لێکۆڵینەوەیەک کە لەلایەن تۆڕی ئەمریکی CNNبڵاوکراوەتەوە، ئاماژەی بەوە کردووە کە بڕیاری سەرۆکی ئەمریکا، دۆنالد ترەمپ، بۆ دەستپێکردنی شەڕ دژی ئێران، لەوانەیە لە مێژووی سەرۆکایەتییەکەیدا وەک هەڵەیەکی گەورە تۆمار بکرێت، ئەگەر نەیتوانێت دەرچوونێکی گونجاو بۆ بارودۆخی ئێستا بدۆزێتەوە.
بەپێی هەمان لێکۆڵینەوە، ترەمپ تا ئێستا لە فراوانکردنی شەڕەکە خۆی پاراستووە، بۆ ئەوەی ناوچەکە زیاتر نەخاتە ناو قەیرانێک کە لە توانای بەڕێوەبردنی حکومەتەکەی دەرچێت.
چاوەڕوانی بڕیاری ڕۆژی سێشەممە لەسەر هۆرمز
لە ڕۆژی سێشەممەدا، چاوی هەمووان بۆ کۆشکی سپی بڕاوەتەوە بۆ زانینی ئەنجامی ماوەیەک کە دۆنالد ترەمپ بە ئێرانی داوە، دوای ئەوەی ڕاگەیاند چاوەڕوانی ئەوە دەکات ئێران ڕێگای ئاوی هۆرمز بە تەواوی بکاتەوە، وەک مەرجێک بۆ وازهێنان لە هەنگاوی سەربازی.
لە کاتێکدا تاران بوونی گفتوگۆی ڕاستەوخۆ لەگەڵ واشنگتۆن ڕەت دەکاتەوە و جەخت لەسەر ڕەتکردنەوەی دانوستانی تاکلایەنە دەکات، ترەمپ دەڵێت ئێران لە ڕێگەی ناوبژیوانانەوە گفتوگۆی نائاشکرا دەکات، هەروەها هۆشداری داوە کە ئەگەر ماوە دیاریکراوەکە بەبێ ئەنجام تەواو ببێت، ئەگەری گەڕانەوە بۆ هەڵکشانی سەربازی هەیە.
هەروەها، سەرچاوە هەرێمییەکان ئاماژەیان داوە کە نێردراوانی ترەمپ چاودێری دانوستانی ناراستەوخۆ لە ڕێگەی کەناڵی عومان دەکەن، بۆ تاوتوێکردنی پێشنیارێک سەبارەت بە دروستکردنی ڕێڕەویەکی نوێی دەریایی، بێ ئەوەی باجی تێپەڕبوون لە کەشتییەکان وەربگیرێت.
ترەمپ قۆناغی ئێستای بە “دەرفەتی دواهەم” بۆ ئێران ناوبردووە بۆ کۆتاییهێنان بە قەیرانەکە، پێش ئەوەی ئەگەری دەستپێکردنەوەی گەمارۆی تەواوی ئاسمانی و دەریایی هەبێت.