وەزیری دەرەوەی عێراق، فۆئاد حوسێن، لەگەڵ بەدر عەبدولعاتی، وەزیری دەرەوە و کۆچ و کاروباری میسرییەکانی دەرەوەی کۆماری میسری عەرەبی، پڕۆژەی ڕاکێشانی هێڵی بۆریی نەوتیان لە عێراقەوە بۆ بەندەری عەقەبە و لەوێشەوە بۆ دەریای سور تاوتوێ کرد، بە مەبەستی پشتیوانیکردنی هاوکاریی ئابووری و بەهێزکردنی ڕێڕەوەکانی گواستنەوە و هەناردەکردنی وزە.
وەزارەتی دەرەوە لە ڕاگەیەندراوێکدا کە دەست ئاژانسی هەواڵی عێراقی (واع) کەوتووە، ڕایگەیاند: «وەزیری دەرەوە، فۆئاد حوسێن، ڕۆژی چوارشەممە ڕێکەوتی ۵ی ئابی ۲۰۲۶، لە عەممانی پایتەختی ئوردن و لە پەراوێزی بەشداریکردنیان لە کۆبوونەوەی وەزاریی عەرەبی دەربارەی قودس، لەگەڵ بەدر عەبدولعاتی، وەزیری دەرەوە و کۆچ و کاروباری میسرییەکانی دەرەوەی میسر کۆبووەوە».
زیادیشی کرد: «لە کاتی کۆبوونەوەکەدا، ڕێگاکانی بەهێزکردنی پەیوەندییە دووقۆڵییەکانی نێوان عێراق و میسر، و ئاسۆکانی گەشەپێدانیان لە بواره جیاوازەکاندا تاوتوێ کران، سەرەڕای گرنگیی بەردەوامبوونی ئاڵوگۆڕی سەردانی نێوان بەرپرسان و شاندەکانی هەردوو وڵات لە قۆناغی داهاتوودا، بە جۆرێک کە هاوکار بێت لە فراوانکردنی بواری هاوکاریی هاوبەش».
وەزارەتەکە ئاماژەی بەوەش دا: «هەردوولا تاوتوێی ئەو پڕۆژە هاوبەشانەیان کرد کە کۆمپانیا میسرییەکان لە عێراقدا جێبەجێیان دەکەن، هەروەها ڕێگاکانی بەهێزکردنی هاوکاری لە کەرتی وزەدا، بەتایبەتی لە بواری حسابات و کارەبادا، تاوەکو خزمەت بە بەرژەوەندییە هاوبەشەکانی هەردوو وڵات بکات». ئەوەشی ڕوون کردەوە کە «هەردوو وەزیر بیروڕایان دەربارەی پێشهاتەکانی ڕەوشی ناوچەکە و ئاڵنگارییە هەرێمییە بەردەوامەکان ئاڵوگۆڕ کرد، لەوانەش دواین پێشهاتەکانی کەشتیوانی لە گەرووی هورمز و گرنگیی دەستەبەرکردنی ڕەوانیی جووڵەی کەشتیوانیی دەریایی».
ڕاشیگەیاند: «کۆبوونەوەکە هەروەها ئاماژەی بە پڕۆژەی ڕاکێشانی هێڵی بۆریی نەوت لە عێراقەوە بۆ بەندەری عەقەبە، و لەوێشەوە بۆ دەریای سور کرد، لەگەڵ گرنگیی ئەم پڕۆژەیە لە پشتیوانیکردنی هاوکاریی ئابووری و بەهێزکردنی ڕێڕەوەکانی گواستنەوە و هەناردەکردنی وزە».
وەزارەتی دەرەوە جەختیشی کردەوە کە «هەردوولا ڕێککەوتن لەسەر بەردەوامبوونی هەماهەنگی و پەیوەندییەکان، و کارکردن بۆ چڕکردنەوەی ئاڵوگۆڕی سەردان و شاندەکان لە بەرزترین ئاستدا، بە جۆرێک کە پەیوەندییەکانی عێراق و میسر بەهێزتر بکات و ڕێڕەوەکانی هاوکاریی دووقۆڵی بباتە ئاسۆیەکی فراوانترەوە».
