محەمەد بەلداوی، پەرلەمانتاری کوتلەی “سادقون”، ئەمڕۆ رایگەیاند کە ئەو کۆبوونەوەیەی سەرۆکایەتی ئەنجومەنی نوێنەران لەگەڵ سەرۆکی کوتلە سیاسییەکان ئەنجامی دا، لەگەڵ دانیشتنی دووەمی ئەنجومەنەکە، گەیشتنە رێککەوتن لەسەر پێدانی ١٠ رۆژ مۆڵەت بە سەرۆکی کوتلەکان بۆ دابەشکردنی ئەندامەکانیان بەسەر لیژنە پەرلەمانییەکاندا.
بەلداوی بە شەفەق نیوزی راگەیاند، ئێستا ژمارەی لیژنە پەرلەمانییەکان ٢٥ لیژنەیە، پێشبینیش دەکرێت هەندێک لیژنە زیاد ببن و ژمارەیان ببێتە ٢٧ لیژنە؛ ئەم بابەتەش دوای دابەشکردنی پەرلەمانتاران و پەسەندکردنی فەرمی لەناو پەرلەماندا یەکلایی دەکرێتەوە.
ئاماژەی بەوەش کرد کە دۆسیەی دیارکردنی سەرۆکی لیژنە هەمیشەییەکان پێویستی بە کات هەیە تا پێکهێنانی حکومەتی نوێ، بە رەچاوکردنی شایستەی هەڵبژاردن، هەروەها روونی کردەوە کە لەم کاتەدا لیژنەکان لەلایەن بەتەمەنترین ئەندامەوە بەڕێوە دەبرێن.
لە لایەکی ترەوە، نووسینگەی عەدنان فەیحان، جێگری یەکەمی سەرۆکی ئەنجومەنی نوێنەران، لە بەیاننامەیەکدا جەختی لە گرنگی پەلەکردن لە پێشکەشکردنی ناوی کاندیدەکان بۆ لیژنە کاتییەکان کردەوە، بە رەچاوکردنی ئەزموون، لێهاتوویی و پسپۆڕی، هەروەها دابینکردنی رێژەی یاسایی لە کۆبوونەوەکاندا و پێدانی لەپێشینە بەو پێشنیاز و پڕۆژەیاسایانەی کە پەیوەندی راستەوخۆیان بە ژیانی هاووڵاتیانەوە هەیە.