم پڕۆژەیە تەنیا ڕووداوێکی هونەریی کاتی نییە، بەڵکو پڕۆژەیەکی کولتووری و کۆمەڵایەتیی بەردەوامە. ئامانجی سەرەکی فێستیڤاڵەکە دروستکردنی پلاتفۆرمێکی هاوبەشە بۆ بەیەکگەیشتنی فیلمسازانی ناوخۆی کوردستان و دیاسپۆرا، تا لە ڕێگەی زمانی جیهانیی سینەماوە، چیرۆکی مرۆڤی کورد بە کۆمەڵگەی نێودەوڵەتی بناسێنن.
لە ڕوانگەی توێژینەوە ئەکادیمییەکانی بواری سینەماوە، ئەم فێستیڤاڵە ڕۆڵێکی ستراتیژی لە دروستکردنی “بیرەوەریی کۆمەڵایەتی”ـدا دەگێڕێت. بە بڕوای پسپۆڕان بۆ نەتەوەیەک کە مێژووەکەی زۆرجار لەلایەن دەسەڵاتە سیاسییەکانەوە پشتگوێ خراوە، ئەم جۆرە چالاکییانە دەرفەتێکی زێڕینن بۆ پێناسەکردنەوەی ناسنامە و مێژووی کورد بە شێوەیەکی سەربەخۆ و مۆدێرن.
هەڵبژاردنی شاری بێرمینگهام بۆ سازدانی ئەم فێستیڤاڵە بڕیارێکی ورد بووە؛ شارەکە بەهۆی فرەکەلتووری و بوونی ڕەوەندێکی بەرچاوی کوردی تێیدا، ژینگەیەکی لەبارە بۆ گفتوگۆی نێوان گەلان. فێستیڤاڵەکە لێرەدا دەبێتە پردێک بۆ نزیککردنەوەی کولتوورە جیاوازەکان و نیشاندانی ڕووە شارستانییەکەی هونەری کوردی.
لەم خولەی فێستیڤاڵەکەدا، 33 فیلمی هەڵبژێردراو لە ژانرە جیاوازەکان نمایش دەکرێن. بابەتەکان تیشک دەخەنە سەر پرسە هەستیار و هەمیشەییەکانی وەک: کۆچ، ناسنامە، جەنگ، مێژوو و ژیانی ڕۆژانەی تاکی کورد. سینەماکاران لێرەدا وەک ئامرازێک بۆ گێڕانەوەی ئەزموونی تاڵی و شیرینی ژیان، فیلمەکانیان خستووەتە ڕوو.