دۆناڵد ترامپ، سەرۆکی ویلایەتە یەکگرتووەکانی ئەمریکا، ڕۆژی دووشەممە لە وتارێکیدا لە کنێسێتی ئیسرائیل جەختی لەوە کردەوە کە “ئەمڕۆ چەک بێدەنگ بوون و داهاتووی ڕۆژهەڵاتی ناوەڕاست ڕووناک دەبێت.”
ترامپ گوتوویەتی: “ئاگربەستەکە کە ئەو یارمەتیی نێوەندگیرییەکەی دا، دەستپێکێکی مێژووییە بۆ ڕۆژهەڵاتێکی ناوەڕاستی نوێ.” ئەو سوپاسی وڵاتانی عەرەبی و ئیسلامیی کرد کە حەماسیان خستە ژێر فشارەوە و جەختی لەوە کردەوە کە ئەوان هاوبەشی ئاشتیین.
ترامپ زیادیشی کرد کە هەموو شتێک بەرەو باشتربوون دەگۆڕێت و ڕۆژهەڵاتی ناوەڕاست بەرەو سەردەمێکی زێڕین دەچێت. ئەو هەروەها ئامادەیی خۆی بۆ بەشداریکردن لە هەوڵەکانی ئاوەدانکردنەوەی غەززە دەربڕی.
ترامپ گوتوویەتی کە حەزی لە جەنگ نییە و وادیارە لە ڕاگرتنیاندا سەرکەوتوو بووم. “ئەمە کۆتایی جەنگێک نییە، بەڵکوو دەستپێکی ڕۆژهەڵاتێکی ناوەڕاستی مێژوویی نوێیە.”
ترامپ جەختی لەوە کردەوە کە حەماس چەک دەکرێت، ئاسایشی ئیسرائیل هەڕەشەی لەسەر نابێت و ئێستا ئیسرائیل دەتوانێت بەدوای ئاشتیدا بگەڕێت و دڵنیا بێتەوە کە جەنگەکان دووبارە نابنەوە. لە کاتی وتارەکەیدا، ئەندامێکی عەرەب و ئەندامێکی چەپ بەهۆی تێکدانی وتارەکەی سەرۆکی ئەمریکا لە هۆڵی کنێسێت دەرکران.
سەرۆکی ئەمریکا هەروەها ئاماژەی بە ئێران کرد و گوتوویەتی کە ئۆپەراسیۆنی هاوبەش لەگەڵ ئیسرائیل دژی ئێران بەرچاو بووە و “تیرۆریسمی ئەتۆمی” لە ئێران لەناو براوە.
ئەو زیادیشی کرد: “ئێمە ڕێگریمان لە گەیشتنی ئێران بە مەترسیدارترین چەکەکانی جیهان کرد. ئێمە ١٤ بۆمبمان بەسەر دامەزراوە ئەتۆمییەکانی ئێراندا باراند.”
ترامپ جەختی لەوە کردەوە کە “هێزەکانی ئاژاوە لە ڕۆژهەڵاتی ناوەڕاست” بە تەواوی شکستیان هێناوە. بەڵام، ئەو گوتوویەتی کە ئەگەر ڕێککەوتنێکی ئاشتی لەگەڵ ئێراندا بێتە ئاراوە، ئەوا نایاب دەبێت.
ترامپ بە ئاماژەدان بە لوبنان، جەختی لەوە کردەوە کە دوای لابردنی حیزبوڵڵا کە ئیسرائیلی دەکردە ئامانج، ڕووداوی باش لە لوبناندا ڕوو دەدەن و گوتوویەتی: “ئێمە پشتگیریی هەوڵەکانی سەرۆکی لوبنان دەکەین بۆ سنووردارکردنی چەک بۆ حکوومەت.”
سەرۆکی ویلایەتە یەکگرتووەکانی ئەمریکا لە دانیشتنی کنێسێتدا بەشدار بوو، لەوێ ئەندامانی پەرلەمان لەبەردەم ئیسحاق هێرتسۆگ، سەرۆکی ئیسرائیل، چەپڵەیان بۆ سەرۆکی ئەمریکا لێ دا.
ترامپ بە کنێسێتی گوت: “ئەمە سەرکەوتنێکی نایابە بۆ ئیسرائیل و جیهان کە هەموو ئەم نەتەوانە وەک هاوبەشی ئاشتی پێکەوە کار دەکەن. نەوەکانی داهاتوو، ئەمە وەک ئەو ساتە لەبیر دەکەن کە هەموو شتێک دەستی پێ کرد.”
ئەو زیادیشی کرد: “ئێمە نیشانمان داوە کە ئاشتی تەنها هیوایەک نییە کە بتوانین خەونی پێوە ببینین، بەڵکوو ڕاستییەکە کە دەتوانین ڕۆژ بە ڕۆژ، کەس بە کەس، نەتەوە بە نەتەوە دروستی بکەین.”
ئەو جەختی لەوە کردەوە کە “تەواوی سەرنجی خەڵکی غەززە دەبێت لەسەر گەڕاندنەوەی بنەما سەرەکییەکانی سەقامگیری، ئاسایش، کەرامەت و گەشەی ئابووری بێت بۆ ئەوەی بتوانن لە کۆتاییدا ژیانێکی باشتر کە منداڵەکانیان شایستەیەتی، بەدەست بهێنن.”
ئەو زیادیشی کرد: “تەنانەت بۆ ئێران، دەستی دۆستایەتی و هاوکاری هەمیشە کراوەیە.”
ترامپ ئاماژەی بەوە کرد کە “بێگومان ئاشتی و ڕێز دەتوانێت لەنێو نەتەوەکانی ڕۆژهەڵاتی ناوەڕاستدا بە شێوەیەکی فراوانتر گەشە بکات.”
سەرۆکی ویلایەتە یەکگرتووەکانی ئەمریکا، هەر کە گەیشتە باڵەخانەی پەرلەمان، لە نووسینگەی میوانان، لە کاتێکدا بنیامین ناتانیاهۆ، سەرۆک وەزیری ئیسرائیل، لە تەنیشتی وەستابوو، گوتوویەتی: “ئەمە شەرەفێکی گەورەیە بۆ من. ئەمە ڕۆژێکی گەورە، ڕۆژێکی نایابە. دەستپێکێکی نوێیە.”