ئێوارەی ئەمڕۆ شەممە 2026.6.6، لە چوارچێوەی سەردانە فەرمییەکەیدا بۆ شاری وان، ئومێد خۆشناو، پارێزگاری هەولێر، سەردانی سەنتەری قەزای گەڤەرێی سەر بە پارێزگای جولەمێرگی کرد و لەلایەن کەسایەتییە دیارەکانی هۆزەکانی (هەرکی بنەجێ، ساتی، و دۆسکی) و نوێنەرانی ژووری بازرگانی و کەسایەتییە ئاینی و کۆمەڵایەتییەکانی ناوچەکەوە بە گەرمی پێشوازی لێکرا.
لەدیدارەکەدا، کە هەریەک لە غەفوور مەلا ئەحمەد سوار، قائیمقامی قەزای مێرگەسۆر و کارزان عەبدولهادی، سەرۆکی شارەوانی هەولێر و دلێر محەمەد، بەڕێوەبەری گشتی گەشتوگوزاری هەولێر و ئیبراهیم سەمین، جێگری سەرۆکی دەزگای خێرخوازی بارزانی و جەواد سوار حەمەد، سەرپەرشتیاری دەروازەی نێودەوڵەتی زێت و ژمارەیەک لە ئەندامانی ژووری بازرگانی و پیشەسازیی هەولێر ئامادەی بوون، پارێزگاری هەولێر، سڵاو و ڕێزی تایبەتی جەنابی ” سەرۆک مەسعود بارزانی ” گەیاندە خەڵک و کەسایەتییەکانی ناوچەکە و جەختی لە ڕۆڵی مێژوویی و نیشتمانیی خەڵکی دەڤەرەکە و هۆزە تێکۆشەرەکان کردوە لە پاڵپشتیکردنی هەردوو شۆڕشی ئەیلوول و شۆڕشی گوڵان.
لە تەوەرێکی تری دیدارەکەدا، ئاماژەی بەگرنگی کردنەوەی دەروازەی نێودەوڵەتی زێت دا وەک شادەمارێکی نوێی بازرگانی و گەشتیاری لە نێوان هەردوو لادا و جەخت لەوە کرایەوە کە ئەم دەروازەیە دەبێتە هۆی لێک نزیکبوونەوەی زیاتری کۆمەڵایەتی و بوژانەوەی ژێرخانی ئابووری و بازرگانی ناوچەکە.
لەلایەن خۆیانەوە، خانەخوێ و کەسایەتییەکانی گەڤەرێ، خۆشحاڵی خۆیان بەم سەردانەی پارێزگاری هەولێر و شاندی یاوەری نیشاندا و هیوایان خواست ئەم جۆرە دیدارە فەرمییانە ببنە هۆکارێک بۆ دروستکردنی دەرفەتی کاری زیاتر و پتەوکردنی پەیوەندییە دێرینەکانی نێوان هەردوو لایەن.