ل هولا كونفرانسان ل زانكویا دهۆكێ ب ئاماده‌بونا سه‌ربه‌ست له‌زگین به‌رپرسێ مه‌كته‌با رێكخستنا پارتى ل دهۆكێ و نونه‌رێن باره‌گایێ سه‌رۆك بارزانى وسه‌روكێ هه‌رێما كوردستانێ وسه‌روكێ حكومه‌تا هه‌رێما كوردستانێ و نه‌وزاد عەبدولا به‌رپرسێ لقێ ئێك یێ پارتى و ماجد سه‌ید سالح جێگرێ پارێزگارێ دهۆكێ و د.سالار ئوسمان به‌رپرسێ پشكا ره‌وشه‌نبیرى وراگه‌هاندنا پارتى وچه‌ند به‌رپرسێن حزبى وئیدارى و ره‌وشه‌نبیرى وئه‌دیب ونڤیسه‌ر ژ هه‌موو پارێزگه‌هێن هه‌رێمێ ول ژێر دروشمێ (جڤاكه‌كێ ره‌وشه‌نبیر ژبۆ پاشه‌رۆژه‌كا گه‌شتر) دووه‌مین فێستیڤالا خانى یا ره‌وشه‌نبیرى ژلایێ ناڤه‌ندا خانى هاته گێران.
ئیحسان ئامێدى به‌رپرسێ ناڤه‌ندا خانى دپه‌یڤه‌كێدا بخێر هاتنا به‌رهه‌ڤبویا كر وورنكرن دانه سه‌ر به‌رنامه وئارمانجێن فێستیڤالێ وهیڤى خاستن كو ناڤه‌ندا خانى ساڵانه ڤێ چالاكیێ به‌فره‌هتر ئه‌نجامده‌ت.
پاش راپورته‌كا دیكیومه‌نتارى ل سه‌ر ژیانا ئه‌حمه‌دێ خانى هاته نیشادان.
ل دوڤدا ماجد سه‌ید سالح په‌یڤا پارێزگه‌ها دهۆكێ پێشكێشكر و بناڤێ د. عه‌لى ته‌ته‌ر پارێزگارێ دهۆكێ ده‌ستخوشى ل رێكخه‌رێن فێستیڤالێ كر وته‌كه‌زكر كو كابینا 9 ێ یا حكومه‌تا هه‌رێما كوردستانێ وپارێزگه‌ها دهۆكێ گرنگییه‌كا مه‌زن دده‌ته بابه‌تێن كلتورى وره‌وشه‌نبیرى وبه‌ڵاڤكرنا هزرا نه‌ته‌وه‌یى ونیشتمانى ل ده‌ڤ خه‌لكێ كوردستانێ كو پتر ب ئاخ و وه‌ڵاتێ خوڤه بهێنه گرێدان وپشته‌ڤانیا كارگێریا پارێزگه‌هێ نیشان دا بۆ ئه‌نجامدانا ڤان جوره چالاكیا.
هه‌روه‌سا د.سالار ئوسمان به‌رپرسێ پشكا ره‌وشه‌نبیرى وراگه‌هاندنا پارتى ده‌ستخوشى ل ناڤه‌ندا خانى وهه‌موو پشكدارا كر وهیڤى خاستن ب رێكا ڤان جوره فێستیڤالا ئاستێ هزرا نه‌ته‌وه‌یى ونیشتمانى وره‌وشه‌نبیرى پتر بهێته موكومكرن وداخازا سه‌ركه‌فتنێ بۆ به‌رنامێن فێستیڤالێ كر وپشته‌ڤانیا پشكا ره‌وشه‌نبیرى وراگه‌هاندنێ بۆ ئه‌نجامدانا ڤان جوره چالاكیا دیاركر.
پاش فلمه‌كێ تایبه‌ت ل دور ناڤه‌ندا خانى وده‌زگه‌هێن سه‌ر ب ناڤه‌ندێڤه هاته نیشادا هه‌روه‌سا چه‌ند چالاكیێن هونه‌رى وه‌كو ستران وموزیك هاتنه پێشكێشكرن.
بریار ئه‌وه ل هه‌ردوو رۆژێن چالاكیێ ل 15و16 مه‌ها تیرمه‌هێ چه‌ند په‌نه‌لێن ره‌وشه‌نبیرى وكورێن هوزان خاندن وچالاكیێن جودا جودا بهێنه پێشكێشكرن.