لە میانی سەردانی نیکۆڵ پاشینیان، سەرۆکوەزیرانی ئەرمینیا بۆ ئاستانە، حکوومەتی کازاخستان بە فەرمی پشتیوانیی خۆی بۆ کردنەوەی ڕێڕەوی گواستنەوەی نێودەوڵەتی لە ناوچەی قەوقاز ڕاگەیاند، کە بەشێکیان لەگەڵ پڕۆژەی مشتومڕهەڵگری “ڕێڕەوی زەنگەزۆر” و دەستپێشخەرییەکی نوێ کە بە “ڕێڕەوی ترەمپ” ناسێنراوە، یەک دەگرنەوە.
قاسم جۆمارت تۆکایێڤ، سەرۆکی کازاخستان، لە دیدارەکەیدا لەگەڵ پاشینیان ڕایگەیاند کە وڵاتەکەی ئامادەیە بەشداری لە پڕۆژەی “ڕێڕەوی ترەمپ بۆ ئاشتی و خۆشگوزەرانیی نێودەوڵەتی” (TRIPP) و هەروەها دەستپێشخەریی “چوارڕیانی ئاشتی”ی ئەرمینیا بکات. ئامانجی سەرەکیی ئەم پڕۆژانە بەستنەوەی ئابووریی وڵاتانی ئاسیای ناوەڕاستە بە بازاڕەکانی جیهان لە ڕێگەی قەوقازەوە.
سێریک ژومانگارین، جێگری سەرۆکوەزیرانی کازاخستان، ڕوونی کردەوە کە کردنەوەی هێڵی ئاسن و ڕێگای وشکانی لە ڕێگەی زەنگەزۆرەوە (کە نەخچیڤان بە ئازەربایجانەوە دەبەستێتەوە)، دەرفەتێکی زێڕینە بۆ هەمەچەشنکردنی ڕێڕەوە بازرگانییەکان. ئەو ئاماژەی بەوە دا کە پێشتر تەنیا پشتیان بە بەندەرەکانی جۆرجیا دەبەست، بەڵام ئەم ڕێگایە نوێیە دەتوانێت ڕاستەوخۆ کازاخستان بە تورکیا و ئەورووپاوە ببەستێتەوە.
“ڕێڕەوی زەنگەزۆر” خاڵێکی ناکۆکیی سەرەکییە لە نێوان ئازەربایجان و ئەرمینیا. ئازەربایجان و تورکیا پێداگری لەسەر کردنەوەی ئەم ڕێڕەوە دەکەن بۆ بەستنەوەی ڕاستەوخۆی تورکیا بە جیهانی تورکی (ئاسیای ناوەڕاست)، بەڵام ئەرمینیا و ئێران نیگەرانییان هەیە کە ئەمە ببێتە هۆی گۆڕینی سنوورەکان یان دابڕانی ئێران لە ئەرمینیا. پشتیوانیی کازاخستان وەک وڵاتێکی کاریگەری ئاسیای ناوەڕاست، کێش بۆ جێبەجێکردنی ئەم پڕۆژەیە زیاد دەکات، بەتایبەت لە چوارچێوەی “ڕێڕەوی ناوەڕاست” کە وەک جێگرەوەیەک بۆ ڕووسیا سەیر دەکرێت.
هەواڵی پێشوو