وەزارەتی دەرەوەی پاکستان ڕۆژی سێشەممە پشتڕاستی کردەوە، کە ئەو وڵاتە بۆ بەشداریکردن لە گفتوگۆکانی ئێران و ئەمریکا بە ئامانجی کەمکردنەوەی گرژییەکانی نێوان تاران و واشنتۆن بانگێشت کراوە.
تاهیر ئەندەرابی، گوتەبێژی وەزارەتی دەرەوەی پاکستان لە وەڵامی پرسیارێکدا گوتی: “پاکستان بانگێشتنامەی تایبەت بە گفتوگۆکانی داهاتووی نێوان ئێران و ئەمریکای پێ گەیشتووە”.
سەرچاوەیەکی دیپلۆماسی بە ڕۆژنامەی دۆنی ڕاگەیاندووە، بەشداریکردنی پاکستان وەک هۆکارێکی گرنگ بۆ کەمکردنەوەی گرژییەکان سەیر دەکرێت و ئیسلامئاباد بە بێدەنگی هەوڵی ئاسانکاریی بۆ ئەم دانوستانانە داوە. بە گوتەی ئەو سەرچاوەیە، چاوەڕوان دەکرێت ئیسحاق دار، جێگری سەرۆکوەزیران و وەزیری دەرەوەی پاکستان لەو کۆبوونەوەیەدا بەشداری بکات.
بەرپرسێکی عەرەبیش بە ئاژانسی فرانس پرێسی ڕاگەیاندووە، دیدارەکە بە ئەگەری زۆرەوە ڕۆژی هەینی لە تورکیا بەڕێوە دەچێت.
هاوکات بەرپرسێکی هەرێمی بە ڕۆیتەرز دەڵێت: ئەولەوییەتی ئەم دانوستانانە ڕێگریکردنە لە هەرچەشنە تێکهەڵچوونێک و کەمکردنەوەی گرژیی نێوان هەردوو لایە؛ هەروەها ژمارەیەک لە هێزە هەرێمییەکانیش بۆ ئەو گفتوگۆیانە بانگێشت کراون. بە گوتەی ئەو بەرپرسە، وڵاتانی وەک پاکستان، عەرەبستانی سعوودی، قەتەر، میسڕ، عومان و ئیماراتی یەکگرتووی عەرەبی لە ئاستی وەزیرانی دەرەوەدا بانگێشت کراون.
گوتراوە هێشتا شێوازی وردی کۆبوونەوەکان دیار نییە، بەڵام “کۆبوونەوەی سەرەکی” ڕۆژی هەینی بەڕێوە دەچێت.
