وەزیری بازرگانی: هیچ زیادبوونێک لە نرخەکاندا نییە و ڕێگری لێ دەکەین

وەزیری بازرگانی، ئەثیر غەریری، ئەمڕۆ یەکشەممە جەختی کردەوە کە هیچ زیادبوونێک لە نرخەکاندا نییە و ئاماژەی بەوە کرد کە وەزارەتی بازرگانی ڕێگە بەوە نادات؛ هاوکات ڕایگەیاند کە کەلوپەل بەردەستە و پرۆسەی هاوردەکردنیش بەردەوامە.
غەریری ڕایگەیاند: “بڕیارەکانی حکومەت لە بەرژەوەندی هاووڵاتیاندایە. ئەمڕۆ سەردانی ناوەندی بازاڕکردنی ناوچەی بەییاع-مان کرد بۆ دڵنیابوونەوە لە ڕێنماییەکان سەبارەت بە دابینکردنی هەموو پێداویستییەکان، کە بە نرخێکی پاڵپشتیکراو و ٢٠٪ کەمتر لە بازاڕ بەردەستن.” هەروەها وتیشی: “وەزارەتی بازرگانی و ناوەندە حکومییەکان بە هاوکاری کەرتی تایبەت، سەنگی تەرازوو و ڕێگرن لە هەر قۆرخکارییەک کە لەلایەن هەندێک کەسی دەروونلاوازەوە بکرێت بۆ بەرزکردنەوەی نرخەکان لە ڕێگەی پڕوپاگەندەوە.”
زیاتریشی وت: “لە سایەی ئەم حکومەتەدا و لە ڕێگەی ڕێکارە بەردەوامەکان کە هەموو جومگەکانی ئابووری گرتووەتەوە، جێبەجێکردنی سیستەمی ئەسکۆدا (ASYCUDA) بە واتای کۆنترۆڵکردنی سنوورەکان، پاراستنی دراو، و ڕێگریکردن لە قاچاخچێتی و بەهەدەردانی دراو دێت.” ئاماژەی بەوەش کرد کە “تەعریفەی گومرگی بەپێی یاسا و هاوشێوەی وڵاتانی جیهان دانراوە.”
لە کۆتاییدا ئاماژەی بەوە کرد: “بەپێی بەدواداچوونەکانمان بۆ نرخەکان، هیچ زیادبوونێک نییە، بەڵکو تەنها ئەو قازانجەیە کە لە نێوان فرۆشتنی کۆ و تاکدا هەیە.” هەروەها وتی: “کەلوپەل بەردەستە و هاوردەکردن بەردەوامە، تەعریفەی گومرگی زۆر سادە و تەنانەت ڕەمزییە، هیچ گرانبوونێک لە ئارادا نییە و ڕێگەش بەوە نادەین.”